Written by
Robert Burns |
GUID-MORNIN’ to our Majesty!
May Heaven augment your blisses
On ev’ry new birth-day ye see,
A humble poet wishes.
My bardship here, at your Levee
On sic a day as this is,
Is sure an uncouth sight to see,
Amang thae birth-day dresses
Sae fine this day.
I see ye’re complimented thrang,
By mony a lord an’ lady;
“God save the King” ’s a cuckoo sang
That’s unco easy said aye:
The poets, too, a venal gang,
Wi’ rhymes weel-turn’d an’ ready,
Wad gar you trow ye ne’er do wrang,
But aye unerring steady,
On sic a day.
For me! before a monarch’s face
Ev’n there I winna flatter;
For neither pension, post, nor place,
Am I your humble debtor:
So, nae reflection on your Grace,
Your Kingship to bespatter;
There’s mony waur been o’ the race,
And aiblins ane been better
Than you this day.
’Tis very true, my sovereign King,
My skill may weel be doubted;
But facts are chiels that winna ding,
An’ downa be disputed:
Your royal nest, beneath your wing,
Is e’en right reft and clouted,
And now the third part o’ the string,
An’ less, will gang aboot it
Than did ae day. 1
Far be’t frae me that I aspire
To blame your legislation,
Or say, ye wisdom want, or fire,
To rule this mighty nation:
But faith! I muckle doubt, my sire,
Ye’ve trusted ministration
To chaps wha in barn or byre
Wad better fill’d their station
Than courts yon day.
And now ye’ve gien auld Britain peace,
Her broken shins to plaister,
Your sair taxation does her fleece,
Till she has scarce a tester:
For me, thank God, my life’s a lease,
Nae bargain wearin’ faster,
Or, faith! I fear, that, wi’ the geese,
I shortly boost to pasture
I’ the craft some day.
I’m no mistrusting Willie Pitt,
When taxes he enlarges,
(An’ Will’s a true guid fallow’s get,
A name not envy spairges),
That he intends to pay your debt,
An’ lessen a’ your charges;
But, God-sake! let nae saving fit
Abridge your bonie barges
An’boats this day.
Adieu, my Liege; may freedom geck
Beneath your high protection;
An’ may ye rax Corruption’s neck,
And gie her for dissection!
But since I’m here, I’ll no neglect,
In loyal, true affection,
To pay your Queen, wi’ due respect,
May fealty an’ subjection
This great birth-day.
Hail, Majesty most Excellent!
While nobles strive to please ye,
Will ye accept a compliment,
A simple poet gies ye?
Thae bonie bairntime, Heav’n has lent,
Still higher may they heeze ye
In bliss, till fate some day is sent
For ever to release ye
Frae care that day.
For you, young Potentate o’Wales,
I tell your highness fairly,
Down Pleasure’s stream, wi’ swelling sails,
I’m tauld ye’re driving rarely;
But some day ye may gnaw your nails,
An’ curse your folly sairly,
That e’er ye brak Diana’s pales,
Or rattl’d dice wi’ Charlie
By night or day.
Yet aft a ragged cowt’s been known,
To mak a noble aiver;
So, ye may doucely fill the throne,
For a’their clish-ma-claver:
There, him 2 at Agincourt wha shone,
Few better were or braver:
And yet, wi’ funny, ***** Sir John, 3
He was an unco shaver
For mony a day.
For you, right rev’rend Osnaburg,
Nane sets the lawn-sleeve sweeter,
Altho’ a ribbon at your lug
Wad been a dress completer:
As ye disown yon paughty dog,
That bears the keys of Peter,
Then swith! an’ get a wife to hug,
Or trowth, ye’ll stain the mitre
Some luckless day!
Young, royal Tarry-breeks, I learn,
Ye’ve lately come athwart her—
A glorious galley, 4 stem and stern,
Weel rigg’d for Venus’ barter;
But first hang out, that she’ll discern,
Your hymeneal charter;
Then heave aboard your grapple airn,
An’ large upon her quarter,
Come full that day.
Ye, lastly, bonie blossoms a’,
Ye royal lasses dainty,
Heav’n mak you guid as well as braw,
An’ gie you lads a-plenty!
But sneer na British boys awa!
For kings are unco scant aye,
An’ German gentles are but sma’,
They’re better just than want aye
On ony day.
Gad bless you a’! consider now,
Ye’re unco muckle dautit;
But ere the course o’ life be through,
It may be bitter sautit:
An’ I hae seen their coggie fou,
That yet hae tarrow’t at it.
But or the day was done, I trow,
The laggen they hae clautit
Fu’ clean that day.
Note 1. The American colonies had recently been lost. [back]
Note 2. King Henry V.—R. B. [back]
Note 3. Sir John Falstaff, vid. Shakespeare.—R. B. [back]
Note 4. Alluding to the newspaper account of a certain Royal sailor’s amour.—R. B. This was Prince William Henry, third son of George III, afterward King William IV. [back]
|
Written by
Robert Burns |
May—, 1786.I LANG hae thought, my youthfu’ friend,
A something to have sent you,
Tho’ it should serve nae ither end
Than just a kind memento:
But how the subject-theme may gang,
Let time and chance determine;
Perhaps it may turn out a sang:
Perhaps turn out a sermon.
Ye’ll try the world soon, my lad;
And, Andrew dear, believe me,
Ye’ll find mankind an unco squad,
And muckle they may grieve ye:
For care and trouble set your thought,
Ev’n when your end’s attained;
And a’ your views may come to nought,
Where ev’ry nerve is strained.
I’ll no say, men are villains a’;
The real, harden’d wicked,
Wha hae nae check but human law,
Are to a few restricked;
But, Och! mankind are unco weak,
An’ little to be trusted;
If self the wavering balance shake,
It’s rarely right adjusted!
Yet they wha fa’ in fortune’s strife,
Their fate we shouldna censure;
For still, th’ important end of life
They equally may answer;
A man may hae an honest heart,
Tho’ poortith hourly stare him;
A man may tak a neibor’s part,
Yet hae nae cash to spare him.
