Written by
Robert Burns |
I GAT your letter, winsome Willie;
Wi’ gratefu’ heart I thank you brawlie;
Tho’ I maun say’t, I wad be silly,
And unco vain,
Should I believe, my coaxin billie
Your flatterin strain.
But I’se believe ye kindly meant it:
I sud be laith to think ye hinted
Ironic satire, sidelins sklented
On my poor Musie;
Tho’ in sic phraisin terms ye’ve penn’d it,
I scarce excuse ye.
My senses wad be in a creel,
Should I but dare a hope to speel
Wi’ Allan, or wi’ Gilbertfield,
The braes o’ fame;
Or Fergusson, the writer-chiel,
A deathless name.
(O Fergusson! thy glorious parts
Ill suited law’s dry, musty arts!
My curse upon your whunstane hearts,
Ye E’nbrugh gentry!
The tithe o’ what ye waste at cartes
Wad stow’d his pantry!)
Yet when a tale comes i’ my head,
Or lassies gie my heart a screed—
As whiles they’re like to be my dead,
(O sad disease!)
I kittle up my rustic reed;
It gies me ease.
Auld Coila now may fidge fu’ fain,
She’s gotten poets o’ her ain;
Chiels wha their chanters winna hain,
But tune their lays,
Till echoes a’ resound again
Her weel-sung praise.
Nae poet thought her worth his while,
To set her name in measur’d style;
She lay like some unkenn’d-of-isle
Beside New Holland,
Or whare wild-meeting oceans boil
Besouth Magellan.
Ramsay an’ famous Fergusson
Gied Forth an’ Tay a lift aboon;
Yarrow an’ Tweed, to monie a tune,
Owre Scotland rings;
While Irwin, Lugar, Ayr, an’ Doon
Naebody sings.
Th’ Illissus, Tiber, Thames, an’ Seine,
Glide sweet in monie a tunefu’ line:
But Willie, set your fit to mine,
An’ cock your crest;
We’ll gar our streams an’ burnies shine
Up wi’ the best!
We’ll sing auld Coila’s plains an’ fells,
Her moors red-brown wi’ heather bells,
Her banks an’ braes, her dens and dells,
Whare glorious Wallace
Aft bure the gree, as story tells,
Frae Suthron billies.
At Wallace’ name, what Scottish blood
But boils up in a spring-tide flood!
Oft have our fearless fathers strode
By Wallace’ side,
Still pressing onward, red-wat-shod,
Or glorious died!
O, sweet are Coila’s haughs an’ woods,
When lintwhites chant amang the buds,
And jinkin hares, in amorous whids,
Their loves enjoy;
While thro’ the braes the cushat croods
With wailfu’ cry!
Ev’n winter bleak has charms to me,
When winds rave thro’ the naked tree;
Or frosts on hills of Ochiltree
Are hoary gray;
Or blinding drifts wild-furious flee,
Dark’ning the day!
O Nature! a’ thy shews an’ forms
To feeling, pensive hearts hae charms!
Whether the summer kindly warms,
Wi’ life an light;
Or winter howls, in gusty storms,
The lang, dark night!
The muse, nae poet ever fand her,
Till by himsel he learn’d to wander,
Adown some trottin burn’s meander,
An’ no think lang:
O sweet to stray, an’ pensive ponder
A heart-felt sang!
The war’ly race may drudge an’ drive,
Hog-shouther, jundie, stretch, an’ strive;
Let me fair Nature’s face descrive,
And I, wi’ pleasure,
Shall let the busy, grumbling hive
Bum owre their treasure.
Fareweel, “my rhyme-composing” brither!
We’ve been owre lang unkenn’d to ither:
Now let us lay our heads thegither,
In love fraternal:
May envy wallop in a tether,
Black fiend, infernal!
While Highlandmen hate tools an’ taxes;
While moorlan’s herds like guid, fat braxies;
While terra firma, on her axis,
Diurnal turns;
Count on a friend, in faith an’ practice,
In Robert Burns.
POSTCRIPTMY memory’s no worth a preen;
I had amaist forgotten clean,
Ye bade me write you what they mean
By this “new-light,”
’Bout which our herds sae aft hae been
Maist like to fight.
In days when mankind were but callans
At grammar, logic, an’ sic talents,
They took nae pains their speech to balance,
Or rules to gie;
But spak their thoughts in plain, braid lallans,
Like you or me.
In thae auld times, they thought the moon,
Just like a sark, or pair o’ shoon,
Wore by degrees, till her last roon
Gaed past their viewin;
An’ shortly after she was done
They gat a new ane.
This passed for certain, undisputed;
It ne’er cam i’ their heads to doubt it,
Till chiels gat up an’ wad confute it,
An’ ca’d it wrang;
An’ muckle din there was about it,
Baith loud an’ lang.
Some herds, weel learn’d upo’ the beuk,
Wad threap auld folk the thing misteuk;
For ’twas the auld moon turn’d a neuk
An’ out of’ sight,
An’ backlins-comin to the leuk
She grew mair bright.
