Sikse

Lot fwa-la, mo ti pe tann enn bann dimounn pe diskit lor Sikse. Boukou ti pe esey definir seki sa ete. Sakenn ti ena so version... Ena ti pe dir sikse se kan zot gagn promosion. Lot ti pe dir parski zo'nn resi marye, resi dres zot lavi. Ena ki ti pe koz lor sikse ki zot gagne ar bann tifi. Anfin, sakenn ti ena so definision... Pou mwa, avek reflexion, avek letan, mo'nn realize ki sikse li inpe diferan. Ala mwa mo version: Sikse pou mwa se riye, riy souvan, avek lazwa, avek sinserite. Rest ere, rest vre, prezerv mo lidantite, san ki mo bizin sanz lapo kouma serpan pou adapte ek enn bann lanvironnman ki ranpli ar malpropte. Sikse se gagn respe dimounn ki travers lor mo sime; enn respe ki mo trase, ki mo merite gagne, parski zisteman, mo'nn prouve ki mo rest dimounn ki mo ete e ki mo pa sanze pou gagn enn bann lavantaz e fer lezot dimounn tonbe. Sikse se aksepte bann kritik konstriktif avek enn sourir; bann kritik ki pou permet mwa rekonstrir, dabor momem, e tou seki mo kre. Sikse pou mwa se sirviv trayizon bann fos kamarad ki mo ti panse pou akonpagn mwa tout long mo lavi. Sikse se rekonet mo bann prop fot anver bann dimounn ki mo'nn blese parski mo ti bet, parski mo ti malere, parski mo ti move, parski mo ti feb e ki mo ti les momem anvayir par bann move linflians, san realiz bann konsekans. Sikse se ki enn zour mo resi aval mo fierte, repar tou seki mo'nn kase, dimann pardon dan ninport ki fason... Sikse se kan mo kit lemond enn zour, e ki mo kit li dan enn meyer kondision ki li ti ete kan mo ti pe respire. Li kapav bien sinp ein; enn ti zardin, plant enn ti pie, rann enn ti zanfan ki dan difikilte ere, donn enn lakaz enn lisien ki’nn abandone, lager pou enn koz sosial, pou mo pei, pou tou kominote. Sikse pou mwa li bien sinp, zot trouve; se kan mo realize ki omwin enn lavi finn ameliore parski mo ti existe...