Written by
Robert Burns |
GUID-MORNIN’ to our Majesty!
May Heaven augment your blisses
On ev’ry new birth-day ye see,
A humble poet wishes.
My bardship here, at your Levee
On sic a day as this is,
Is sure an uncouth sight to see,
Amang thae birth-day dresses
Sae fine this day.
I see ye’re complimented thrang,
By mony a lord an’ lady;
“God save the King” ’s a cuckoo sang
That’s unco easy said aye:
The poets, too, a venal gang,
Wi’ rhymes weel-turn’d an’ ready,
Wad gar you trow ye ne’er do wrang,
But aye unerring steady,
On sic a day.
For me! before a monarch’s face
Ev’n there I winna flatter;
For neither pension, post, nor place,
Am I your humble debtor:
So, nae reflection on your Grace,
Your Kingship to bespatter;
There’s mony waur been o’ the race,
And aiblins ane been better
Than you this day.
’Tis very true, my sovereign King,
My skill may weel be doubted;
But facts are chiels that winna ding,
An’ downa be disputed:
Your royal nest, beneath your wing,
Is e’en right reft and clouted,
And now the third part o’ the string,
An’ less, will gang aboot it
Than did ae day.
1
Far be’t frae me that I aspire
To blame your legislation,
Or say, ye wisdom want, or fire,
To rule this mighty nation:
But faith! I muckle doubt, my sire,
Ye’ve trusted ministration
To chaps wha in barn or byre
Wad better fill’d their station
Than courts yon day.
And now ye’ve gien auld Britain peace,
Her broken shins to plaister,
Your sair taxation does her fleece,
Till she has scarce a tester:
For me, thank God, my life’s a lease,
Nae bargain wearin’ faster,
Or, faith! I fear, that, wi’ the geese,
I shortly boost to pasture
I’ the craft some day.
I’m no mistrusting Willie Pitt,
When taxes he enlarges,
(An’ Will’s a true guid fallow’s get,
A name not envy spairges),
That he intends to pay your debt,
An’ lessen a’ your charges;
But, God-sake! let nae saving fit
Abridge your bonie barges
An’boats this day.
Adieu, my Liege; may freedom geck
Beneath your high protection;
An’ may ye rax Corruption’s neck,
And gie her for dissection!
But since I’m here, I’ll no neglect,
In loyal, true affection,
To pay your Queen, wi’ due respect,
May fealty an’ subjection
This great birth-day.
Hail, Majesty most Excellent!
While nobles strive to please ye,
Will ye accept a compliment,
A simple poet gies ye?
Thae bonie bairntime, Heav’n has lent,
Still higher may they heeze ye
In bliss, till fate some day is sent
For ever to release ye
Frae care that day.
For you, young Potentate o’Wales,
I tell your highness fairly,
Down Pleasure’s stream, wi’ swelling sails,
I’m tauld ye’re driving rarely;
But some day ye may gnaw your nails,
An’ curse your folly sairly,
That e’er ye brak Diana’s pales,
Or rattl’d dice wi’ Charlie
By night or day.
Yet aft a ragged cowt’s been known,
To mak a noble aiver;
So, ye may doucely fill the throne,
For a’their clish-ma-claver:
There, him 2 at Agincourt wha shone,
Few better were or braver:
And yet, wi’ funny, ***** Sir John, 3
He was an unco shaver
For mony a day.
For you, right rev’rend Osnaburg,
Nane sets the lawn-sleeve sweeter,
Altho’ a ribbon at your lug
Wad been a dress completer:
As ye disown yon paughty dog,
That bears the keys of Peter,
Then swith! an’ get a wife to hug,
Or trowth, ye’ll stain the mitre
Some luckless day!
Young, royal Tarry-breeks, I learn,
Ye’ve lately come athwart her—
A glorious galley, 4 stem and stern,
Weel rigg’d for Venus’ barter;
But first hang out, that she’ll discern,
Your hymeneal charter;
Then heave aboard your grapple airn,
An’ large upon her quarter,
Come full that day.
Ye, lastly, bonie blossoms a’,
Ye royal lasses dainty,
Heav’n mak you guid as well as braw,
An’ gie you lads a-plenty!
But sneer na British boys awa!
For kings are unco scant aye,
An’ German gentles are but sma’,
They’re better just than want aye
On ony day.
Gad bless you a’! consider now,
Ye’re unco muckle dautit;
But ere the course o’ life be through,
It may be bitter sautit:
An’ I hae seen their coggie fou,
That yet hae tarrow’t at it.
