Written by
Robert Burns |
WHEN wild war’s deadly blast was blawn,
And gentle peace returning,
Wi’ mony a sweet babe fatherless,
And mony a widow mourning;
I left the lines and tented field,
Where lang I’d been a lodger,
My humble knapsack a’ my wealth,
A poor and honest sodger.
A leal, light heart was in my breast,
My hand unstain’d wi’ plunder;
And for fair Scotia hame again,
I cheery on did wander:
I thought upon the banks o’ Coil,
I thought upon my Nancy,
I thought upon the witching smile
That caught my youthful fancy.
At length I reach’d the bonie glen,
Where early life I sported;
I pass’d the mill and trysting thorn,
Where Nancy aft I courted:
Wha spied I but my ain dear maid,
Down by her mother’s dwelling!
And turn’d me round to hide the flood
That in my een was swelling.
Wi’ alter’d voice, quoth I, “Sweet lass,
Sweet as yon hawthorn’s blossom,
O! happy, happy may he be,
That’s dearest to thy bosom:
My purse is light, I’ve far to gang,
And fain would be thy lodger;
I’ve serv’d my king and country lang—
Take pity on a sodger.”
Sae wistfully she gaz’d on me,
And lovelier was than ever;
Quo’ she, “A sodger ance I lo’ed,
Forget him shall I never:
Our humble cot, and hamely fare,
Ye freely shall partake it;
That gallant badge-the dear cockade,
Ye’re welcome for the sake o’t.”
She gaz’d—she redden’d like a rose—
Syne pale like only lily;
She sank within my arms, and cried,
“Art thou my ain dear Willie?”
“By him who made yon sun and sky!
By whom true love’s regarded,
I am the man; and thus may still
True lovers be rewarded.
“The wars are o’er, and I’m come hame,
And find thee still true-hearted;
Tho’ poor in gear, we’re rich in love,
And mair we’se ne’er be parted.”
Quo’ she, “My grandsire left me gowd,
A mailen plenish’d fairly;
And come, my faithfu’ sodger lad,
Thou’rt welcome to it dearly!”
For gold the merchant ploughs the main,
The farmer ploughs the manor;
But glory is the sodger’s prize,
The sodger’s wealth is honor:
The brave poor sodger ne’er despise,
Nor count him as a stranger;
Remember he’s his country’s stay,
In day and hour of danger.
|
Written by
Robert Burns |
MY lov’d, my honour’d, much respected friend!
No mercenary bard his homage pays;
With honest pride, I scorn each selfish end,
My dearest meed, a friend’s esteem and praise:
To you I sing, in simple Scottish lays,
The lowly train in life’s sequester’d scene,
The native feelings strong, the guileless ways,
What Aiken in a cottage would have been;
Ah! tho’ his worth unknown, far happier there I ween!
November chill blaws loud wi’ angry sugh;
The short’ning winter-day is near a close;
The miry beasts retreating frae the pleugh;
The black’ning trains o’ craws to their repose:
The toil-worn Cotter frae his labour goes,—
This night his weekly moil is at an end,
Collects his spades, his mattocks, and his hoes,
Hoping the morn in ease and rest to spend,
And weary, o’er the moor, his course does hameward bend.
At length his lonely cot appears in view,
Beneath the shelter of an aged tree;
Th’ expectant wee-things, toddlin, stacher through
To meet their dead, wi’ flichterin noise and glee.
His wee bit ingle, blinkin bonilie,
His clean hearth-stane, his thrifty wifie’s smile,
The lisping infant, prattling on his knee,
Does a’ his weary kiaugh and care beguile,
And makes him quite forget his labour and his toil.
Belyve, the elder bairns come drapping in,
At service out, amang the farmers roun’;
Some ca’ the pleugh, some herd, some tentie rin
A cannie errand to a neibor town:
Their eldest hope, their Jenny, woman-grown,
In youthfu’ bloom-love sparkling in her e’e—
Comes hame, perhaps to shew a braw new gown,
Or deposite her sair-won penny-fee,
To help her parents dear, if they in hardship be.
With joy unfeign’d, brothers and sisters meet,
And each for other’s weelfare kindly speirs:
The social hours, swift-wing’d, unnotic’d fleet:
Each tells the uncos that he sees or hears.
The parents, partial, eye their hopeful years;
Anticipation forward points the view;
The mother, wi’ her needle and her shears,
Gars auld claes look amaist as weel’s the new;
The father mixes a’ wi’ admonition due.
Their master’s and their mistress’ command,
The younkers a’ are warned to obey;
And mind their labours wi’ an eydent hand,
And ne’er, tho’ out o’ sight, to jauk or play;
“And O! be sure to fear the Lord alway,
And mind your duty, duly, morn and night;
Lest in temptation’s path ye gang astray,
Implore His counsel and assisting might:
They never sought in vain that sought the Lord aright.”
But hark! a rap comes gently to the door;
Jenny, wha kens the meaning o’ the same,
Tells how a neibor lad came o’er the moor,
To do some errands, and convoy her hame.
The wily mother sees the conscious flame
Sparkle in Jenny’s e’e, and flush her cheek;
With heart-struck anxious care, enquires his name,
While Jenny hafflins is afraid to speak;
Weel-pleased the mother hears, it’s nae wild, worthless rake.
Wi’ kindly welcome, Jenny brings him ben;
A strappin youth, he takes the mother’s eye;
Blythe Jenny sees the visit’s no ill ta’en;
The father cracks of horses, pleughs, and kye.
The youngster’s artless heart o’erflows wi’ joy,
But blate an’ laithfu’, scarce can weel behave;
The mother, wi’ a woman’s wiles, can spy
What makes the youth sae bashfu’ and sae grave,
Weel-pleas’d to think her bairn’s respected like the lave.
O happy love! where love like this is found:
O heart-felt raptures! bliss beyond compare!
I’ve paced much this weary, mortal round,
And sage experience bids me this declare,—
“If Heaven a draught of heavenly pleasure spare—
One cordial in this melancholy vale,
’Tis when a youthful, loving, modest pair
In other’sarms, breathe out the tender tale,
Beneath the milk-white thorn that scents the evening gale.”
Is there, in human form, that bears a heart,
A wretch! a villain! lost to love and truth!
That can, with studied, sly, ensnaring art,
Betray sweet Jenny’s unsuspecting youth?
Curse on his perjur’d arts! dissembling smooth!
Are honour, virtue, conscience, all exil’d?
Is there no pity, no relenting ruth,
Points to the parents fondling o’er their child?
Then paints the ruin’d maid, and their distraction wild?
But now the supper crowns their simple board,
The halesome parritch, chief of Scotia’s food;
The sowp their only hawkie does afford,
That, ’yont the hallan snugly chows her cood:
The dame brings forth, in complimental mood,
To grace the lad, her weel-hain’d kebbuck, fell;
And aft he’s prest, and aft he ca’s it guid:
The frugal wifie, garrulous, will tell
How t’was a towmond auld, sin’ lint was i’ the bell.
The cheerfu’ supper done, wi’ serious face,
They, round the ingle, form a circle wide;
The sire turns o’er, with patriarchal grace,
The big ha’bible, ance his father’s pride:
His bonnet rev’rently is laid aside,
His lyart haffets wearing thin and bare;
Those strains that once did sweet in Zion glide,
He wales a portion with judicious care;
And “Let us worship God!” he says with solemn air.
They chant their artless notes in simple guise,
They tune their hearts, by far the noblest aim;
Perhaps Dundee’s wild-warbling measures rise;
Or plaintive Martyrs, worthy of the name;
Or noble Elgin beets the heaven-ward flame;
The sweetest far of Scotia’s holy lays:
Compar’d with these, Italian trills are tame;
The tickl’d ears no heart-felt raptures raise;
Nae unison hae they with our Creator’s praise.
The priest-like father reads the sacred page,
How Abram was the friend of God on high;
Or Moses bade eternal warfare wage
With Amalek’s ungracious progeny;
Or how the royal bard did groaning lie
Beneath the stroke of Heaven’s avenging ire;
Or Job’s pathetic plaint, and wailing cry;
Or rapt Isaiah’s wild, seraphic fire;
Or other holy seers that tune the sacred lyre.