Aye free, aff-han’, your story tell,
When wi’ a bosom crony;
But still keep something to yoursel’,
Ye scarcely tell to ony:
Conceal yoursel’ as weel’s ye can
Frae critical dissection;
But keek thro’ ev’ry other man,
Wi’ sharpen’d, sly inspection.
The sacred lowe o’ weel-plac’d love,
Luxuriantly indulge it;
But never tempt th’ illicit rove,
Tho’ naething should divulge it:
I waive the quantum o’ the sin,
The hazard of concealing;
But, Och! it hardens a’ within,
And petrifies the feeling!
To catch dame Fortune’s golden smile,
Assiduous wait upon her;
And gather gear by ev’ry wile
That’s justified by honour;
Not for to hide it in a hedge,
Nor for a train attendant;
But for the glorious privilege
Of being independent.
The fear o’ hell’s a hangman’s whip,
To haud the wretch in order;
But where ye feel your honour grip,
Let that aye be your border;
Its slightest touches, instant pause—
Debar a’ side-pretences;
And resolutely keep its laws,
Uncaring consequences.
The great Creator to revere,
Must sure become the creature;
But still the preaching cant forbear,
And ev’n the rigid feature:
Yet ne’er with wits profane to range,
Be complaisance extended;
An atheist-laugh’s a poor exchange
For Deity offended!
When ranting round in pleasure’s ring,
Religion may be blinded;
Or if she gie a random sting,
It may be little minded;
But when on life we’re tempest driv’n—
A conscience but a canker—
A correspondence fix’d wi’ Heav’n,
Is sure a noble anchor!
Adieu, dear, amiable youth!
Your heart can ne’er be wanting!
May prudence, fortitude, and truth,
Erect your brow undaunting!
In ploughman phrase, “God send you speed,”
Still daily to grow wiser;
And may ye better reck the rede,
Then ever did th’ adviser!
|
Written by
Robert Burns |
MY lov’d, my honour’d, much respected friend!
No mercenary bard his homage pays;
With honest pride, I scorn each selfish end,
My dearest meed, a friend’s esteem and praise:
To you I sing, in simple Scottish lays,
The lowly train in life’s sequester’d scene,
The native feelings strong, the guileless ways,
What Aiken in a cottage would have been;
Ah! tho’ his worth unknown, far happier there I ween!
November chill blaws loud wi’ angry sugh;
The short’ning winter-day is near a close;
The miry beasts retreating frae the pleugh;
The black’ning trains o’ craws to their repose:
The toil-worn Cotter frae his labour goes,—
This night his weekly moil is at an end,
Collects his spades, his mattocks, and his hoes,
Hoping the morn in ease and rest to spend,
And weary, o’er the moor, his course does hameward bend.
At length his lonely cot appears in view,
Beneath the shelter of an aged tree;
Th’ expectant wee-things, toddlin, stacher through
To meet their dead, wi’ flichterin noise and glee.
His wee bit ingle, blinkin bonilie,
His clean hearth-stane, his thrifty wifie’s smile,
The lisping infant, prattling on his knee,
Does a’ his weary kiaugh and care beguile,
And makes him quite forget his labour and his toil.
Belyve, the elder bairns come drapping in,
At service out, amang the farmers roun’;
Some ca’ the pleugh, some herd, some tentie rin
A cannie errand to a neibor town:
Their eldest hope, their Jenny, woman-grown,
In youthfu’ bloom-love sparkling in her e’e—
Comes hame, perhaps to shew a braw new gown,
Or deposite her sair-won penny-fee,
To help her parents dear, if they in hardship be.
With joy unfeign’d, brothers and sisters meet,
And each for other’s weelfare kindly speirs:
The social hours, swift-wing’d, unnotic’d fleet:
Each tells the uncos that he sees or hears.
The parents, partial, eye their hopeful years;
Anticipation forward points the view;
The mother, wi’ her needle and her shears,
Gars auld claes look amaist as weel’s the new;
The father mixes a’ wi’ admonition due.
Their master’s and their mistress’ command,
The younkers a’ are warned to obey;
And mind their labours wi’ an eydent hand,
And ne’er, tho’ out o’ sight, to jauk or play;
“And O! be sure to fear the Lord alway,
And mind your duty, duly, morn and night;
Lest in temptation’s path ye gang astray,
Implore His counsel and assisting might:
They never sought in vain that sought the Lord aright.”
But hark! a rap comes gently to the door;
Jenny, wha kens the meaning o’ the same,
Tells how a neibor lad came o’er the moor,
To do some errands, and convoy her hame.
The wily mother sees the conscious flame
Sparkle in Jenny’s e’e, and flush her cheek;
With heart-struck anxious care, enquires his name,
While Jenny hafflins is afraid to speak;
Weel-pleased the mother hears, it’s nae wild, worthless rake.
Wi’ kindly welcome, Jenny brings him ben;
A strappin youth, he takes the mother’s eye;
Blythe Jenny sees the visit’s no ill ta’en;
The father cracks of horses, pleughs, and kye.
The youngster’s artless heart o’erflows wi’ joy,
But blate an’ laithfu’, scarce can weel behave;
The mother, wi’ a woman’s wiles, can spy
What makes the youth sae bashfu’ and sae grave,
Weel-pleas’d to think her bairn’s respected like the lave.
O happy love! where love like this is found:
O heart-felt raptures! bliss beyond compare!
I’ve paced much this weary, mortal round,
And sage experience bids me this declare,—
“If Heaven a draught of heavenly pleasure spare—
One cordial in this melancholy vale,
’Tis when a youthful, loving, modest pair
In other’sarms, breathe out the tender tale,
Beneath the milk-white thorn that scents the evening gale.”
Is there, in human form, that bears a heart,
A wretch! a villain! lost to love and truth!
That can, with studied, sly, ensnaring art,
Betray sweet Jenny’s unsuspecting youth?
Curse on his perjur’d arts! dissembling smooth!
Are honour, virtue, conscience, all exil’d?
Is there no pity, no relenting ruth,
Points to the parents fondling o’er their child?
Then paints the ruin’d maid, and their distraction wild?