This was deny’d, it was affirm’d;
The herds and hissels were alarm’d
The rev’rend gray-beards rav’d an’ storm’d,
That beardless laddies
Should think they better wer inform’d,
Than their auld daddies.
Frae less to mair, it gaed to sticks;
Frae words an’ aiths to clours an’ nicks;
An monie a fallow gat his licks,
Wi’ hearty crunt;
An’ some, to learn them for their tricks,
Were hang’d an’ brunt.
This game was play’d in mony lands,
An’ auld-light caddies bure sic hands,
That faith, the youngsters took the sands
Wi’ nimble shanks;
Till lairds forbad, by strict commands,
Sic bluidy pranks.
But new-light herds gat sic a cowe,
Folk thought them ruin’d stick-an-stowe;
Till now, amaist on ev’ry knowe
Ye’ll find ane plac’d;
An’ some their new-light fair avow,
Just quite barefac’d.
Nae doubt the auld-light flocks are bleatin;
Their zealous herds are vex’d an’ sweatin;
Mysel’, I’ve even seen them greetin
Wi’ girnin spite,
To hear the moon sae sadly lied on
By word an’ write.
But shortly they will cowe the louns!
Some auld-light herds in neebor touns
Are mind’t, in things they ca’ balloons,
To tak a flight;
An’ stay ae month amang the moons
An’ see them right.
Guid observation they will gie them;
An’ when the auld moon’s gaun to lea’e them,
The hindmaist shaird, they’ll fetch it wi’ them
Just i’ their pouch;
An’ when the new-light billies see them,
I think they’ll crouch!
Sae, ye observe that a’ this clatter
Is naething but a “moonshine matter”;
But tho’ dull prose-folk Latin splatter
In logic tulyie,
I hope we bardies ken some better
Than mind sic brulyie.
|
Written by
Robert William Service |
You may talk o' your lutes and your dulcimers fine,
Your harps and your tabors and cymbals and a',
But here in the trenches jist gie me for mine
The wee penny whistle o' Sandy McGraw.
Oh, it's: "Sandy, ma lad, will you lilt us a tune?"
And Sandy is willin' and trillin' like mad;
Sae silvery sweet that we a' throng aroun',
And some o' it's gay, but the maist o' it's sad.
Jist the wee simple airs that sink intae your hert,
And grup ye wi' love and wi' longin' for hame;
And ye glour like an owl till you're feelin' the stert
O' a tear, and you blink wi' a feelin' o' shame.
For his song's o' the heather, and here in the dirt
You listen and dream o' a land that's sae braw,
And he mak's you forget a' the harm and the hurt,
For he pipes like a laverock, does Sandy McGraw.
* * * * *
At Eepers I mind me when rank upon rank
We rose from the trenches and swept like the gale,
Till the rapid-fire guns got us fell on the flank
And the murderin' bullets came swishin' like hail:
Till a' that were left o' us faltered and broke;
Till it seemed for a moment a panicky rout,
When shrill through the fume and the flash and the smoke
The wee valiant voice o' a whistle piped out.
`The Campbells are Comin'': Then into the fray
We bounded wi' bayonets reekin' and raw,
And oh we fair revelled in glory that day,
Jist thanks to the whistle o' Sandy McGraw.
* * * * *
At Loose, it wis after a sconnersome fecht,
On the field o' the slain I wis crawlin' aboot;
And the rockets were burnin' red holes in the nicht;
And the guns they were veciously thunderin' oot;
When sudden I heard a bit sound like a sigh,
And there in a crump-hole a kiltie I saw:
"Whit ails ye, ma lad? Are ye woundit?" says I.
"I've lost ma wee whustle," says Sandy McGraw.
"'Twas oot by yon bing where we pressed the attack,
It drapped frae ma pooch, and between noo and dawn
There isna much time so I'm jist crawlin' back. . . ."
"Ye're daft, man!" I telt him, but Sandy wis gone.
Weel, I waited a wee, then I crawled oot masel,
And the big stuff wis gorin' and roarin' around,
And I seemed tae be under the oxter o' hell,
And Creation wis crackin' tae bits by the sound.
And I says in ma mind: "Gang ye back, ye auld fule!"
When I thrilled tae a note that wis saucy and sma';
And there in a crater, collected and cool,
Wi' his wee penny whistle wis Sandy McGraw.
Ay, there he wis playin' as gleg as could be,
And listenin' hard wis a spectacled Boche;
Then Sandy turned roon' and he noddit tae me,
And he says: "Dinna blab on me, Sergeant McTosh.
The auld chap is deein'. He likes me tae play.
It's makin' him happy. Jist see his een shine!"
And thrillin' and sweet in the hert o' the fray
Wee Sandy wis playin' The Watch on the Rhine.
* * * * *
The last scene o' a' -- 'twas the day that we took
That bit o' black ruin they ca' Labbiesell.
It seemed the hale hillside jist shivered and shook,
And the red skies were roarin' and spewin' oot shell.