Perhaps the Christian volume is the theme,
How guiltless blood for guilty man was shed;
How He, who bore in Heaven the second name,
Had not on earth whereon to lay His head:
How His first followers and servants sped;
The precepts sage they wrote to many a land:
How he, who lone in Patmos banished,
Saw in the sun a mighty angel stand,
And heard great Bab’lon’s doom pronounc’d by Heaven’s command.
Then, kneeling down to Heaven’s Eternal King,
The saint, the father, and the husband prays:
Hope “springs exulting on triumphant wing,” 1
That thus they all shall meet in future days,
There, ever bask in uncreated rays,
No more to sigh, or shed the bitter tear,
Together hymning their Creator’s praise,
In such society, yet still more dear;
While circling Time moves round in an eternal sphere
Compar’d with this, how poor Religion’s pride,
In all the pomp of method, and of art;
When men display to congregations wide
Devotion’s ev’ry grace, except the heart!
The Power, incens’d, the pageant will desert,
The pompous strain, the sacerdotal stole;
But haply, in some cottage far apart,
May hear, well-pleas’d, the language of the soul;
And in His Book of Life the inmates poor enroll.
Then homeward all take off their sev’ral way;
The youngling cottagers retire to rest:
The parent-pair their secret homage pay,
And proffer up to Heaven the warm request,
That he who stills the raven’s clam’rous nest,
And decks the lily fair in flow’ry pride,
Would, in the way His wisdom sees the best,
For them and for their little ones provide;
But chiefly, in their hearts with grace divine preside.
From scenes like these, old Scotia’s grandeur springs,
That makes her lov’d at home, rever’d abroad:
Princes and lords are but the breath of kings,
“An honest man’s the noblest work of God;”
And certes, in fair virtue’s heavenly road,
The cottage leaves the palace far behind;
What is a lordling’s pomp? a cumbrous load,
Disguising oft the wretch of human kind,
Studied in arts of hell, in wickedness refin’d!
O Scotia! my dear, my native soil!
For whom my warmest wish to Heaven is sent,
Long may thy hardy sons of rustic toil
Be blest with health, and peace, and sweet content!
And O! may Heaven their simple lives prevent
From luxury’s contagion, weak and vile!
Then howe’er crowns and coronets be rent,
A virtuous populace may rise the while,
And stand a wall of fire around their much-lov’d isle.
O Thou! who pour’d the patriotic tide,
That stream’d thro’ Wallace’s undaunted heart,
Who dar’d to nobly stem tyrannic pride,
Or nobly die, the second glorious part:
(The patriot’s God peculiarly thou art,
His friend, inspirer, guardian, and reward!)
O never, never Scotia’s realm desert;
But still the patriot, and the patriot-bard
In bright succession raise, her ornament and guard!
Note 1. Pope’s “Windsor Forest.”—R. B. [back]
|
Written by
Robert Burns |
’TWAS 1 in that place o’ Scotland’s isle,
That bears the name o’ auld King Coil,
Upon a bonie day in June,
When wearin’ thro’ the afternoon,
Twa dogs, that were na thrang at hame,
Forgather’d ance upon a time.
The first I’ll name, they ca’d him Caesar,
Was keepit for His Honor’s pleasure:
His hair, his size, his mouth, his lugs,
Shew’d he was nane o’ Scotland’s dogs;
But whalpit some place far abroad,
Whare sailors gang to fish for cod.
His locked, letter’d, braw brass collar
Shew’d him the gentleman an’ scholar;
But though he was o’ high degree,
The fient a pride, nae pride had he;
But wad hae spent an hour caressin,
Ev’n wi’ al tinkler-gipsy’s messin:
At kirk or market, mill or smiddie,
Nae tawted tyke, tho’ e’er sae duddie,
But he wad stan’t, as glad to see him,
An’ stroan’t on stanes an’ hillocks wi’ him.
The tither was a ploughman’s collie—
A rhyming, ranting, raving billie,
Wha for his friend an’ comrade had him,
And in freak had Luath ca’d him,
After some dog in Highland Sang, 2
Was made lang syne,—Lord knows how lang.
He was a gash an’ faithfu’ tyke,
As ever lap a sheugh or dyke.
His honest, sonsie, baws’nt face
Aye gat him friends in ilka place;
His breast was white, his touzie back
Weel clad wi’ coat o’ glossy black;
His gawsie tail, wi’ upward curl,
Hung owre his hurdie’s wi’ a swirl.
Nae doubt but they were fain o’ ither,
And unco pack an’ thick thegither;
Wi’ social nose whiles snuff’d an’ snowkit;
Whiles mice an’ moudieworts they howkit;
Whiles scour’d awa’ in lang excursion,
An’ worry’d ither in diversion;
Until wi’ daffin’ weary grown
Upon a knowe they set them down.
An’ there began a lang digression.
About the “lords o’ the creation.”
CÆSAR I’ve aften wonder’d, honest Luath,
What sort o’ life poor dogs like you have;
An’ when the gentry’s life I saw,
What way poor bodies liv’d ava.
Our laird gets in his racked rents,
His coals, his kane, an’ a’ his stents:
He rises when he likes himsel’;
His flunkies answer at the bell;
He ca’s his coach; he ca’s his horse;
He draws a bonie silken purse,
As lang’s my tail, where, thro’ the steeks,
The yellow letter’d Geordie keeks.
Frae morn to e’en, it’s nought but toiling
At baking, roasting, frying, boiling;
An’ tho’ the gentry first are stechin,
Yet ev’n the ha’ folk fill their pechan
Wi’ sauce, ragouts, an’ sic like trashtrie,
That’s little short o’ downright wastrie.
Our whipper-in, wee, blasted wonner,
Poor, worthless elf, it eats a dinner,
Better than ony tenant-man
His Honour has in a’ the lan’:
An’ what poor cot-folk pit their painch in,
I own it’s past my comprehension.
LUATH Trowth, C&æsar, whiles they’re fash’t eneugh:
A cottar howkin in a sheugh,
Wi’ dirty stanes biggin a dyke,
Baring a quarry, an’ sic like;
Himsel’, a wife, he thus sustains,
A smytrie o’ wee duddie weans,
An’ nought but his han’-daurk, to keep
Them right an’ tight in thack an’ rape.
An’ when they meet wi’ sair disasters,
Like loss o’ health or want o’ masters,
Ye maist wad think, a wee touch langer,
An’ they maun starve o’ cauld an’ hunger:
But how it comes, I never kent yet,
They’re maistly wonderfu’ contented;
An’ buirdly chiels, an’ clever hizzies,
Are bred in sic a way as this is.
CÆSAR But then to see how ye’re negleckit,
How huff’d, an’ cuff’d, an’ disrespeckit!
Lord man, our gentry care as little
For delvers, ditchers, an’ sic cattle;
They gang as saucy by poor folk,
As I wad by a stinkin brock.
I’ve notic’d, on our laird’s court-day,—
An’ mony a time my heart’s been wae,—
Poor tenant bodies, scant o’cash,
How they maun thole a factor’s snash;
He’ll stamp an’ threaten, curse an’ swear
He’ll apprehend them, poind their gear;
While they maun stan’, wi’ aspect humble,
An’ hear it a’, an’ fear an’ tremble!
I see how folk live that hae riches;
But surely poor-folk maun be wretches!
LUATH They’re no sae wretched’s ane wad think.
Tho’ constantly on poortith’s brink,
They’re sae accustom’d wi’ the sight,
The view o’t gives them little fright.
Then chance and fortune are sae guided,
They’re aye in less or mair provided:
An’ tho’ fatigued wi’ close employment,
A blink o’ rest’s a sweet enjoyment.
The dearest comfort o’ their lives,
Their grushie weans an’ faithfu’ wives;
The prattling things are just their pride,
That sweetens a’ their fire-side.
An’ whiles twalpennie worth o’ nappy
Can mak the bodies unco happy:
They lay aside their private cares,
To mind the Kirk and State affairs;
They’ll talk o’ patronage an’ priests,
Wi’ kindling fury i’ their breasts,
Or tell what new taxation’s comin,
An’ ferlie at the folk in Lon’on.