But now the supper crowns their simple board,
The halesome parritch, chief of Scotia’s food;
The sowp their only hawkie does afford,
That, ’yont the hallan snugly chows her cood:
The dame brings forth, in complimental mood,
To grace the lad, her weel-hain’d kebbuck, fell;
And aft he’s prest, and aft he ca’s it guid:
The frugal wifie, garrulous, will tell
How t’was a towmond auld, sin’ lint was i’ the bell.
The cheerfu’ supper done, wi’ serious face,
They, round the ingle, form a circle wide;
The sire turns o’er, with patriarchal grace,
The big ha’bible, ance his father’s pride:
His bonnet rev’rently is laid aside,
His lyart haffets wearing thin and bare;
Those strains that once did sweet in Zion glide,
He wales a portion with judicious care;
And “Let us worship God!” he says with solemn air.
They chant their artless notes in simple guise,
They tune their hearts, by far the noblest aim;
Perhaps Dundee’s wild-warbling measures rise;
Or plaintive Martyrs, worthy of the name;
Or noble Elgin beets the heaven-ward flame;
The sweetest far of Scotia’s holy lays:
Compar’d with these, Italian trills are tame;
The tickl’d ears no heart-felt raptures raise;
Nae unison hae they with our Creator’s praise.
The priest-like father reads the sacred page,
How Abram was the friend of God on high;
Or Moses bade eternal warfare wage
With Amalek’s ungracious progeny;
Or how the royal bard did groaning lie
Beneath the stroke of Heaven’s avenging ire;
Or Job’s pathetic plaint, and wailing cry;
Or rapt Isaiah’s wild, seraphic fire;
Or other holy seers that tune the sacred lyre.
Perhaps the Christian volume is the theme,
How guiltless blood for guilty man was shed;
How He, who bore in Heaven the second name,
Had not on earth whereon to lay His head:
How His first followers and servants sped;
The precepts sage they wrote to many a land:
How he, who lone in Patmos banished,
Saw in the sun a mighty angel stand,
And heard great Bab’lon’s doom pronounc’d by Heaven’s command.
Then, kneeling down to Heaven’s Eternal King,
The saint, the father, and the husband prays:
Hope “springs exulting on triumphant wing,” 1
That thus they all shall meet in future days,
There, ever bask in uncreated rays,
No more to sigh, or shed the bitter tear,
Together hymning their Creator’s praise,
In such society, yet still more dear;
While circling Time moves round in an eternal sphere
Compar’d with this, how poor Religion’s pride,
In all the pomp of method, and of art;
When men display to congregations wide
Devotion’s ev’ry grace, except the heart!
The Power, incens’d, the pageant will desert,
The pompous strain, the sacerdotal stole;
But haply, in some cottage far apart,
May hear, well-pleas’d, the language of the soul;
And in His Book of Life the inmates poor enroll.
Then homeward all take off their sev’ral way;
The youngling cottagers retire to rest:
The parent-pair their secret homage pay,
And proffer up to Heaven the warm request,
That he who stills the raven’s clam’rous nest,
And decks the lily fair in flow’ry pride,
Would, in the way His wisdom sees the best,
For them and for their little ones provide;
But chiefly, in their hearts with grace divine preside.
From scenes like these, old Scotia’s grandeur springs,
That makes her lov’d at home, rever’d abroad:
Princes and lords are but the breath of kings,
“An honest man’s the noblest work of God;”
And certes, in fair virtue’s heavenly road,
The cottage leaves the palace far behind;
What is a lordling’s pomp? a cumbrous load,
Disguising oft the wretch of human kind,
Studied in arts of hell, in wickedness refin’d!
O Scotia! my dear, my native soil!
For whom my warmest wish to Heaven is sent,
Long may thy hardy sons of rustic toil
Be blest with health, and peace, and sweet content!
And O! may Heaven their simple lives prevent
From luxury’s contagion, weak and vile!
Then howe’er crowns and coronets be rent,
A virtuous populace may rise the while,
And stand a wall of fire around their much-lov’d isle.
O Thou! who pour’d the patriotic tide,
That stream’d thro’ Wallace’s undaunted heart,
Who dar’d to nobly stem tyrannic pride,
Or nobly die, the second glorious part:
(The patriot’s God peculiarly thou art,
His friend, inspirer, guardian, and reward!)
O never, never Scotia’s realm desert;
But still the patriot, and the patriot-bard
In bright succession raise, her ornament and guard!
Note 1. Pope’s “Windsor Forest.”—R. B. [back]
|
Written by
Robert Burns |
WHEN Guilford good our pilot stood
An’ did our hellim thraw, man,
Ae night, at tea, began a plea,
Within America, man:
Then up they gat the maskin-pat,
And in the sea did jaw, man;
An’ did nae less, in full congress,
Than quite refuse our law, man.
Then thro’ the lakes Montgomery takes,
I wat he was na slaw, man;
Down Lowrie’s Burn he took a turn,
And Carleton did ca’, man:
But yet, whatreck, he, at Quebec,
Montgomery-like did fa’, man,
Wi’ sword in hand, before his band,
Amang his en’mies a’, man.
Poor Tammy Gage within a cage
Was kept at Boston-ha’, man;
Till Willie Howe took o’er the knowe
For Philadelphia, man;
Wi’ sword an’ gun he thought a sin
Guid Christian bluid to draw, man;
But at New York, wi’ knife an’ fork,
Sir-Loin he hacked sma’, man.
Burgoyne gaed up, like spur an’ whip,
Till Fraser brave did fa’, man;
Then lost his way, ae misty day,
In Saratoga shaw, man.
Cornwallis fought as lang’s he dought,
An’ did the Buckskins claw, man;
But Clinton’s glaive frae rust to save,
He hung it to the wa’, man.
Then Montague, an’ Guilford too,
Began to fear, a fa’, man;
And Sackville dour, wha stood the stour,
The German chief to thraw, man:
For Paddy Burke, like ony Turk,
Nae mercy had at a’, man;
An’ Charlie Fox threw by the box,
An’ lows’d his tinkler jaw, man.
