Written by
William Dunbar |
RORATE coeli desuper!
Hevins, distil your balmy schouris!
For now is risen the bricht day-ster,
Fro the rose Mary, flour of flouris:
The cleir Sone, quhom no cloud devouris,
Surmounting Phebus in the Est,
Is cumin of his hevinly touris:
Et nobis Puer natus est.
Archangellis, angellis, and dompnationis,
Tronis, potestatis, and marteiris seir,
And all ye hevinly operationis,
Ster, planeit, firmament, and spheir,
Fire, erd, air, and water cleir,
To Him gife loving, most and lest,
That come in to so meik maneir;
Et nobis Puer natus est.
Synnaris be glad, and penance do,
And thank your Maker hairtfully;
For he that ye micht nocht come to
To you is cumin full humbly
Your soulis with his blood to buy
And loose you of the fiendis arrest--
And only of his own mercy;
Pro nobis Puer natus est.
All clergy do to him inclyne,
And bow unto that bairn benyng,
And do your observance divyne
To him that is of kingis King:
Encense his altar, read and sing
In holy kirk, with mind degest,
Him honouring attour all thing
Qui nobis Puer natus est.
Celestial foulis in the air,
Sing with your nottis upon hicht,
In firthis and in forrestis fair
Be myrthful now at all your mycht;
For passit is your dully nicht,
Aurora has the cloudis perst,
The Sone is risen with glaidsum licht,
Et nobis Puer natus est.
Now spring up flouris fra the rute,
Revert you upward naturaly,
In honour of the blissit frute
That raiss up fro the rose Mary;
Lay out your levis lustily,
Fro deid take life now at the lest
In wirschip of that Prince worthy
Qui nobis Puer natus est.
Sing, hevin imperial, most of hicht!
Regions of air mak armony!
All fish in flud and fowl of flicht
Be mirthful and mak melody!
All Gloria in excelsis cry!
Heaven, erd, se, man, bird, and best,--
He that is crownit abone the sky
Pro nobis Puer natus est!
|
Written by
Rudyard Kipling |
This fell when dinner-time was done --
'Twixt the first an' the second rub --
That oor mon Jock cam' hame again
To his rooms ahist the Club.
An' syne he laughed, an' syne he sang,
An' syne we thocht him fou,
An' syne he trumped his partner's trick,
An' garred his partner rue.
Then up and spake an elder mon,
That held the Spade its Ace --
God save the lad! Whence comes the licht
"That wimples on his face?"
An' Jock he sniggered, an' Jock he smiled,
An' ower the card-brim wunk: --
"I'm a' too fresh fra' the stirrup-peg,
"May be that I am drunk.
"
"There's whusky brewed in Galashils
"An' L.
L.
L.
forbye;
"But never liquor lit the lowe
"That keeks fra' oot your eye.
"There's a third o' hair on your dress-coat breast,
"Aboon the heart a wee?"
"Oh! that is fra' the lang-haired Skye
"That slobbers ower me.
"
"Oh! lang-haired Skyes are lovin' beasts,
"An' terrier dogs are fair,
"But never yet was terrier born,
"Wi' ell-lang gowden hair!
"There's a smirch o' pouther on your breast,
"Below the left lappel?"
"Oh! that is fra' my auld cigar,
"Whenas the stump-end fell.
"
"Mon Jock, ye smoke the Trichi coarse,
"For ye are short o' cash,
"An' best Havanas Couldna leave
"Sae white an' pure an ash.
"This nicht ye stopped a story braid,
"An' stopped it wi' a curse.
"Last nicht ye told that tale yoursel' --
"An' capped it wi' a worse!
"Oh! we're no fou! Oh! we're no fou!
"But plainly we can ken
"Ye're fallin', fallin' fra the band
"O' cantie single men!"
An' it fell when sirris-shaws were sere,
An' the nichts were lang and mirk,
In braw new breeks, wi' a gowden ring,
Or Jocke gaed to the Kirk!
|
Written by
Robert Louis Stevenson |
THE wind may blaw the lee-gang way
And aye the lift be mirk an' gray,
An deep the moss and steigh the brae
Where a' maun gang -
There's still an hoor in ilka day
For luve and sang.
And canty hearts are strangely steeled.
By some dikeside they'll find a bield,
Some couthy neuk by muir or field
They're sure to hit,
Where, frae the blatherin' wind concealed,
They'll rest a bit.
An' weel for them if kindly fate
Send ower the hills to them a mate;
They'll crack a while o' kirk an' State,
O' yowes an' rain:
An' when it's time to take the gate,
Tak' ilk his ain.
- Sic neuk beside the southern sea
I soucht - sic place o' quiet lee
Frae a' the winds o' life.
To me,
Fate, rarely fair,
Had set a freendly company
To meet me there.
Kindly by them they gart me sit,
An' blythe was I to bide a bit.
Licht as o' some hame fireside lit
My life for me.
- Ower early maun I rise an' quit
This happy lee.
|