As bleak-fac’d Hallowmass returns,
They get the jovial, rantin kirns,
When rural life, of ev’ry station,
Unite in common recreation;
Love blinks, Wit slaps, an’ social Mirth
Forgets there’s Care upo’ the earth.
That merry day the year begins,
They bar the door on frosty win’s;
The nappy reeks wi’ mantling ream,
An’ sheds a heart-inspiring steam;
The luntin pipe, an’ sneeshin mill,
Are handed round wi’ right guid will;
The cantie auld folks crackin crouse,
The young anes rantin thro’ the house—
My heart has been sae fain to see them,
That I for joy hae barkit wi’ them.
Still it’s owre true that ye hae said,
Sic game is now owre aften play’d;
There’s mony a creditable stock
O’ decent, honest, fawsont folk,
Are riven out baith root an’ branch,
Some rascal’s pridefu’ greed to quench,
Wha thinks to knit himsel the faster
In favour wi’ some gentle master,
Wha, aiblins, thrang a parliamentin,
For Britain’s guid his saul indentin—
CÆSAR Haith, lad, ye little ken about it:
For Britain’s guid! guid faith! I doubt it.
Say rather, gaun as Premiers lead him:
An’ saying ay or no’s they bid him:
At operas an’ plays parading,
Mortgaging, gambling, masquerading:
Or maybe, in a frolic daft,
To Hague or Calais takes a waft,
To mak a tour an’ tak a whirl,
To learn bon ton, an’ see the worl’.
There, at Vienna, or Versailles,
He rives his father’s auld entails;
Or by Madrid he takes the rout,
To thrum guitars an’ fecht wi’ nowt;
Or down Italian vista startles,
Wh-re-hunting amang groves o’ myrtles:
Then bowses drumlie German-water,
To mak himsel look fair an’ fatter,
An’ clear the consequential sorrows,
Love-gifts of Carnival signoras.
For Britain’s guid! for her destruction!
Wi’ dissipation, feud, an’ faction.
LUATH Hech, man! dear sirs! is that the gate
They waste sae mony a braw estate!
Are we sae foughten an’ harass’d
For gear to gang that gate at last?
O would they stay aback frae courts,
An’ please themsels wi’ country sports,
It wad for ev’ry ane be better,
The laird, the tenant, an’ the cotter!
For thae frank, rantin, ramblin billies,
Feint haet o’ them’s ill-hearted fellows;
Except for breakin o’ their timmer,
Or speakin lightly o’ their limmer,
Or shootin of a hare or moor-cock,
The ne’er-a-bit they’re ill to poor folk,
But will ye tell me, Master C&æsar,
Sure great folk’s life’s a life o’ pleasure?
Nae cauld nor hunger e’er can steer them,
The very thought o’t need na fear them.
CÆSAR L—d, man, were ye but whiles whare I am,
The gentles, ye wad ne’er envy them!
It’s true, they need na starve or sweat,
Thro’ winter’s cauld, or simmer’s heat:
They’ve nae sair wark to craze their banes,
An’ fill auld age wi’ grips an’ granes:
But human bodies are sic fools,
For a’ their colleges an’ schools,
That when nae real ills perplex them,
They mak enow themsel’s to vex them;
An’ aye the less they hae to sturt them,
In like proportion, less will hurt them.
A country fellow at the pleugh,
His acre’s till’d, he’s right eneugh;
A country girl at her wheel,
Her dizzen’s dune, she’s unco weel;
But gentlemen, an’ ladies warst,
Wi’ ev’n-down want o’ wark are curst.
They loiter, lounging, lank an’ lazy;
Tho’ deil-haet ails them, yet uneasy;
Their days insipid, dull, an’ tasteless;
Their nights unquiet, lang, an’ restless.
An’ev’n their sports, their balls an’ races,
Their galloping through public places,
There’s sic parade, sic pomp, an’ art,
The joy can scarcely reach the heart.
The men cast out in party-matches,
Then sowther a’ in deep debauches.
Ae night they’re mad wi’ drink an’ whoring,
Niest day their life is past enduring.
The ladies arm-in-arm in clusters,
As great an’ gracious a’ as sisters;
But hear their absent thoughts o’ ither,
They’re a’ run-deils an’ jads thegither.
Whiles, owre the wee bit cup an’ platie,
They sip the scandal-potion pretty;
Or lee-lang nights, wi’ crabbit leuks
Pore owre the devil’s pictur’d beuks;
Stake on a chance a farmer’s stackyard,
An’ cheat like ony unhanged blackguard.
There’s some exceptions, man an’ woman;
But this is gentry’s life in common.
By this, the sun was out of sight,
An’ darker gloamin brought the night;
The bum-clock humm’d wi’ lazy drone;
The kye stood rowtin i’ the loan;
When up they gat an’ shook their lugs,
Rejoic’d they werena men but dogs;
An’ each took aff his several way,
Resolv’d to meet some ither day.
Note 1. Luath was Burns’ own dog. [back]
Note 2. Cuchullin’s dog in Ossian’s “Fingal.”—R. B. [back]
|
Written by
Robert Burns |
A Tale
"Of Brownyis and of Bogilis full is this Buke."
—Gawin Douglas.
When chapman billies leave the street,
And drouthy neebors neebors meet,
As market-days are wearing late,
An' folk begin to tak' the gate;
While we sit bousing at the nappy,
An' getting fou and unco happy,
We think na on the lang Scots miles,
The mosses, waters, slaps, and stiles,
That lie between us and our hame,
Whare sits our sulky, sullen dame,
Gathering her brows like gathering storm,
Nursing her wrath to keep it warm.
This truth fand honest Tam o'Shanter,
As he frae Ayr ae night did canter,
(Auld Ayr, wham ne'er a town surpasses,
For honest men and bonie lasses).
O Tam! hadst thou but been sae wise,
As ta'en thy ain wife Kate's advice!
She tauld thee weel thou was a skellum,
A blethering, blustering, drunken blellum,
That frae November till October,
Ae market-day thou was nae sober;
That ilka melder, wi' the miller,
Thou sat as lang as thou had siller;
That ev'ry naig was ca'd a shoe on,
The smith and thee gat roarin fou on;
That at the Lord's house, ev'n on Sunday,
Thou drank wi' Kirkton Jean till Monday.
She prophesied that, late or soon,
Thou would be found deep drowned in Doon;
Or catched wi' warlocks in the mirk,
By Alloway's auld haunted kirk.
Ah, gentle dames! it gars me greet,
To think how mony counsels sweet,
How mony lengthened sage advices,
The husband frae the wife despises!
But to our tale: Ae market-night,
Tam had got planted unco right;
Fast by an ingle, bleezing finely,
Wi' reaming swats, that drank divinely;
And at his elbow, Souter Johnny,
His ancient, trusty, drouthy crony;
Tam lo'ed him like a vera brither;
They had been fou for weeks thegither.
The night drave on wi' sangs an' clatter;
And aye the ale was growing better:
The landlady and Tam grew gracious,
Wi' favours, secret, sweet, and precious:
The Souter tauld his queerest stories;
The landlord's laugh was ready chorus:
The storm without might rair and rustle,
Tam did na mind the storm a whistle.
Care, mad to see a man sae happy,
E'en drowned himself amang the nappy;
As bees flee hame wi' lades o' treasure,
The minutes winged their way wi' pleasure:
Kings may be blest, but Tam was glorious,
O'er a' the ills o' life victorious!
But pleasures are like poppies spread,
You seize the flow'r, its bloom is shed;
Or like the snow falls in the river,
A moment white—then melts for ever;
Or like the borealis race,
That flit ere you can point their place;
Or like the rainbow's lovely form
Evanishing amid the storm.—
Nae man can tether time or tide;
The hour approaches Tam maun ride;
That hour, o' night's black arch the key-stane,
That dreary hour he mounts his beast in;
And sic a night he tak's the road in,
As ne'er poor sinner was abroad in.