Then Rockingham took up the game,
Till death did on him ca’, man;
When Shelburne meek held up his cheek,
Conform to gospel law, man:
Saint Stephen’s boys, wi’ jarring noise,
They did his measures thraw, man;
For North an’ Fox united stocks,
An’ bore him to the wa’, man.
Then clubs an’ hearts were Charlie’s cartes,
He swept the stakes awa’, man,
Till the diamond’s ace, of Indian race,
Led him a sair faux pas, man:
The Saxon lads, wi’ loud placads,
On Chatham’s boy did ca’, man;
An’ Scotland drew her pipe an’ blew,
“Up, Willie, waur them a’, man!”
Behind the throne then Granville’s gone,
A secret word or twa, man;
While slee Dundas arous’d the class
Be-north the Roman wa’, man:
An’ Chatham’s wraith, in heav’nly graith,
(Inspired bardies saw, man),
Wi’ kindling eyes, cry’d, “Willie, rise!
Would I hae fear’d them a’, man?”
But, word an’ blow, North, Fox, and Co.
Gowff’d Willie like a ba’, man;
Till Suthron raise, an’ coost their claise
Behind him in a raw, man:
An’ Caledon threw by the drone,
An’ did her whittle draw, man;
An’ swoor fu’ rude, thro’ dirt an’ bluid,
To mak it guid in law, man.
|
Written by
Robert Burns |
EXPECT na, sir, in this narration,
A fleechin, fleth’rin Dedication,
To roose you up, an’ ca’ you guid,
An’ sprung o’ great an’ noble bluid,
Because ye’re surnam’d like His Grace—
Perhaps related to the race:
Then, when I’m tir’d-and sae are ye,
Wi’ mony a fulsome, sinfu’ lie,
Set up a face how I stop short,
For fear your modesty be hurt.
This may do—maun do, sir, wi’ them wha
Maun please the great folk for a wamefou;
For me! sae laigh I need na bow,
For, Lord be thankit, I can plough;
And when I downa yoke a naig,
Then, Lord be thankit, I can beg;
Sae I shall say—an’ that’s nae flatt’rin—
It’s just sic Poet an’ sic Patron.
The Poet, some guid angel help him,
Or else, I fear, some ill ane skelp him!
He may do weel for a’ he’s done yet,
But only—he’s no just begun yet.
The Patron (sir, ye maun forgie me;
I winna lie, come what will o’ me),
On ev’ry hand it will allow’d be,
He’s just—nae better than he should be.
I readily and freely grant,
He downa see a poor man want;
What’s no his ain, he winna tak it;
What ance he says, he winna break it;
Ought he can lend he’ll no refus’t,
Till aft his guidness is abus’d;
And rascals whiles that do him wrang,
Ev’n that, he does na mind it lang;
As master, landlord, husband, father,
He does na fail his part in either.
But then, nae thanks to him for a’that;
Nae godly symptom ye can ca’ that;
It’s naething but a milder feature
Of our poor, sinfu’ corrupt nature:
Ye’ll get the best o’ moral works,
’Mang black Gentoos, and pagan Turks,
Or hunters wild on Ponotaxi,
Wha never heard of orthodoxy.
That he’s the poor man’s friend in need,
The gentleman in word and deed,
It’s no thro’ terror of damnation;
It’s just a carnal inclination.
Morality, thou deadly bane,
Thy tens o’ thousands thou hast slain!
Vain is his hope, whase stay an’ trust is
In moral mercy, truth, and justice!
No—stretch a point to catch a plack:
Abuse a brother to his back;
Steal through the winnock frae a whore,
But point the rake that taks the door;
Be to the poor like ony whunstane,
And haud their noses to the grunstane;
Ply ev’ry art o’ legal thieving;
No matter—stick to sound believing.
Learn three-mile pray’rs, an’ half-mile graces,
Wi’ weel-spread looves, an’ lang, wry faces;
Grunt up a solemn, lengthen’d groan,
And damn a’ parties but your own;
I’ll warrant they ye’re nae deceiver,
A steady, sturdy, staunch believer.
O ye wha leave the springs o’ Calvin,
For gumlie dubs of your ain delvin!
Ye sons of Heresy and Error,
Ye’ll some day squeel in quaking terror,
When Vengeance draws the sword in wrath.
And in the fire throws the sheath;
When Ruin, with his sweeping besom,
Just frets till Heav’n commission gies him;
While o’er the harp pale Misery moans,
And strikes the ever-deep’ning tones,
Still louder shrieks, and heavier groans!
Your pardon, sir, for this digression:
I maist forgat my Dedication;
But when divinity comes ’cross me,
My readers still are sure to lose me.
So, sir, you see ’twas nae daft vapour;
But I maturely thought it proper,
When a’ my works I did review,
To dedicate them, sir, to you:
Because (ye need na tak it ill),
I thought them something like yoursel’.
Then patronize them wi’ your favor,
And your petitioner shall ever——
I had amaist said, ever pray,
But that’s a word I need na say;
For prayin, I hae little skill o’t,
I’m baith dead-sweer, an’ wretched ill o’t;
But I’se repeat each poor man’s pray’r,
That kens or hears about you, sir.——
“May ne’er Misfortune’s gowling bark,
Howl thro’ the dwelling o’ the clerk!
May ne’er his genrous, honest heart,
For that same gen’rous spirit smart!
May Kennedy’s far-honour’d name
Lang beet his hymeneal flame,
Till Hamiltons, at least a dizzen,
Are frae their nuptial labours risen:
Five bonie lasses round their table,
And sev’n braw fellows, stout an’ able,
To serve their king an’ country weel,
By word, or pen, or pointed steel!
May health and peace, with mutual rays,
Shine on the ev’ning o’ his days;
Till his wee, curlie John’s ier-oe,
When ebbing life nae mair shall flow,
The last, sad, mournful rites bestow!”
I will not wind a lang conclusion,
With complimentary effusion;
But, whilst your wishes and endeavours
Are blest with Fortune’s smiles and favours,
I am, dear sir, with zeal most fervent,
Your much indebted, humble servant.
But if (which Pow’rs above prevent)
That iron-hearted carl, Want,
Attended, in his grim advances,
By sad mistakes, and black mischances,
While hopes, and joys, and pleasures fly him,
Make you as poor a dog as I am,
Your humble servant then no more;
For who would humbly serve the poor?
