Written by
Robert Burns |
WHEN Guilford good our pilot stood
An’ did our hellim thraw, man,
Ae night, at tea, began a plea,
Within America, man:
Then up they gat the maskin-pat,
And in the sea did jaw, man;
An’ did nae less, in full congress,
Than quite refuse our law, man.
Then thro’ the lakes Montgomery takes,
I wat he was na slaw, man;
Down Lowrie’s Burn he took a turn,
And Carleton did ca’, man:
But yet, whatreck, he, at Quebec,
Montgomery-like did fa’, man,
Wi’ sword in hand, before his band,
Amang his en’mies a’, man.
Poor Tammy Gage within a cage
Was kept at Boston-ha’, man;
Till Willie Howe took o’er the knowe
For Philadelphia, man;
Wi’ sword an’ gun he thought a sin
Guid Christian bluid to draw, man;
But at New York, wi’ knife an’ fork,
Sir-Loin he hacked sma’, man.
Burgoyne gaed up, like spur an’ whip,
Till Fraser brave did fa’, man;
Then lost his way, ae misty day,
In Saratoga shaw, man.
Cornwallis fought as lang’s he dought,
An’ did the Buckskins claw, man;
But Clinton’s glaive frae rust to save,
He hung it to the wa’, man.
Then Montague, an’ Guilford too,
Began to fear, a fa’, man;
And Sackville dour, wha stood the stour,
The German chief to thraw, man:
For Paddy Burke, like ony Turk,
Nae mercy had at a’, man;
An’ Charlie Fox threw by the box,
An’ lows’d his tinkler jaw, man.
Then Rockingham took up the game,
Till death did on him ca’, man;
When Shelburne meek held up his cheek,
Conform to gospel law, man:
Saint Stephen’s boys, wi’ jarring noise,
They did his measures thraw, man;
For North an’ Fox united stocks,
An’ bore him to the wa’, man.
Then clubs an’ hearts were Charlie’s cartes,
He swept the stakes awa’, man,
Till the diamond’s ace, of Indian race,
Led him a sair faux pas, man:
The Saxon lads, wi’ loud placads,
On Chatham’s boy did ca’, man;
An’ Scotland drew her pipe an’ blew,
“Up, Willie, waur them a’, man!”
Behind the throne then Granville’s gone,
A secret word or twa, man;
While slee Dundas arous’d the class
Be-north the Roman wa’, man:
An’ Chatham’s wraith, in heav’nly graith,
(Inspired bardies saw, man),
Wi’ kindling eyes, cry’d, “Willie, rise!
Would I hae fear’d them a’, man?”
But, word an’ blow, North, Fox, and Co.
Gowff’d Willie like a ba’, man;
Till Suthron raise, an’ coost their claise
Behind him in a raw, man:
An’ Caledon threw by the drone,
An’ did her whittle draw, man;
An’ swoor fu’ rude, thro’ dirt an’ bluid,
To mak it guid in law, man.
|
Written by
Robert Burns |
“O CAM ye here the fight to shun,
Or herd the sheep wi’ me, man?
Or were ye at the Sherra-moor,
Or did the battle see, man?”
I saw the battle, sair and teugh,
And reekin-red ran mony a sheugh;
My heart, for fear, gaed sough for sough,
To hear the thuds, and see the cluds
O’ clans frae woods, in tartan duds,
Wha glaum’d at kingdoms three, man.
La, la, la, la, &c.
The red-coat lads, wi’ black cockauds,
To meet them were na slaw, man;
They rush’d and push’d, and blude outgush’d
And mony a bouk did fa’, man:
The great Argyle led on his files,
I wat they glanced twenty miles;
They hough’d the clans like nine-pin kyles,
They hack’d and hash’d, while braid-swords, clash’d,
And thro’ they dash’d, and hew’d and smash’d,
Till fey men died awa, man.
La, la, la, la, &c.
But had ye seen the philibegs,
And skyrin tartan trews, man;
When in the teeth they dar’d our Whigs,
And covenant True-blues, man:
In lines extended lang and large,
When baiginets o’erpower’d the targe,
And thousands hasten’d to the charge;
Wi’ Highland wrath they frae the sheath
Drew blades o’ death, till, out o’ breath,
They fled like frighted dows, man!
La, la, la, la, &c.
“O how deil, Tam, can that be true?
The chase gaed frae the north, man;
I saw mysel, they did pursue,
The horsemen back to Forth, man;
And at Dunblane, in my ain sight,
They took the brig wi’ a’ their might,
And straught to Stirling wing’d their flight;
But, cursed lot! the gates were shut;
And mony a huntit poor red-coat,
For fear amaist did swarf, man!”
La, la, la, la, &c.
My sister Kate cam up the gate
Wi’ crowdie unto me, man;
She swoor she saw some rebels run
To Perth unto Dundee, man;
Their left-hand general had nae skill;
The Angus lads had nae gude will
That day their neibors’ blude to spill;
For fear, for foes, that they should lose
Their cogs o’ brose; they scar’d at blows,
And hameward fast did flee, man.
La, la, la, la, &c.
They’ve lost some gallant gentlemen,
Amang the Highland clans, man!
I fear my Lord Panmure is slain,
Or fallen in Whiggish hands, man,
Now wad ye sing this double fight,
Some fell for wrang, and some for right;
But mony bade the world gude-night;
Say, pell and mell, wi’ muskets’ knell
How Tories fell, and Whigs to hell
Flew off in frighted bands, man!
La, la, la, la, &c.
|