Who Be That
He don tey
Ma guy he don tey
Wey monkey dey work
And baboon dey talk
Chai! No be today.
Make I tanda
Gidigba like Balogun Thunder
Drop some verse like vaseline
Put ugwu meta
And land ponmo like four
Untop dis mata.
No be today
He don tey
Wey money dey fly
From we country purse
Man pikin dey hungry
Man pikin dey angry.
Dem say money
Don turn bird
Our leaders dey sleep untop water bed
While we dey yawn untop pako bed.
Yesterday na inside soakaway
Today na inside water tank
Dem keep all dem money.
I tire for dis kontri
Agbero boys no dey gree,
Even dem omo onile own get degree.
And even danfo drivers dey sing song of lamentation
Inside police station.
Na which kain palava be this?
Dem say skool no be for all of us
Say make we try ignorance
But school self na one chance.
Professor na gramma
Even dem first class na crammer
To pass na big wahala.
I beg who be that
Wey talk say stealing no be corruption?
I beg who be that
Wey just commot kirikiri
Talk say him be joseph of our time?
I beg who be that
Wey kidnap so tey
we hear say him wan sue govament?
I beg who be that
Wey dey dance
Untop say him get thirdclass?
Dem don chop national cake
So tey dem no even wan remain beancake
I tire for this nation
I hope say dem go leave our ration.
Muyideen Ayinla ©2017
Copyright © Muyideen Ayinla | Year Posted 2017
Post Comments
Poetrysoup is an environment of encouragement and growth so only provide specific positive comments that indicate what you appreciate about the poem.
Please
Login
to post a comment