|
| |
Hum woh hain jo talab lazzat-e-gam karte hain
Hum woh hain jo talab lazzat-e-gam karte hain
Tum se kab shikwa-e-bedad wo sitam karte hain
Haai kya hoga bata ai dil-e-bedaad pasand
Ab sitam bhi woh ba andaaz-e-karam karte hain
Tum nahi waaqif-e-adaab-e-sanam ai waaiz
Butkade mein bhi kahin zikr-e-haram karte hain
Hum wafayein bhi karein aur khatawar rahein
Who agar zulm bhi dhayein to karam karte hain
Isko arbab-e-nazar kahte hain tauheen-e-junoo
Sakhtiy-e-gam mein kahin aankh bhi nam karte hain
Uspe sau bar karu izzat-e-konain nisar
Hai woh sar jo tere paaon pe kham karte hain
Aaj tak jisko sitam ka bhi saleeqa na hua
Akhtar usse abas ummid-e-karam karte hain
Copyright ©
Akhtar Muslimi
|
|