The wind blew as 'twad blawn its last;
The rattling showers rose on the blast;
The speedy gleams the darkness swallowed;
Loud, deep, and lang the thunder bellowed:
That night, a child might understand,
The De'il had business on his hand.
Weel mounted on his grey mare, Meg,
A better never lifted leg,
Tam skelpit on thro' dub and mire,
Despising wind, and rain, and fire;
Whiles holding fast his gude blue bonnet;
Whiles crooning o'er some auld Scots sonnet;
Whiles glow'rin round wi' prudent cares,
Lest bogles catch him unawares;
Kirk-Alloway was drawing nigh,
Whare ghaists and houlets nightly cry.
By this time he was cross the ford,
Whare in the snaw the chapman smoored;
And past the birks and meikle stane,
Whare drunken Charlie brak's neck-bane;
And thro' the whins, and by the cairn,
Whare hunters fand the murdered bairn;
And near the thorn, aboon the well,
Whare Mungo's mither hanged hersel'.
Before him Doon pours all his floods;
The doubling storm roars thro' the woods;
The lightnings flash from pole to pole;
Near and more near the thunders roll;
When, glimmering thro' the groaning trees,
Kirk-Alloway seemed in a bleeze;
Thro' ilka bore the beams were glancing;
And loud resounded mirth and dancing.
Inspiring bold John Barleycorn!
What dangers thou canst mak' us scorn!
Wi' tippenny, we fear nae evil;
Wi' usquabae, we'll face the devil!
The swats sae reamed in Tammie's noddle,
Fair play, he cared na deils a boddle.
But Maggie stood right sair astonished,
Till, by the heel and hand admonished,
She ventured forward on the light;
And, wow! Tam saw an unco sight!
Warlocks and witches in a dance;
Nae cotillion, brent new frae France,
But hornpipes, jigs, strathspeys, and reels,
Put life and mettle in their heels.
A winnock-bunker in the east,
There sat auld Nick, in shape o' beast;
A towzie tyke, black, grim, and large,
To gie them music was his charge:
He screwed the pipes and gart them skirl,
Till roof and rafters a' did dirl.—
Coffins stood round, like open presses,
That shawed the Dead in their last dresses;
And by some devilish cantraip sleight
Each in its cauld hand held a light,
By which heroic Tam was able
To note upon the haly table,
A murderer's banes in gibbet-airns;
Twa span-lang, wee, unchristened bairns;
A thief, new-cutted frae a rape,
Wi' his last gasp his gab did gape;
Five tomahawks, wi' blude red-rusted;
Five scimitars, wi' murder crusted;
A garter, which a babe had strangled;
A knife, a father's throat had mangled,
Whom his ain son o' life bereft,
The grey hairs yet stack to the heft;
Wi' mair of horrible and awfu',
Which even to name wad be unlawfu'.
As Tammie glowered, amazed and curious,
The mirth and fun grew fast and furious:
The Piper loud and louder blew;
The dancers quick and quicker flew;
They reeled, they set, they crossed, they cleekit,
Till ilka carlin swat and reekit,
And coost her duddies to the wark,
And linket at it in her sark!
Now Tam, O Tam! had they been queans,
A' plump and strapping in their teens;
Their sarks, instead o' creeshie flainen,
Been snaw-white seventeen hunder linen!—
Thir breeks o' mine, my only pair,
That ance were plush, o' gude blue hair,
I wad hae gi'en them off my hurdies,
For ae blink o' the bonie burdies!
But withered beldams, auld and droll,
Rigwoodie hags wad spean a foal,
Lowping and flinging on a crummock,
I wonder didna turn thy stomach.
But Tam kenned what was what fu' brawlie:
`There was ae winsome wench and waulie',
That night enlisted in the core
(Lang after kenned on Carrick shore;
For mony a beast to dead she shot,
And perished mony a bonie boat,
And shook baith meikle corn and bear,
And kept the country-side in fear);
Her cutty sark, o' Paisley harn,
That while a lassie she had worn,
In longitude tho' sorely scanty,
It was her best, and she was vauntie.
Ah! little kenned thy reverend grannie,
That sark she coft for her wee Nannie,
Wi' twa pund Scots ('twas a' her riches),
Wad ever graced a dance of witches!
But here my Muse her wing maun cour,
Sic flights are far beyond her power;
To sing how Nannie lap and flang,
(A souple jade she was and strang),
And how Tam stood, like ane bewitched,
And thought his very een enriched;
Even Satan glowered, and fidged fu' fain,
And hotched and blew wi' might and main:
Till first ae caper, syne anither,
Tam tint his reason a' thegither,
And roars out, "Weel done, Cutty-sark!"
And in an instant all was dark:
And scarcely had he Maggie rallied,
When out the hellish legion sallied.
As bees bizz out wi' angry fyke,
When plundering herds assail their byke;
As open pussie's mortal foes,
When, pop! she starts before their nose;
As eager runs the market-crowd,
When "Catch the thief!" resounds aloud;
So Maggie runs, the witches follow,
Wi' mony an eldritch screech and hollow.
Ah, Tam! ah, Tam! thou'll get thy fairin!
In hell they'll roast thee like a herrin!
In vain thy Kate awaits thy comin!
Kate soon will be a woefu' woman!
Now, do thy speedy utmost, Meg,
And win the key-stane of the brig;
There at them thou thy tail may toss,
A running stream they dare na cross.
But ere the key-stane she could make,
The fient a tail she had to shake!
For Nannie, far before the rest,
Hard upon noble Maggie prest,
And flew at Tam wi' furious ettle;
But little wist she Maggie's mettle—
Ae spring brought off her master hale,
But left behind her ain grey tail:
The carlin claught her by the rump,
And left poor Maggie scarce a stump.
Now, wha this tale o' truth shall read,
Ilk man and mother's son, take heed:
Whene'er to drink you are inclined,
Or cutty-sarks run in your mind,
Think, ye may buy the joys o'er dear,
Remember Tam o'Shanter's mare.
|
Written by
Robert Burns |
LONG life, my Lord, an’ health be yours,
Unskaithed by hunger’d Highland boors;
Lord grant me nae duddie, desperate beggar,
Wi’ dirk, claymore, and rusty trigger,
May twin auld Scotland o’ a life
She likes—as butchers like a knife.
Faith you and Applecross were right
To keep the Highland hounds in sight:
I doubt na! they wad bid nae better,
Than let them ance out owre the water,
Then up among thae lakes and seas,
They’ll mak what rules and laws they please:
Some daring Hancocke, or a Franklin,
May set their Highland bluid a-ranklin;
Some Washington again may head them,
Or some Montgomery, fearless, lead them,
Till (God knows what may be effected
When by such heads and hearts directed),
Poor dunghill sons of dirt and mire
May to Patrician rights aspire!
Nae sage North now, nor sager Sackville,
To watch and premier o’er the pack vile,—
An’ whare will ye get Howes and Clintons
To bring them to a right repentance—
To cowe the rebel generation,
An’ save the honour o’ the nation?
They, an’ be d—d! what right hae they
To meat, or sleep, or light o’ day?
Far less—to riches, pow’r, or freedom,
But what your lordship likes to gie them?
But hear, my lord! Glengarry, hear!
Your hand’s owre light to them, I fear;
Your factors, grieves, trustees, and bailies,
I canna say but they do gaylies;
They lay aside a’ tender mercies,
An’ tirl the hallions to the birses;
Yet while they’re only poind’t and herriet,
They’ll keep their stubborn Highland spirit:
But smash them! crash them a’ to spails,
An’ rot the dyvors i’ the jails!
The young dogs, swinge them to the labour;
Let wark an’ hunger mak them sober!
The hizzies, if they’re aughtlins fawsont,
Let them in Drury-lane be lesson’d!
An’ if the wives an’ dirty brats
Come thiggin at your doors an’ yetts,
Flaffin wi’ duds, an’ grey wi’ beas’,
Frightin away your ducks an’ geese;
Get out a horsewhip or a jowler,
The langest thong, the fiercest growler,
An’ gar the tatter’d gypsies pack
Wi’ a’ their bastards on their back!