But, by a poor man’s hopes in Heav’n!
While recollection’s pow’r is giv’n—
If, in the vale of humble life,
The victim sad of fortune’s strife,
I, thro’ the tender-gushing tear,
Should recognise my master dear;
If friendless, low, we meet together,
Then, sir, your hand—my Friend and Brother!
|
Written by
Robert Burns |
’TWAS 1 in that place o’ Scotland’s isle,
That bears the name o’ auld King Coil,
Upon a bonie day in June,
When wearin’ thro’ the afternoon,
Twa dogs, that were na thrang at hame,
Forgather’d ance upon a time.
The first I’ll name, they ca’d him Caesar,
Was keepit for His Honor’s pleasure:
His hair, his size, his mouth, his lugs,
Shew’d he was nane o’ Scotland’s dogs;
But whalpit some place far abroad,
Whare sailors gang to fish for cod.
His locked, letter’d, braw brass collar
Shew’d him the gentleman an’ scholar;
But though he was o’ high degree,
The fient a pride, nae pride had he;
But wad hae spent an hour caressin,
Ev’n wi’ al tinkler-gipsy’s messin:
At kirk or market, mill or smiddie,
Nae tawted tyke, tho’ e’er sae duddie,
But he wad stan’t, as glad to see him,
An’ stroan’t on stanes an’ hillocks wi’ him.
The tither was a ploughman’s collie—
A rhyming, ranting, raving billie,
Wha for his friend an’ comrade had him,
And in freak had Luath ca’d him,
After some dog in Highland Sang, 2
Was made lang syne,—Lord knows how lang.
He was a gash an’ faithfu’ tyke,
As ever lap a sheugh or dyke.
His honest, sonsie, baws’nt face
Aye gat him friends in ilka place;
His breast was white, his touzie back
Weel clad wi’ coat o’ glossy black;
His gawsie tail, wi’ upward curl,
Hung owre his hurdie’s wi’ a swirl.
Nae doubt but they were fain o’ ither,
And unco pack an’ thick thegither;
Wi’ social nose whiles snuff’d an’ snowkit;
Whiles mice an’ moudieworts they howkit;
Whiles scour’d awa’ in lang excursion,
An’ worry’d ither in diversion;
Until wi’ daffin’ weary grown
Upon a knowe they set them down.
An’ there began a lang digression.
About the “lords o’ the creation.”
CÆSAR I’ve aften wonder’d, honest Luath,
What sort o’ life poor dogs like you have;
An’ when the gentry’s life I saw,
What way poor bodies liv’d ava.
Our laird gets in his racked rents,
His coals, his kane, an’ a’ his stents:
He rises when he likes himsel’;
His flunkies answer at the bell;
He ca’s his coach; he ca’s his horse;
He draws a bonie silken purse,
As lang’s my tail, where, thro’ the steeks,
The yellow letter’d Geordie keeks.
Frae morn to e’en, it’s nought but toiling
At baking, roasting, frying, boiling;
An’ tho’ the gentry first are stechin,
Yet ev’n the ha’ folk fill their pechan
Wi’ sauce, ragouts, an’ sic like trashtrie,
That’s little short o’ downright wastrie.
Our whipper-in, wee, blasted wonner,
Poor, worthless elf, it eats a dinner,
Better than ony tenant-man
His Honour has in a’ the lan’:
An’ what poor cot-folk pit their painch in,
I own it’s past my comprehension.
LUATH Trowth, C&æsar, whiles they’re fash’t eneugh:
A cottar howkin in a sheugh,
Wi’ dirty stanes biggin a dyke,
Baring a quarry, an’ sic like;
Himsel’, a wife, he thus sustains,
A smytrie o’ wee duddie weans,
An’ nought but his han’-daurk, to keep
Them right an’ tight in thack an’ rape.
An’ when they meet wi’ sair disasters,
Like loss o’ health or want o’ masters,
Ye maist wad think, a wee touch langer,
An’ they maun starve o’ cauld an’ hunger:
But how it comes, I never kent yet,
They’re maistly wonderfu’ contented;
An’ buirdly chiels, an’ clever hizzies,
Are bred in sic a way as this is.
CÆSAR But then to see how ye’re negleckit,
How huff’d, an’ cuff’d, an’ disrespeckit!
Lord man, our gentry care as little
For delvers, ditchers, an’ sic cattle;
They gang as saucy by poor folk,
As I wad by a stinkin brock.
I’ve notic’d, on our laird’s court-day,—
An’ mony a time my heart’s been wae,—
Poor tenant bodies, scant o’cash,
How they maun thole a factor’s snash;
He’ll stamp an’ threaten, curse an’ swear
He’ll apprehend them, poind their gear;
While they maun stan’, wi’ aspect humble,
An’ hear it a’, an’ fear an’ tremble!
I see how folk live that hae riches;
But surely poor-folk maun be wretches!
LUATH They’re no sae wretched’s ane wad think.
Tho’ constantly on poortith’s brink,
They’re sae accustom’d wi’ the sight,
The view o’t gives them little fright.
Then chance and fortune are sae guided,
They’re aye in less or mair provided:
An’ tho’ fatigued wi’ close employment,
A blink o’ rest’s a sweet enjoyment.
The dearest comfort o’ their lives,
Their grushie weans an’ faithfu’ wives;
The prattling things are just their pride,
That sweetens a’ their fire-side.
An’ whiles twalpennie worth o’ nappy
Can mak the bodies unco happy:
They lay aside their private cares,
To mind the Kirk and State affairs;
They’ll talk o’ patronage an’ priests,
Wi’ kindling fury i’ their breasts,
Or tell what new taxation’s comin,
An’ ferlie at the folk in Lon’on.
As bleak-fac’d Hallowmass returns,
They get the jovial, rantin kirns,
When rural life, of ev’ry station,
Unite in common recreation;
Love blinks, Wit slaps, an’ social Mirth
Forgets there’s Care upo’ the earth.
