Huwag Manlalamig Ang Pag-Ibig Sa Diyos
Huwag manlalamig ang pag-ibig sa Diyos,
Kahit ano pa ang maganap sa daigdig;
Palaging sundin ang Kaniyang mga utos,
Sa kapighatian ay huwag padadaig.
Kahit ano pa ang maganap sa daigdig,
Maging maalab sa tawag ng ating Ama;
Sa kapighatian ay huwag padadaig,
Huwag maglaho ang ningas ng ating sigla.
Maging maalab sa tawag ng ating Ama,
Mahalin natin ang Diyos nang buong lugod;
Huwag maglaho ang ningas ng ating sigla,
Huwag tayong magsawa, huwag manghimagod.
Mahalin natin ang Diyos nang buong lugod,
Tayo'y tumalima na kalakip ang puso;
Huwag tayong magsawa, huwag manghimagod,
Ikintal ang mga aral na itinuro.
Tayo'y tumalima na kalakip ang puso,
Palaging sundin ang Kaniyang mga utos,
Ikintal ang mga aral na itinuro,
Huwag manlalamig ang pag-ibig sa Diyos.
Copyright © Bernard F. Asuncion | Year Posted 2017
Post Comments
Poetrysoup is an environment of encouragement and growth so only provide specific positive comments that indicate what you appreciate about the poem.
Please
Login
to post a comment