Go on, my Lord! I lang to meet you,
An’ in my house at hame to greet you;
Wi’ common lords ye shanna mingle,
The benmost neuk beside the ingle,
At my right han’ assigned your seat,
’Tween Herod’s hip an’ Polycrate:
Or (if you on your station tarrow),
Between Almagro and Pizarro,
A seat, I’m sure ye’re well deservin’t;
An’ till ye come—your humble servant,BEELZEBUB.June 1st, Anno Mundi 5790.
|
Written by
Robert Burns |
I HOLD it, sir, my bounden duty
To warn you how that Master Tootie,
Alias, Laird M’Gaun,
Was here to hire yon lad away
’Bout whom ye spak the tither day,
An’ wad hae don’t aff han’;
But lest he learn the callan tricks—
An’ faith I muckle doubt him—
Like scrapin out auld Crummie’s nicks,
An’ tellin lies about them;
As lieve then, I’d have then
Your clerkship he should sair,
If sae be ye may be
Not fitted otherwhere.
Altho’ I say’t, he’s gleg enough,
An’ ’bout a house that’s rude an’ rough,
The boy might learn to swear;
But then, wi’ you, he’ll be sae taught,
An’ get sic fair example straught,
I hae na ony fear.
Ye’ll catechise him, every quirk,
An’ shore him weel wi’ hell;
An’ gar him follow to the kirk—
Aye when ye gang yoursel.
If ye then maun be then
Frae hame this comin’ Friday,
Then please, sir, to lea’e, sir,
The orders wi’ your lady.
My word of honour I hae gi’en,
In Paisley John’s, that night at e’en,
To meet the warld’s worm;
To try to get the twa to gree,
An’ name the airles an’ the fee,
In legal mode an’ form:
I ken he weel a snick can draw,
When simple bodies let him:
An’ if a Devil be at a’,
In faith he’s sure to get him.
To phrase you and praise you,.
Ye ken your Laureat scorns:
The pray’r still you share still
Of grateful MINSTREL BURNS.
|
Written by
Robert Burns |
UPON 1 a simmer Sunday morn
When Nature’s face is fair,
I walked forth to view the corn,
An’ snuff the caller air.
The rising sun owre Galston muirs
Wi’ glorious light was glintin;
The hares were hirplin down the furrs,
The lav’rocks they were chantin
Fu’ sweet that day.
As lightsomely I glowr’d abroad,
To see a scene sae gay,
Three hizzies, early at the road,
Cam skelpin up the way.
Twa had manteeles o” dolefu’ black,
But ane wi’ lyart lining;
The third, that gaed a wee a-back,
Was in the fashion shining
Fu’ gay that day.
The twa appear’d like sisters twin,
In feature, form, an’ claes;
Their visage wither’d, lang an’ thin,
An’ sour as only slaes:
The third cam up, hap-stap-an’-lowp,
As light as ony lambie,
An’ wi’a curchie low did stoop,
As soon as e’er she saw me,
Fu’ kind that day.
Wi’ bonnet aff, quoth I, “Sweet lass,
I think ye seem to ken me;
I’m sure I’ve seen that bonie face
But yet I canna name ye.”
Quo’ she, an’ laughin as she spak,
An’ taks me by the han’s,
“Ye, for my sake, hae gien the feck
Of a’ the ten comman’s
A screed some day.”
“My name is Fun—your cronie dear,
The nearest friend ye hae;
An’ this is Superstitution here,
An’ that’s Hypocrisy.
I’m gaun to Mauchline Holy Fair,
To spend an hour in daffin:
Gin ye’ll go there, yon runkl’d pair,
We will get famous laughin
At them this day.”
Quoth I, “Wi’ a’ my heart, I’ll do’t;
I’ll get my Sunday’s sark on,
An’ meet you on the holy spot;
Faith, we’se hae fine remarkin!”
Then I gaed hame at crowdie-time,
An’ soon I made me ready;
For roads were clad, frae side to side,
Wi’ mony a weary body
In droves that day.
Here farmers gash, in ridin graith,
Gaed hoddin by their cotters;
There swankies young, in braw braid-claith,
Are springing owre the gutters.
The lasses, skelpin barefit, thrang,
In silks an’ scarlets glitter;
Wi’ sweet-milk cheese, in mony a whang,
An’ farls, bak’d wi’ butter,
Fu’ crump that day.
When by the plate we set our nose,
Weel heaped up wi’ ha’pence,
A greedy glowr black-bonnet throws,
An’ we maun draw our tippence.
Then in we go to see the show:
On ev’ry side they’re gath’rin;
Some carrying dails, some chairs an’ stools,
An’ some are busy bleth’rin
Right loud that day.
Here stands a shed to fend the show’rs,
An’ screen our countra gentry;
There “Racer Jess, 2 an’ twa-three whores,
Are blinkin at the entry.
Here sits a raw o’ tittlin jads,
Wi’ heaving breast an’ bare neck;
An’ there a batch o’ wabster lads,
Blackguarding frae Kilmarnock,
For fun this day.
Here, some are thinkin on their sins,
An’ some upo’ their claes;
Ane curses feet that fyl’d his shins,
Anither sighs an’ prays:
On this hand sits a chosen swatch,
Wi’ screwed-up, grace-proud faces;
On that a set o’ chaps, at watch,
Thrang winkin on the lasses
To chairs that day.
O happy is that man, an’ blest!
Nae wonder that it pride him!
Whase ain dear lass, that he likes best,
Comes clinkin down beside him!
Wi’ arms repos’d on the chair back,
He sweetly does compose him;
Which, by degrees, slips round her neck,
An’s loof upon her bosom,
Unkend that day.
Now a’ the congregation o’er
Is silent expectation;
For Moodie 3 speels the holy door,
Wi’ tidings o’ damnation:
Should Hornie, as in ancient days,
’Mang sons o’ God present him,
The vera sight o’ Moodie’s face,
To ’s ain het hame had sent him
Wi’ fright that day.
Hear how he clears the point o’ faith
Wi’ rattlin and wi’ thumpin!
Now meekly calm, now wild in wrath,
He’s stampin, an’ he’s jumpin!
His lengthen’d chin, his turned-up snout,
His eldritch squeel an’ gestures,
O how they fire the heart devout,
Like cantharidian plaisters
On sic a day!
But hark! the tent has chang’d its voice,
There’s peace an’ rest nae langer;
For a’ the real judges rise,
They canna sit for anger,
Smith 4 opens out his cauld harangues,
On practice and on morals;
An’ aff the godly pour in thrangs,
To gie the jars an’ barrels
A lift that day.
What signifies his barren shine,
Of moral powers an’ reason?
His English style, an’ gesture fine
Are a’ clean out o’ season.
Like Socrates or Antonine,
Or some auld pagan heathen,
The moral man he does define,
But ne’er a word o’ faith in
That’s right that day.
In guid time comes an antidote
Against sic poison’d nostrum;
For Peebles, 5 frae the water-fit,
Ascends the holy rostrum:
See, up he’s got, the word o’ God,
An’ meek an’ mim has view’d it,
While Common-sense has taen the road,
An’ aff, an’ up the Cowgate 6
Fast, fast that day.
Wee Miller 7 neist the guard relieves,
An’ Orthodoxy raibles,
Tho’ in his heart he weel believes,
An’ thinks it auld wives’ fables:
But faith! the birkie wants a manse,
So, cannilie he hums them;
Altho’ his carnal wit an’ sense
Like hafflins-wise o’ercomes him
At times that day.
Now, butt an’ ben, the change-house fills,
Wi’ yill-caup commentators;
Here ’s cryin out for bakes and gills,
An’ there the pint-stowp clatters;
While thick an’ thrang, an’ loud an’ lang,
Wi’ logic an’ wi’ scripture,
They raise a din, that in the end
Is like to breed a rupture
O’ wrath that day.
Leeze me on drink! it gies us mair
Than either school or college;
It kindles wit, it waukens lear,
It pangs us fou o’ knowledge:
Be’t whisky-gill or penny wheep,
Or ony stronger potion,
It never fails, or drinkin deep,
To kittle up our notion,
By night or day.