That merry day the year begins,
They bar the door on frosty win’s;
The nappy reeks wi’ mantling ream,
An’ sheds a heart-inspiring steam;
The luntin pipe, an’ sneeshin mill,
Are handed round wi’ right guid will;
The cantie auld folks crackin crouse,
The young anes rantin thro’ the house—
My heart has been sae fain to see them,
That I for joy hae barkit wi’ them.
Still it’s owre true that ye hae said,
Sic game is now owre aften play’d;
There’s mony a creditable stock
O’ decent, honest, fawsont folk,
Are riven out baith root an’ branch,
Some rascal’s pridefu’ greed to quench,
Wha thinks to knit himsel the faster
In favour wi’ some gentle master,
Wha, aiblins, thrang a parliamentin,
For Britain’s guid his saul indentin—
CÆSAR Haith, lad, ye little ken about it:
For Britain’s guid! guid faith! I doubt it.
Say rather, gaun as Premiers lead him:
An’ saying ay or no’s they bid him:
At operas an’ plays parading,
Mortgaging, gambling, masquerading:
Or maybe, in a frolic daft,
To Hague or Calais takes a waft,
To mak a tour an’ tak a whirl,
To learn bon ton, an’ see the worl’.
There, at Vienna, or Versailles,
He rives his father’s auld entails;
Or by Madrid he takes the rout,
To thrum guitars an’ fecht wi’ nowt;
Or down Italian vista startles,
Wh-re-hunting amang groves o’ myrtles:
Then bowses drumlie German-water,
To mak himsel look fair an’ fatter,
An’ clear the consequential sorrows,
Love-gifts of Carnival signoras.
For Britain’s guid! for her destruction!
Wi’ dissipation, feud, an’ faction.
LUATH Hech, man! dear sirs! is that the gate
They waste sae mony a braw estate!
Are we sae foughten an’ harass’d
For gear to gang that gate at last?
O would they stay aback frae courts,
An’ please themsels wi’ country sports,
It wad for ev’ry ane be better,
The laird, the tenant, an’ the cotter!
For thae frank, rantin, ramblin billies,
Feint haet o’ them’s ill-hearted fellows;
Except for breakin o’ their timmer,
Or speakin lightly o’ their limmer,
Or shootin of a hare or moor-cock,
The ne’er-a-bit they’re ill to poor folk,
But will ye tell me, Master C&æsar,
Sure great folk’s life’s a life o’ pleasure?
Nae cauld nor hunger e’er can steer them,
The very thought o’t need na fear them.
CÆSAR L—d, man, were ye but whiles whare I am,
The gentles, ye wad ne’er envy them!
It’s true, they need na starve or sweat,
Thro’ winter’s cauld, or simmer’s heat:
They’ve nae sair wark to craze their banes,
An’ fill auld age wi’ grips an’ granes:
But human bodies are sic fools,
For a’ their colleges an’ schools,
That when nae real ills perplex them,
They mak enow themsel’s to vex them;
An’ aye the less they hae to sturt them,
In like proportion, less will hurt them.
A country fellow at the pleugh,
His acre’s till’d, he’s right eneugh;
A country girl at her wheel,
Her dizzen’s dune, she’s unco weel;
But gentlemen, an’ ladies warst,
Wi’ ev’n-down want o’ wark are curst.
They loiter, lounging, lank an’ lazy;
Tho’ deil-haet ails them, yet uneasy;
Their days insipid, dull, an’ tasteless;
Their nights unquiet, lang, an’ restless.
An’ev’n their sports, their balls an’ races,
Their galloping through public places,
There’s sic parade, sic pomp, an’ art,
The joy can scarcely reach the heart.
The men cast out in party-matches,
Then sowther a’ in deep debauches.
Ae night they’re mad wi’ drink an’ whoring,
Niest day their life is past enduring.
The ladies arm-in-arm in clusters,
As great an’ gracious a’ as sisters;
But hear their absent thoughts o’ ither,
They’re a’ run-deils an’ jads thegither.
Whiles, owre the wee bit cup an’ platie,
They sip the scandal-potion pretty;
Or lee-lang nights, wi’ crabbit leuks
Pore owre the devil’s pictur’d beuks;
Stake on a chance a farmer’s stackyard,
An’ cheat like ony unhanged blackguard.
There’s some exceptions, man an’ woman;
But this is gentry’s life in common.
By this, the sun was out of sight,
An’ darker gloamin brought the night;
The bum-clock humm’d wi’ lazy drone;
The kye stood rowtin i’ the loan;
When up they gat an’ shook their lugs,
Rejoic’d they werena men but dogs;
An’ each took aff his several way,
Resolv’d to meet some ither day.
Note 1. Luath was Burns’ own dog. [back]
Note 2. Cuchullin’s dog in Ossian’s “Fingal.”—R. B. [back]
|
Written by
Robert Burns |
A Tale
"Of Brownyis and of Bogilis full is this Buke."
—Gawin Douglas.
When chapman billies leave the street,
And drouthy neebors neebors meet,
As market-days are wearing late,
An' folk begin to tak' the gate;
While we sit bousing at the nappy,
An' getting fou and unco happy,
We think na on the lang Scots miles,
The mosses, waters, slaps, and stiles,
That lie between us and our hame,
Whare sits our sulky, sullen dame,
Gathering her brows like gathering storm,
Nursing her wrath to keep it warm.
This truth fand honest Tam o'Shanter,
As he frae Ayr ae night did canter,
(Auld Ayr, wham ne'er a town surpasses,
For honest men and bonie lasses).
O Tam! hadst thou but been sae wise,
As ta'en thy ain wife Kate's advice!
She tauld thee weel thou was a skellum,
A blethering, blustering, drunken blellum,
That frae November till October,
Ae market-day thou was nae sober;
That ilka melder, wi' the miller,
Thou sat as lang as thou had siller;
That ev'ry naig was ca'd a shoe on,
The smith and thee gat roarin fou on;
That at the Lord's house, ev'n on Sunday,
Thou drank wi' Kirkton Jean till Monday.
She prophesied that, late or soon,
Thou would be found deep drowned in Doon;
Or catched wi' warlocks in the mirk,
By Alloway's auld haunted kirk.
