Written by
Robert Burns |
WHAT ails ye now, ye lousie *****
To thresh my back at sic a pitch?
Losh, man! hae mercy wi’ your natch,
Your bodkin’s bauld;
I didna suffer half sae much
Frae Daddie Auld.
What tho’ at times, when I grow crouse,
I gie their wames a random pouse,
Is that enough for you to souse
Your servant sae?
Gae mind your seam, ye prick-the-louse,
An’ jag-the-flea!
King David, o’ poetic brief,
Wrocht ’mang the lasses sic mischief
As filled his after-life wi’ grief,
An’ bluidy rants,
An’ yet he’s rank’d amang the chief
O’ lang-syne saunts.
And maybe, Tam, for a’ my cants,
My wicked rhymes, an’ drucken rants,
I’ll gie auld cloven’s Clootie’s haunts
An unco slip yet,
An’ snugly sit amang the saunts,
At Davie’s hip yet!
But, fegs! the session says I maun
Gae fa’ upo’ anither plan
Than garrin lasses coup the cran,
Clean heels ower body,
An’ sairly thole their mother’s ban
Afore the howdy.
This leads me on to tell for sport,
How I did wi’ the Session sort;
Auld Clinkum, at the inner port,
Cried three times, “Robin!
Come hither lad, and answer for’t,
Ye’re blam’d for jobbin!”
Wi’ pinch I put a Sunday’s face on,
An’ snoov’d awa before the Session:
I made an open, fair confession—
I scorn’t to lee,
An’ syne Mess John, beyond expression,
Fell foul o’ me.
A fornicator-loun he call’d me,
An’ said my faut frae bliss expell’d me;
I own’d the tale was true he tell’d me,
“But, what the matter?
(Quo’ I) I fear unless ye geld me,
I’ll ne’er be better!”
“Geld you! (quo’ he) an’ what for no?
If that your right hand, leg or toe
Should ever prove your sp’ritual foe,
You should remember
To cut it aff—an’ what for no
Your dearest member?”
“Na, na, (quo’ I,) I’m no for that,
Gelding’s nae better than ’tis ca’t;
I’d rather suffer for my faut
A hearty flewit,
As sair owre hip as ye can draw’t,
Tho’ I should rue it.
“Or, gin ye like to end the bother,
To please us a’—I’ve just ae ither—
When next wi’ yon lass I forgather,
Whate’er betide it,
I’ll frankly gie her ’t a’ thegither,
An’ let her guide it.”
But, sir, this pleas’d them warst of a’,
An’ therefore, Tam, when that I saw,
I said “Gude night,” an’ cam’ awa’,
An’ left the Session;
I saw they were resolvèd a’
On my oppression.
|
Written by
Robert Burns |
WHOM will you send to London town,
To Parliament and a’ that?
Or wha in a’ the country round
The best deserves to fa’ that?
For a’ that, and a’ that,
Thro’ Galloway and a’ that,
Where is the Laird or belted Knight
The best deserves to fa’ that?
Wha sees Kerroughtree’s open yett,
(And wha is’t never saw that?)
Wha ever wi’ Kerroughtree met,
And has a doubt of a’ that?
For a’ that, and a’ that,
Here’s Heron yet for a’ that!
The independent patriot,
The honest man, and a’ that.
Tho’ wit and worth, in either sex,
Saint Mary’s Isle can shaw that,
Wi’ Dukes and Lords let Selkirk mix,
And weel does Selkirk fa’ that.
For a’ that, and a’ that,
Here’s Heron yet for a’ that!
The independent commoner
Shall be the man for a’ that.
But why should we to Nobles jouk,
And is’t against the law, that?
For why, a Lord may be a gowk,
Wi’ ribband, star and a’ that,
For a’ that, and a’ that,
Here’s Heron yet for a’ that!
A Lord may be a lousy loun,
Wi’ ribband, star and a’ that.
A beardless boy comes o’er the hills,
Wi’ uncle’s purse and a’ that;
But we’ll hae ane frae mang oursels,
A man we ken, and a’ that.
For a’ that, and a’ that,
Here’s Heron yet for a’ that!
For we’re not to be bought and sold,
Like naigs, and nowt, and a’ that.
Then let us drink—The Stewartry,
Kerroughtree’s laird, and a’ that,
Our representative to be,
For weel he’s worthy a’ that.
For a’ that, and a’ that,
Here’s Heron yet for a’ that!
A House of Commons such as he,
They wad be blest that saw that.
|
Written by
Robert Burns |
O WILLIE 1 brew’d a peck o’ maut,
And Rob and Allen cam to see;
Three blyther hearts, that lee-lang night,
Ye wadna found in Christendie.
Chorus.—We are na fou, we’re nae that fou,
But just a drappie in our ee;
The cock may craw, the day may daw
And aye we’ll taste the barley bree.
Here are we met, three merry boys,
Three merry boys I trow are we;
And mony a night we’ve merry been,
And mony mae we hope to be!
We are na fou, &c.
It is the moon, I ken her horn,
That’s blinkin’ in the lift sae hie;
She shines sae bright to wyle us hame,
But, by my sooth, she’ll wait a wee!
We are na fou, &c.
Wha first shall rise to gang awa,
A cuckold, coward loun is he!
Wha first beside his chair shall fa’,
He is the King amang us three.
We are na fou, &c.
Note 1. Willie is Nicol, Allan is Masterton the writing-master. The scene is between Moffat and the head of the Loch of the Lowes. Date, August-September, 1789.—Lang. [back]
|
Written by
Robert Burns |
DOES haughty Gaul invasion threat?
Then let the louns beware, Sir;
There’s wooden walls upon our seas,
And volunteers on shore, Sir:
The Nith shall run to Corsincon,
And Criffel sink in Solway,
Ere we permit a Foreign Foe
On British ground to rally!
We’ll ne’er permit a Foreign Foe
On British ground to rally!
O let us not, like snarling curs,
In wrangling be divided,
Till, slap! come in an unco loun,
And wi’ a rung decide it!
Be Britain still to Britain true,
Amang ourselves united;
For never but by British hands
Maun British wrangs be righted!
No! never but by British hands
Shall British wrangs be righted!
The Kettle o’ the Kirk and State,
Perhaps a clout may fail in’t;
But deil a foreign tinkler loun
Shall ever ca’a nail in’t.
Our father’s blude the Kettle bought,
And wha wad dare to spoil it;
By Heav’ns! the sacrilegious dog
Shall fuel be to boil it!
By Heav’ns! the sacrilegious dog
Shall fuel be to boil it!
The wretch that would a tyrant own,
And the wretch, his true-born brother,
Who would set the Mob aboon the Throne,
May they be damn’d together!
Who will not sing “God save the King,”
Shall hang as high’s the steeple;
But while we sing “God save the King,”
We’ll ne’er forget THE PEOPLE!
But while we sing “God save the King,”
We’ll ne’er forget THE PEOPLE!
|