The lads an’ lasses, blythely bent
To mind baith saul an’ body,
Sit round the table, weel content,
An’ steer about the toddy:
On this ane’s dress, an’ that ane’s leuk,
They’re makin observations;
While some are cozie i’ the neuk,
An’ forming assignations
To meet some day.
But now the L—’s ain trumpet touts,
Till a’ the hills are rairin,
And echoes back return the shouts;
Black Russell is na sparin:
His piercin words, like Highlan’ swords,
Divide the joints an’ marrow;
His talk o’ Hell, whare devils dwell,
Our vera “sauls does harrow”
Wi’ fright that day!
A vast, unbottom’d, boundless pit,
Fill’d fou o’ lowin brunstane,
Whase raging flame, an’ scorching heat,
Wad melt the hardest whun-stane!
The half-asleep start up wi’ fear,
An’ think they hear it roarin;
When presently it does appear,
’Twas but some neibor snorin
Asleep that day.
’Twad be owre lang a tale to tell,
How mony stories past;
An’ how they crouded to the yill,
When they were a’ dismist;
How drink gaed round, in cogs an’ caups,
Amang the furms an’ benches;
An’ cheese an’ bread, frae women’s laps,
Was dealt about in lunches
An’ dawds that day.
In comes a gawsie, gash guidwife,
An’ sits down by the fire,
Syne draws her kebbuck an’ her knife;
The lasses they are shyer:
The auld guidmen, about the grace
Frae side to side they bother;
Till some ane by his bonnet lays,
An’ gies them’t like a tether,
Fu’ lang that day.
Waesucks! for him that gets nae lass,
Or lasses that hae naething!
Sma’ need has he to say a grace,
Or melvie his braw claithing!
O wives, be mindfu’ ance yoursel’
How bonie lads ye wanted;
An’ dinna for a kebbuck-heel
Let lasses be affronted
On sic a day!
Now Clinkumbell, wi’ rattlin tow,
Begins to jow an’ croon;
Some swagger hame the best they dow,
Some wait the afternoon.
At slaps the billies halt a blink,
Till lasses strip their shoon:
Wi’ faith an’ hope, an’ love an’ drink,
They’re a’ in famous tune
For crack that day.
How mony hearts this day converts
O’ sinners and o’ lasses!
Their hearts o’ stane, gin night, are gane
As saft as ony flesh is:
There’s some are fou o’ love divine;
There’s some are fou o’ brandy;
An’ mony jobs that day begin,
May end in houghmagandie
Some ither day.
Note 1. “Holy Fair” is a common phrase in the west of Scotland for a sacramental occasion.—R. B. [back]
Note 2. Racer Jess (d. 1813) was a half-witted daughter of Poosie Nansie. She was a great pedestrian. [back]
Note 3. Rev. Alexander Moodie of Riccarton. [back]
Note 4. Rev. George Smith of Galston. [back]
Note 5. Rev. Wm. Peebles of Newton-upon-Ayr. [back]
Note 6. A street so called which faces the tent in Mauchline.—R. B. [back]
Note 7. Rev. Alex. Miller, afterward of Kilmaurs. [back]
|
Written by
Robert Burns |
WHEN chapman billies leave the street,
And drouthy neibors, neibors, meet;
As market days are wearing late,
And folk begin to tak the gate,
While we sit bousing at the nappy,
An’ getting fou and unco happy,
We think na on the lang Scots miles,
The mosses, waters, slaps and stiles,
That lie between us and our hame,
Where sits our sulky, sullen dame,
Gathering her brows like gathering storm,
Nursing her wrath to keep it warm.
This truth fand honest TAM O’ SHANTER,
As he frae Ayr ae night did canter:
(Auld Ayr, wham ne’er a town surpasses,
For honest men and bonie lasses).
O Tam! had’st thou but been sae wise,
As taen thy ain wife Kate’s advice!
She tauld thee weel thou was a skellum,
A blethering, blustering, drunken blellum;
That frae November till October,
Ae market-day thou was na sober;
That ilka melder wi’ the Miller,
Thou sat as lang as thou had siller;
That ev’ry naig was ca’d a shoe on
The Smith and thee gat roarin’ fou on;
That at the L—d’s house, ev’n on Sunday,
Thou drank wi’ Kirkton Jean till Monday,
She prophesied that late or soon,
Thou wad be found, deep drown’d in Doon,
Or catch’d wi’ warlocks in the mirk,
By Alloway’s auld, haunted kirk.
Ah, gentle dames! it gars me greet,
To think how mony counsels sweet,
How mony lengthen’d, sage advices,
The husband frae the wife despises!
But to our tale:—Ae market night,
Tam had got planted unco right,
Fast by an ingle, bleezing finely,
Wi reaming sAats, that drank divinely;
And at his elbow, Souter Johnie,
His ancient, trusty, drougthy crony:
Tam lo’ed him like a very brither;
They had been fou for weeks thegither.
The night drave on wi’ sangs an’ clatter;
And aye the ale was growing better:
The Landlady and Tam grew gracious,
Wi’ favours secret, sweet, and precious:
The Souter tauld his queerest stories;
The Landlord’s laugh was ready chorus:
The storm without might rair and rustle,
Tam did na mind the storm a whistle.
Care, mad to see a man sae happy,
E’en drown’d himsel amang the nappy.
As bees flee hame wi’ lades o’ treasure,
The minutes wing’d their way wi’ pleasure:
Kings may be blest, but Tam was glorious,
O’er a’ the ills o’ life victorious!
But pleasures are like poppies spread,
You seize the flow’r, its bloom is shed;
Or like the snow falls in the river,
A moment white—then melts for ever;
Or like the Borealis race,
That flit ere you can point their place;
Or like the Rainbow’s lovely form
Evanishing amid the storm.—
Nae man can tether Time nor Tide,
The hour approaches Tam maun ride;
That hour, o’ night’s black arch the key-stane,
That dreary hour he mounts his beast in;
And sic a night he taks the road in,
As ne’er poor sinner was abroad in.
The wind blew as ’twad blawn its last;
The rattling showers rose on the blast;
The speedy gleams the darkness swallow’d;
Loud, deep, and lang, the thunder bellow’d:
That night, a child might understand,
The deil had business on his hand.
Weel-mounted on his grey mare, Meg,
A better never lifted leg,
Tam skelpit on thro’ dub and mire,
Despising wind, and rain, and fire;
Whiles holding fast his gude blue bonnet,
Whiles crooning o’er some auld Scots sonnet,
Whiles glow’rin round wi’ prudent cares,
Lest bogles catch him unawares;
Kirk-Alloway was drawing nigh,
Where ghaists and houlets nightly cry.
By this time he was cross the ford,
Where in the snaw the chapman smoor’d;
And past the birks and meikle stane,
Where drunken Charlie brak’s neck-bane;
And thro’ the whins, and by the cairn,
Where hunters fand the murder’d bairn;
And near the thorn, aboon the well,
Where Mungo’s mither hang’d hersel’.
Before him Doon pours all his floods,
The doubling storm roars thro’ the woods,
The lightnings flash from pole to pole,
Near and more near the thunders roll,
When, glimmering thro’ the groaning trees,
Kirk-Alloway seem’d in a bleeze,
Thro’ ilka bore the beams were glancing,
And loud resounded mirth and dancing.
Inspiring bold John Barleycorn!
What dangers thou canst make us scorn!
Wi’ tippenny, we fear nae evil;
Wi’ usquabae, we’ll face the devil!
The swats sae ream’d in Tammie’s noddle,
Fair play, he car’d na deils a boddle,
But Maggie stood, right sair astonish’d,
Till, by the heel and hand admonish’d,
She ventur’d forward on the light;
And, wow! Tam saw an unco sight!
Warlocks and witches in a dance:
Nae cotillon, brent new frae France,
But hornpipes, jigs, strathspeys, and reels,
Put life and mettle in their heels.
A winnock-bunker in the east,
There sat auld Nick, in shape o’ beast;
A towzie tyke, black, grim, and large,
To gie them music was his charge:
He screw’d the pipes and gart them skirl,
Till roof and rafters a’ did dirl.—
Coffins stood round, like open presses,
That shaw’d the Dead in their last dresses;
And (by some devilish cantraip sleight)
Each in its cauld hand held a light.