And the Sergeants were cursin' tae keep us in hand,
And hard on the leash we were strainin' like dugs,
When upward we shot at the word o' command,
And the bullets were dingin' their songs in oor lugs.
And onward we swept wi' a yell and a cheer,
And a' wis destruction, confusion and din,
And we knew that the trench o' the Boches wis near,
And it seemed jist the safest bit hole tae be in.
So we a' tumbled doon, and the Boches were there,
And they held up their hands, and they yelled: "Kamarad!"
And I merched aff wi' ten, wi' their palms in the air,
And my! I wis prood-like, and my! I wis glad.
And I thocht: if ma lassie could see me jist then. . . .
When sudden I sobered at somethin' I saw,
And I stopped and I stared, and I halted ma men,
For there on a stretcher wis Sandy McGraw.
Weel, he looks in ma face, jist as game as ye please:
"Ye ken hoo I hate tae be workin'," says he;
"But noo I can play in the street for bawbees,
Wi' baith o' ma legs taken aff at the knee."
And though I could see he wis rackit wi' pain,
He reached for his whistle and stertit tae play;
And quaverin' sweet wis the pensive refrain:
The floors o' the forest are a' wede away.
Then sudden he stoppit: "Man, wis it no grand
Hoo we took a' them trenches?" . . . He shakit his heid:
"I'll -- no -- play -- nae -- mair ----" feebly doon frae his hand
Slipped the wee penny whistle and -- Sandy wis deid.
* * * * *
And so you may talk o' your Steinways and Strads,
Your wonderful organs and brasses sae braw;
But oot in the trenches jist gie me, ma lads,
Yon wee penny whistle o' Sandy McGraw.
|
Written by
Robert William Service |
Says Bauldy MacGreegor frae Gleska tae Hecky MacCrimmon frae Skye:
"That's whit I hate maist aboot fechtin' -- it makes ye sae deevilish dry;
Noo jist hae a keek at yon ferm-hoose them Gairmans are poundin' sae fine,
Weel, think o' it, doon in the dunnie there's bottles and bottles o' wine.
A' hell's fairly belchin' oot yonner, but oh, lad, I'm ettlin' tae try. . . ."
"If it's poose she'll be with ye whateffer," says Hecky MacCrimmon frae Skye.~
Says Bauldy MacGreegor frae Gleska: "Whit price fur a funeral wreath?
We're dodgin' a' kinds o' destruction, an' jist by the skin o' oor teeth.
Here, spread yersel oot on yer belly, and slither along in the glaur;
Confoond ye, ye big Hielan' deevil! Ye don't realize there's a war.
Ye think that ye're back in Dunvegan, and herdin' the wee bits o' kye."
"She'll neffer trink wine in Dunfegan," says Hecky MacCrimmon frae Skye.~
Says Bauldy MacGreegor frae Gleska: "Thank goodness! the ferm-hoose at last;
There's no muckle left but the cellar, an' even that's vanishin' fast.
Look oot, there's the corpse o' a wumman, sair mangelt and deid by her lane.
Quick! Strike a match. . . . Whit did I tell ye! A hale bonny box o' shampane;
Jist knock the heid aff o' a bottle. . . . Haud on, mon, I'm hearing a cry. . . ."
"She'll think it's a wean that wass greetin'," says Hecky MacCrimmon frae Skye.~
Says Bauldy MacGreegor frae Gleska: quot;Ma conscience! I'm hanged but yer richt.
It's yin o' thae waifs of the war-field, a' sobbin' and shakin' wi' fricht.
Wheesht noo, dear, we're no gaun tae hurt ye. We're takin' ye hame, my wee doo!
We've got tae get back wi' her, Hecky. Whit mercy we didna get fou!
We'll no touch a drap o' that likker -- that's hard, man, ye canna deny. . . ."
"It's the last thing she'll think o' denyin'," says Hecky MacCrimmon frae Skye.
Says Bauldy MacGreegor frae Gleska: "If I should get struck frae the rear,
Ye'll tak' and ye'll shield the wee lassie, and rin for the lines like a deer.
God! Wis that the breenge o' a bullet? I'm thinkin' it's cracket ma spine.
I'm doon on ma knees in the glabber; I'm fearin', auld man, I've got mine.
Here, quick! Pit yer erms roon the lassie. Noo, rin, lad! good luck and good-by. . . .
"Hoots, mon! it's ye baith she'll be takin'," says Hecky MacCrimmon frae Skye.~
Says Corporal Muckle frae Rannoch: "Is that no' a picture tae frame?
Twa sair woundit Jocks wi' a lassie jist like ma wee Jeannie at hame.
We're prood o' ye baith, ma brave heroes. We'll gie ye a medal, I think."
Says Bauldy MacGreegor frae Gleska: "I'd raither ye gied me a drink.
I'll no speak for Private MacCrimmon, but oh, mon, I'm perishin' dry. . . ."
"She'll wush that Loch Lefen wass whuskey," says Hecky MacCrimmon frae Skye.~
|