Ah, gentle dames! it gars me greet,
To think how mony counsels sweet,
How mony lengthened sage advices,
The husband frae the wife despises!
But to our tale: Ae market-night,
Tam had got planted unco right;
Fast by an ingle, bleezing finely,
Wi' reaming swats, that drank divinely;
And at his elbow, Souter Johnny,
His ancient, trusty, drouthy crony;
Tam lo'ed him like a vera brither;
They had been fou for weeks thegither.
The night drave on wi' sangs an' clatter;
And aye the ale was growing better:
The landlady and Tam grew gracious,
Wi' favours, secret, sweet, and precious:
The Souter tauld his queerest stories;
The landlord's laugh was ready chorus:
The storm without might rair and rustle,
Tam did na mind the storm a whistle.
Care, mad to see a man sae happy,
E'en drowned himself amang the nappy;
As bees flee hame wi' lades o' treasure,
The minutes winged their way wi' pleasure:
Kings may be blest, but Tam was glorious,
O'er a' the ills o' life victorious!
But pleasures are like poppies spread,
You seize the flow'r, its bloom is shed;
Or like the snow falls in the river,
A moment white—then melts for ever;
Or like the borealis race,
That flit ere you can point their place;
Or like the rainbow's lovely form
Evanishing amid the storm.—
Nae man can tether time or tide;
The hour approaches Tam maun ride;
That hour, o' night's black arch the key-stane,
That dreary hour he mounts his beast in;
And sic a night he tak's the road in,
As ne'er poor sinner was abroad in.
The wind blew as 'twad blawn its last;
The rattling showers rose on the blast;
The speedy gleams the darkness swallowed;
Loud, deep, and lang the thunder bellowed:
That night, a child might understand,
The De'il had business on his hand.
Weel mounted on his grey mare, Meg,
A better never lifted leg,
Tam skelpit on thro' dub and mire,
Despising wind, and rain, and fire;
Whiles holding fast his gude blue bonnet;
Whiles crooning o'er some auld Scots sonnet;
Whiles glow'rin round wi' prudent cares,
Lest bogles catch him unawares;
Kirk-Alloway was drawing nigh,
Whare ghaists and houlets nightly cry.
By this time he was cross the ford,
Whare in the snaw the chapman smoored;
And past the birks and meikle stane,
Whare drunken Charlie brak's neck-bane;
And thro' the whins, and by the cairn,
Whare hunters fand the murdered bairn;
And near the thorn, aboon the well,
Whare Mungo's mither hanged hersel'.
Before him Doon pours all his floods;
The doubling storm roars thro' the woods;
The lightnings flash from pole to pole;
Near and more near the thunders roll;
When, glimmering thro' the groaning trees,
Kirk-Alloway seemed in a bleeze;
Thro' ilka bore the beams were glancing;
And loud resounded mirth and dancing.
Inspiring bold John Barleycorn!
What dangers thou canst mak' us scorn!
Wi' tippenny, we fear nae evil;
Wi' usquabae, we'll face the devil!
The swats sae reamed in Tammie's noddle,
Fair play, he cared na deils a boddle.
But Maggie stood right sair astonished,
Till, by the heel and hand admonished,
She ventured forward on the light;
And, wow! Tam saw an unco sight!
Warlocks and witches in a dance;
Nae cotillion, brent new frae France,
But hornpipes, jigs, strathspeys, and reels,
Put life and mettle in their heels.
A winnock-bunker in the east,
There sat auld Nick, in shape o' beast;
A towzie tyke, black, grim, and large,
To gie them music was his charge:
He screwed the pipes and gart them skirl,
Till roof and rafters a' did dirl.—
Coffins stood round, like open presses,
That shawed the Dead in their last dresses;
And by some devilish cantraip sleight
Each in its cauld hand held a light,
By which heroic Tam was able
To note upon the haly table,
A murderer's banes in gibbet-airns;
Twa span-lang, wee, unchristened bairns;
A thief, new-cutted frae a rape,
Wi' his last gasp his gab did gape;
Five tomahawks, wi' blude red-rusted;
Five scimitars, wi' murder crusted;
A garter, which a babe had strangled;
A knife, a father's throat had mangled,
Whom his ain son o' life bereft,
The grey hairs yet stack to the heft;
Wi' mair of horrible and awfu',
Which even to name wad be unlawfu'.
As Tammie glowered, amazed and curious,
The mirth and fun grew fast and furious:
The Piper loud and louder blew;
The dancers quick and quicker flew;
They reeled, they set, they crossed, they cleekit,
Till ilka carlin swat and reekit,
And coost her duddies to the wark,
And linket at it in her sark!
Now Tam, O Tam! had they been queans,
A' plump and strapping in their teens;
Their sarks, instead o' creeshie flainen,
Been snaw-white seventeen hunder linen!—
Thir breeks o' mine, my only pair,
That ance were plush, o' gude blue hair,
I wad hae gi'en them off my hurdies,
For ae blink o' the bonie burdies!
But withered beldams, auld and droll,
Rigwoodie hags wad spean a foal,
Lowping and flinging on a crummock,
I wonder didna turn thy stomach.
But Tam kenned what was what fu' brawlie:
`There was ae winsome wench and waulie',
That night enlisted in the core
(Lang after kenned on Carrick shore;
For mony a beast to dead she shot,
And perished mony a bonie boat,
And shook baith meikle corn and bear,
And kept the country-side in fear);
Her cutty sark, o' Paisley harn,
That while a lassie she had worn,
In longitude tho' sorely scanty,
It was her best, and she was vauntie.
Ah! little kenned thy reverend grannie,
That sark she coft for her wee Nannie,
Wi' twa pund Scots ('twas a' her riches),
Wad ever graced a dance of witches!
But here my Muse her wing maun cour,
Sic flights are far beyond her power;
To sing how Nannie lap and flang,
(A souple jade she was and strang),
And how Tam stood, like ane bewitched,
And thought his very een enriched;
Even Satan glowered, and fidged fu' fain,
And hotched and blew wi' might and main:
Till first ae caper, syne anither,
Tam tint his reason a' thegither,
And roars out, "Weel done, Cutty-sark!"