By which heroic Tam was able
To note upon the haly table,
A murderer’s banes, in gibbet-airns;
Twa span-lang, wee, unchristened bairns;
A thief, new-cutted frae a rape,
Wi’ his last gasp his gabudid gape;
Five tomahawks, wi’ blude red-rusted:
Five scimitars, wi’ murder crusted;
A garter which a babe had strangled:
A knife, a father’s throat had mangled.
Whom his ain son of life bereft,
The grey-hairs yet stack to the heft;
Wi’ mair of horrible and awfu’,
Which even to name wad be unlawfu’.
As Tammie glowr’d, amaz’d, and curious,
The mirth and fun grew fast and furious;
The Piper loud and louder blew,
The dancers quick and quicker flew,
The reel’d, they set, they cross’d, they cleekit,
Till ilka carlin swat and reekit,
And coost her duddies to the wark,
And linkit at it in her sark!
Now Tam, O Tam! had they been queans,
A’ plump and strapping in their teens!
Their sarks, instead o’ creeshie flainen,
Been snaw-white seventeen hunder linen!—
Thir breeks o’ mine, my only pair,
That ance were plush o’ guid blue hair,
I wad hae gien them off my hurdies,
For ae blink o’ the bonie burdies!
But wither’d beldams, auld and droll,
Rigwoodie hags wad spean a foal,
Louping an’ flinging on a crummock.
I wonder did na turn thy stomach.
But Tam kent what was what fu’ brawlie:
There was ae winsome wench and waulie
That night enlisted in the core,
Lang after ken’d on Carrick shore;
(For mony a beast to dead she shot,
And perish’d mony a bonie boat,
And shook baith meikle corn and bear,
And kept the country-side in fear);
Her cutty sark, o’ Paisley harn,
That while a lassie she had worn,
In longitude tho’ sorely scanty,
It was her best, and she was vauntie.
Ah! little ken’d thy reverend grannie,
That sark she coft for her wee Nannie,
Wi twa pund Scots (’twas a’ her riches),
Wad ever grac’d a dance of witches!
But here my Muse her wing maun cour,
Sic flights are far beyond her power;
To sing how Nannie lap and flang,
(A souple jade she was and strang),
And how Tam stood, like ane bewithc’d,
And thought his very een enrich’d:
Even Satan glowr’d, and fidg’d fu’ fain,
And hotch’d and blew wi’ might and main:
Till first ae caper, syne anither,
Tam tint his reason a thegither,
And roars out, “Weel done, Cutty-sark!”
And in an instant all was dark:
And scarcely had he Maggie rallied.
When out the hellish legion sallied.
As bees bizz out wi’ angry fyke,
When plundering herds assail their byke;
As open pussie’s mortal foes,
When, pop! she starts before their nose;
As eager runs the market-crowd,
When “Catch the thief!” resounds aloud;
So Maggie runs, the witches follow,
Wi’ mony an eldritch skreich and hollow.
Ah, Tam! Ah, Tam! thou’ll get thy fairin!
In hell, they’ll roast thee like a herrin!
In vain thy Kate awaits thy comin!
Kate soon will be a woefu’ woman!
Now, do thy speedy-utmost, Meg,
And win the key-stone o’ the brig;
There, at them thou thy tail may toss,
A running stream they dare na cross.
But ere the keystane she could make,
The fient a tail she had to shake!
For Nannie, far before the rest,
Hard upon noble Maggie prest,
And flew at Tam wi’ furious ettle;
But little wist she Maggie’s mettle!
Ae spring brought off her master hale,
But left behind her ain grey tail:
The carlin claught her by the rump,
And left poor Maggie scarce a stump.
Now, wha this tale o’ truth shall read,
Ilk man and mother’s son, take heed:
Whene’er to Drink you are inclin’d,
Or Cutty-sarks rin in your mind,
Think ye may buy the joys o’er dear;
Remember Tam o’ Shanter’s mare.
|
Written by
Robert William Service |
You may talk o' your lutes and your dulcimers fine,
Your harps and your tabors and cymbals and a',
But here in the trenches jist gie me for mine
The wee penny whistle o' Sandy McGraw.
Oh, it's: "Sandy, ma lad, will you lilt us a tune?"
And Sandy is willin' and trillin' like mad;
Sae silvery sweet that we a' throng aroun',
And some o' it's gay, but the maist o' it's sad.
Jist the wee simple airs that sink intae your hert,
And grup ye wi' love and wi' longin' for hame;
And ye glour like an owl till you're feelin' the stert
O' a tear, and you blink wi' a feelin' o' shame.
For his song's o' the heather, and here in the dirt
You listen and dream o' a land that's sae braw,
And he mak's you forget a' the harm and the hurt,
For he pipes like a laverock, does Sandy McGraw.
* * * * *
At Eepers I mind me when rank upon rank
We rose from the trenches and swept like the gale,
Till the rapid-fire guns got us fell on the flank
And the murderin' bullets came swishin' like hail:
Till a' that were left o' us faltered and broke;
Till it seemed for a moment a panicky rout,
When shrill through the fume and the flash and the smoke
The wee valiant voice o' a whistle piped out.
`The Campbells are Comin'': Then into the fray
We bounded wi' bayonets reekin' and raw,
And oh we fair revelled in glory that day,
Jist thanks to the whistle o' Sandy McGraw.
* * * * *
At Loose, it wis after a sconnersome fecht,
On the field o' the slain I wis crawlin' aboot;
And the rockets were burnin' red holes in the nicht;
And the guns they were veciously thunderin' oot;
When sudden I heard a bit sound like a sigh,
And there in a crump-hole a kiltie I saw:
"Whit ails ye, ma lad? Are ye woundit?" says I.
"I've lost ma wee whustle," says Sandy McGraw.
"'Twas oot by yon bing where we pressed the attack,
It drapped frae ma pooch, and between noo and dawn
There isna much time so I'm jist crawlin' back. . . ."
"Ye're daft, man!" I telt him, but Sandy wis gone.
Weel, I waited a wee, then I crawled oot masel,
And the big stuff wis gorin' and roarin' around,
And I seemed tae be under the oxter o' hell,
And Creation wis crackin' tae bits by the sound.
And I says in ma mind: "Gang ye back, ye auld fule!"
When I thrilled tae a note that wis saucy and sma';
And there in a crater, collected and cool,
Wi' his wee penny whistle wis Sandy McGraw.
Ay, there he wis playin' as gleg as could be,
And listenin' hard wis a spectacled Boche;
Then Sandy turned roon' and he noddit tae me,
And he says: "Dinna blab on me, Sergeant McTosh.
The auld chap is deein'. He likes me tae play.
It's makin' him happy. Jist see his een shine!"
And thrillin' and sweet in the hert o' the fray
Wee Sandy wis playin' The Watch on the Rhine.
* * * * *
The last scene o' a' -- 'twas the day that we took
That bit o' black ruin they ca' Labbiesell.
It seemed the hale hillside jist shivered and shook,
And the red skies were roarin' and spewin' oot shell.
And the Sergeants were cursin' tae keep us in hand,
And hard on the leash we were strainin' like dugs,
When upward we shot at the word o' command,
And the bullets were dingin' their songs in oor lugs.
And onward we swept wi' a yell and a cheer,
And a' wis destruction, confusion and din,
And we knew that the trench o' the Boches wis near,
And it seemed jist the safest bit hole tae be in.
So we a' tumbled doon, and the Boches were there,
And they held up their hands, and they yelled: "Kamarad!"
And I merched aff wi' ten, wi' their palms in the air,
And my! I wis prood-like, and my! I wis glad.
And I thocht: if ma lassie could see me jist then. . . .
When sudden I sobered at somethin' I saw,
And I stopped and I stared, and I halted ma men,
For there on a stretcher wis Sandy McGraw.
Weel, he looks in ma face, jist as game as ye please:
"Ye ken hoo I hate tae be workin'," says he;
"But noo I can play in the street for bawbees,
Wi' baith o' ma legs taken aff at the knee."
And though I could see he wis rackit wi' pain,
He reached for his whistle and stertit tae play;
And quaverin' sweet wis the pensive refrain:
The floors o' the forest are a' wede away.
Then sudden he stoppit: "Man, wis it no grand
Hoo we took a' them trenches?" . . . He shakit his heid:
"I'll -- no -- play -- nae -- mair ----" feebly doon frae his hand
Slipped the wee penny whistle and -- Sandy wis deid.
* * * * *
And so you may talk o' your Steinways and Strads,
Your wonderful organs and brasses sae braw;
But oot in the trenches jist gie me, ma lads,
Yon wee penny whistle o' Sandy McGraw.
|
Written by
Robert Burns |
SOME books are lies frae end to end,
And some great lies were never penn’d:
Ev’n ministers they hae been kenn’d,
In holy rapture,
A rousing whid at times to vend,
And nail’t wi’ Scripture.
But this that I am gaun to tell,
Which lately on a night befell,
Is just as true’s the Deil’s in hell
Or Dublin city:
That e’er he nearer comes oursel’
’S a muckle pity.
The clachan yill had made me canty,
I was na fou, but just had plenty;
I stacher’d whiles, but yet too tent aye
To free the ditches;
An’ hillocks, stanes, an’ bushes, kenn’d eye
Frae ghaists an’ witches.
The rising moon began to glowre
The distant Cumnock hills out-owre:
To count her horns, wi’ a my pow’r,
I set mysel’;
But whether she had three or four,
I cou’d na tell.
I was come round about the hill,
An’ todlin down on Willie’s mill,
Setting my staff wi’ a’ my skill,
To keep me sicker;
Tho’ leeward whiles, against my will,
I took a bicker.
I there wi’ Something did forgather,
That pat me in an eerie swither;
An’ awfu’ scythe, out-owre ae shouther,
Clear-dangling, hang;
A three-tae’d leister on the ither
Lay, large an’ lang.
Its stature seem’d lang Scotch ells twa,
The queerest shape that e’er I saw,
For fient a wame it had ava;
And then its shanks,
They were as thin, as sharp an’ sma’
As cheeks o’ branks.
“Guid-een,” quo’ I; “Friend! hae ye been mawin,
When ither folk are busy sawin!” 1
I seem’d to make a kind o’ stan’
But naething spak;
At length, says I, “Friend! whare ye gaun?
Will ye go back?”
It spak right howe,—“My name is Death,
But be na fley’d.”—Quoth I, “Guid faith,
Ye’re maybe come to stap my breath;
But tent me, billie;
I red ye weel, tak care o’ skaith
See, there’s a gully!”
“Gudeman,” quo’ he, “put up your whittle,
I’m no designed to try its mettle;
But if I did, I wad be kittle
To be mislear’d;
I wad na mind it, no that spittle
Out-owre my beard.”
“Weel, weel!” says I, “a bargain be’t;
Come, gie’s your hand, an’ sae we’re gree’t;
We’ll ease our shanks an tak a seat—
Come, gie’s your news;
This while ye hae been mony a gate,
At mony a house.” 2
“Ay, ay!” quo’ he, an’ shook his head,
“It’s e’en a lang, lang time indeed
Sin’ I began to nick the thread,
An’ choke the breath:
Folk maun do something for their bread,
An’ sae maun Death.
“Sax thousand years are near-hand fled
Sin’ I was to the butching bred,
An’ mony a scheme in vain’s been laid,
To stap or scar me;
Till ane Hornbook’s 3 ta’en up the trade,
And faith! he’ll waur me.
“Ye ken Hornbook i’ the clachan,
Deil mak his king’s-hood in spleuchan!
He’s grown sae weel acquaint wi’ Buchan 4
And ither chaps,
The weans haud out their fingers laughin,
An’ pouk my hips.
“See, here’s a scythe, an’ there’s dart,
They hae pierc’d mony a gallant heart;
But Doctor Hornbook, wi’ his art
An’ cursed skill,
Has made them baith no worth a f—t,
D—n’d haet they’ll kill!
“’Twas but yestreen, nae farther gane,
I threw a noble throw at ane;
Wi’ less, I’m sure, I’ve hundreds slain;
But deil-ma-care,
It just play’d dirl on the bane,
But did nae mair.
“Hornbook was by, wi’ ready art,
An’ had sae fortify’d the part,
That when I looked to my dart,
It was sae blunt,
Fient haet o’t wad hae pierc’d the heart
Of a kail-runt.
“I drew my scythe in sic a fury,
I near-hand cowpit wi’ my hurry,
But yet the bauld Apothecary
Withstood the shock;
I might as weel hae tried a quarry
O’ hard whin rock.
“Ev’n them he canna get attended,
Altho’ their face he ne’er had kend it,
Just —— in a kail-blade, an’ sent it,
As soon’s he smells ’t,
Baith their disease, and what will mend it,
At once he tells ’t.
“And then, a’ doctor’s saws an’ whittles,
Of a’ dimensions, shapes, an’ mettles,
A’ kind o’ boxes, mugs, an’ bottles,
He’s sure to hae;
Their Latin names as fast he rattles
As A B C.
“Calces o’ fossils, earths, and trees;
True sal-marinum o’ the seas;
The farina of beans an’ pease,
He has’t in plenty;
Aqua-fontis, what you please,
He can content ye.
“Forbye some new, uncommon weapons,
Urinus spiritus of capons;
Or mite-horn shavings, filings, scrapings,
Distill’d per se;
Sal-alkali o’ midge-tail clippings,
And mony mae.”
“Waes me for Johnie Ged’s-Hole 5 now,”
Quoth I, “if that thae news be true!
His braw calf-ward whare gowans grew,
Sae white and bonie,
Nae doubt they’ll rive it wi’ the plew;
They’ll ruin Johnie!”
The creature grain’d an eldritch laugh,
And says “Ye needna yoke the pleugh,
Kirkyards will soon be till’d eneugh,
Tak ye nae fear:
They’ll be trench’d wi’ mony a sheugh,
In twa-three year.
“Whare I kill’d ane, a fair strae-death,
By loss o’ blood or want of breath
This night I’m free to tak my aith,
That Hornbook’s skill
Has clad a score i’ their last claith,
By drap an’ pill.
“An honest wabster to his trade,
Whase wife’s twa nieves were scarce weel-bred
Gat tippence-worth to mend her head,
When it was sair;
The wife slade cannie to her bed,
But ne’er spak mair.
“A country laird had ta’en the batts,
Or some curmurring in his guts,
His only son for Hornbook sets,
An’ pays him well:
The lad, for twa guid gimmer-pets,
Was laird himsel’.
“A bonie lass—ye kend her name—
Some ill-brewn drink had hov’d her wame;
She trusts hersel’, to hide the shame,
In Hornbook’s care;
Horn sent her aff to her lang hame,
To hide it there.
“That’s just a swatch o’ Hornbook’s way;
Thus goes he on from day to day,
Thus does he poison, kill, an’ slay,
An’s weel paid for’t;
Yet stops me o’ my lawfu’ prey,
Wi’ his d—n’d dirt:
“But, hark! I’ll tell you of a plot,
Tho’ dinna ye be speakin o’t;
I’ll nail the self-conceited sot,
As dead’s a herrin;
Neist time we meet, I’ll wad a groat,
He gets his fairin!”
But just as he began to tell,
The auld kirk-hammer strak the bell
Some wee short hour ayont the twal’,
Which rais’d us baith:
I took the way that pleas’d mysel’,
And sae did Death.
Note 1. This recontre happened in seed-time, 1785.—R. B. [back]
Note 2. An epidemical fever was then raging in that country.—R. B. [back]
Note 3. This gentleman, Dr. Hornbook, is professionally a brother of the sovereign Order of the Ferula; but, by intuition and inspiration, is at once an apothecary, surgeon, and physician.—R. B. [back]
Note 4. Burchan’s Domestic Medicine.—R. B. [back]
Note 5. The grave-digger.—R. B. [back]
|