And in an instant all was dark:
And scarcely had he Maggie rallied,
When out the hellish legion sallied.
As bees bizz out wi' angry fyke,
When plundering herds assail their byke;
As open pussie's mortal foes,
When, pop! she starts before their nose;
As eager runs the market-crowd,
When "Catch the thief!" resounds aloud;
So Maggie runs, the witches follow,
Wi' mony an eldritch screech and hollow.
Ah, Tam! ah, Tam! thou'll get thy fairin!
In hell they'll roast thee like a herrin!
In vain thy Kate awaits thy comin!
Kate soon will be a woefu' woman!
Now, do thy speedy utmost, Meg,
And win the key-stane of the brig;
There at them thou thy tail may toss,
A running stream they dare na cross.
But ere the key-stane she could make,
The fient a tail she had to shake!
For Nannie, far before the rest,
Hard upon noble Maggie prest,
And flew at Tam wi' furious ettle;
But little wist she Maggie's mettle—
Ae spring brought off her master hale,
But left behind her ain grey tail:
The carlin claught her by the rump,
And left poor Maggie scarce a stump.
Now, wha this tale o' truth shall read,
Ilk man and mother's son, take heed:
Whene'er to drink you are inclined,
Or cutty-sarks run in your mind,
Think, ye may buy the joys o'er dear,
Remember Tam o'Shanter's mare.
|
Written by
Robert Burns |
LONG life, my Lord, an’ health be yours,
Unskaithed by hunger’d Highland boors;
Lord grant me nae duddie, desperate beggar,
Wi’ dirk, claymore, and rusty trigger,
May twin auld Scotland o’ a life
She likes—as butchers like a knife.
Faith you and Applecross were right
To keep the Highland hounds in sight:
I doubt na! they wad bid nae better,
Than let them ance out owre the water,
Then up among thae lakes and seas,
They’ll mak what rules and laws they please:
Some daring Hancocke, or a Franklin,
May set their Highland bluid a-ranklin;
Some Washington again may head them,
Or some Montgomery, fearless, lead them,
Till (God knows what may be effected
When by such heads and hearts directed),
Poor dunghill sons of dirt and mire
May to Patrician rights aspire!
Nae sage North now, nor sager Sackville,
To watch and premier o’er the pack vile,—
An’ whare will ye get Howes and Clintons
To bring them to a right repentance—
To cowe the rebel generation,
An’ save the honour o’ the nation?
They, an’ be d—d! what right hae they
To meat, or sleep, or light o’ day?
Far less—to riches, pow’r, or freedom,
But what your lordship likes to gie them?
But hear, my lord! Glengarry, hear!
Your hand’s owre light to them, I fear;
Your factors, grieves, trustees, and bailies,
I canna say but they do gaylies;
They lay aside a’ tender mercies,
An’ tirl the hallions to the birses;
Yet while they’re only poind’t and herriet,
They’ll keep their stubborn Highland spirit:
But smash them! crash them a’ to spails,
An’ rot the dyvors i’ the jails!
The young dogs, swinge them to the labour;
Let wark an’ hunger mak them sober!
The hizzies, if they’re aughtlins fawsont,
Let them in Drury-lane be lesson’d!
An’ if the wives an’ dirty brats
Come thiggin at your doors an’ yetts,
Flaffin wi’ duds, an’ grey wi’ beas’,
Frightin away your ducks an’ geese;
Get out a horsewhip or a jowler,
The langest thong, the fiercest growler,
An’ gar the tatter’d gypsies pack
Wi’ a’ their bastards on their back!
Go on, my Lord! I lang to meet you,
An’ in my house at hame to greet you;
Wi’ common lords ye shanna mingle,
The benmost neuk beside the ingle,
At my right han’ assigned your seat,
’Tween Herod’s hip an’ Polycrate:
Or (if you on your station tarrow),
Between Almagro and Pizarro,
A seat, I’m sure ye’re well deservin’t;
An’ till ye come—your humble servant,BEELZEBUB.June 1st, Anno Mundi 5790.
|
Written by
Robert Burns |
HERE’S to thy health, my bonie lass,
Gude nicht and joy be wi’ thee;
I’ll come nae mair to thy bower-door,
To tell thee that I lo’e thee.
O dinna think, my pretty pink,
But I can live without thee:
I vow and swear I dinna care,
How lang ye look about ye.
Thou’rt aye sae free informing me,
Thou hast nae mind to marry;
I’ll be as free informing thee,
Nae time hae I to tarry:
I ken thy frien’s try ilka means
Frae wedlock to delay thee;
Depending on some higher chance,
But fortune may betray thee.
I ken they scorn my low estate,
But that does never grieve me;
For I’m as free as any he;
Sma’ siller will relieve me.
I’ll count my health my greatest wealth,
Sae lang as I’ll enjoy it;
I’ll fear nae scant, I’ll bode nae want,
As lang’s I get employment.
But far off fowls hae feathers fair,
And, aye until ye try them,
Tho’ they seem fair, still have a care;
They may prove waur than I am.
But at twal’ at night, when the moon shines bright,
My dear, I’ll come and see thee;
For the man that loves his mistress weel,
Nae travel makes him weary.
|
Written by
Robert Burns |
O ONCE I lov’d a bonie lass,
Ay, and I love her still;
And whilst that virtue warms my breast,
I’ll love my handsome Nell.
As bonie lasses I hae seen,
And mony full as braw;
But, for a modest gracefu’ mein,
The like I never saw.
A bonie lass, I will confess,
Is pleasant to the e’e;
But, without some better qualities,
She’s no a lass for me.
But Nelly’s looks are blythe and sweet,
And what is best of a’,
Her reputation is complete,
And fair without a flaw.
She dresses aye sae clean and neat,
Both decent and genteel;
And then there’s something in her gait
Gars ony dress look weel.
A gaudy dress and gentle air
May slightly touch the heart;
But it’s innocence and modesty
That polishes the dart.
’Tis this in Nelly pleases me,
’Tis this enchants my soul;
For absolutely in my breast
She reigns without control.
Note 1. The first of my performances.—R. B. [back]
|