But or the day was done, I trow,
The laggen they hae clautit
Fu’ clean that day.
Note 1.
The American colonies had recently been lost.
[back]
Note 2.
King Henry V.
—R.
B.
[back]
Note 3.
Sir John Falstaff, vid.
Shakespeare.
—R.
B.
[back]
Note 4.
Alluding to the newspaper account of a certain Royal sailor’s amour.
—R.
B.
This was Prince William Henry, third son of George III, afterward King William IV.
[back]
|
Written by
Barry Tebb |
Sorry, Neil Oram (with an orange in my pocket)
I can’t make ,your loch-side commune by bonny Drummadrochit.
Sorry Brenda Williams, I can’t share your park bench protest near the Royal Free
At sixty I need a fire and slippers, -4 outside just isn’t me.
Sorry, Chris Torrance, I can’t make your Welsh eyrie
Just spelling Gymmercher Isaf Pontneathvaughan quite fazes me.
Sorry, Seamus Famous, your hide away in Dublin Bay
No doubt is bloody grand but I can’t face the journey to a far off foreign land.
Sorry James Kirkup, your Andorran niche
Is just too complicated for me to ever reach.
Apologies especially to Emily Bronte’s ghost -
You are the mostest hostess that I could ever boast
Your heather moor and cobbled street’s allure
Are something I’ve put off until the braw New Year.
|
Written by
Robert Burns |
MY lov’d, my honour’d, much respected friend!
No mercenary bard his homage pays;
With honest pride, I scorn each selfish end,
My dearest meed, a friend’s esteem and praise:
To you I sing, in simple Scottish lays,
The lowly train in life’s sequester’d scene,
The native feelings strong, the guileless ways,
What Aiken in a cottage would have been;
Ah! tho’ his worth unknown, far happier there I ween!
November chill blaws loud wi’ angry sugh;
The short’ning winter-day is near a close;
The miry beasts retreating frae the pleugh;
The black’ning trains o’ craws to their repose:
The toil-worn Cotter frae his labour goes,—
This night his weekly moil is at an end,
Collects his spades, his mattocks, and his hoes,
Hoping the morn in ease and rest to spend,
And weary, o’er the moor, his course does hameward bend.
At length his lonely cot appears in view,
Beneath the shelter of an aged tree;
Th’ expectant wee-things, toddlin, stacher through
To meet their dead, wi’ flichterin noise and glee.
His wee bit ingle, blinkin bonilie,
His clean hearth-stane, his thrifty wifie’s smile,
The lisping infant, prattling on his knee,
Does a’ his weary kiaugh and care beguile,
And makes him quite forget his labour and his toil.
Belyve, the elder bairns come drapping in,
At service out, amang the farmers roun’;
Some ca’ the pleugh, some herd, some tentie rin
A cannie errand to a neibor town:
Their eldest hope, their Jenny, woman-grown,
In youthfu’ bloom-love sparkling in her e’e—
Comes hame, perhaps to shew a braw new gown,
Or deposite her sair-won penny-fee,
To help her parents dear, if they in hardship be.
With joy unfeign’d, brothers and sisters meet,
And each for other’s weelfare kindly speirs:
The social hours, swift-wing’d, unnotic’d fleet:
Each tells the uncos that he sees or hears.
The parents, partial, eye their hopeful years;
Anticipation forward points the view;
The mother, wi’ her needle and her shears,
Gars auld claes look amaist as weel’s the new;
The father mixes a’ wi’ admonition due.
Their master’s and their mistress’ command,
The younkers a’ are warned to obey;
And mind their labours wi’ an eydent hand,
And ne’er, tho’ out o’ sight, to jauk or play;
“And O! be sure to fear the Lord alway,
And mind your duty, duly, morn and night;
Lest in temptation’s path ye gang astray,
Implore His counsel and assisting might:
They never sought in vain that sought the Lord aright.
”
But hark! a rap comes gently to the door;
Jenny, wha kens the meaning o’ the same,
Tells how a neibor lad came o’er the moor,
To do some errands, and convoy her hame.
The wily mother sees the conscious flame
Sparkle in Jenny’s e’e, and flush her cheek;
With heart-struck anxious care, enquires his name,
While Jenny hafflins is afraid to speak;
Weel-pleased the mother hears, it’s nae wild, worthless rake.
Wi’ kindly welcome, Jenny brings him ben;
A strappin youth, he takes the mother’s eye;
Blythe Jenny sees the visit’s no ill ta’en;
The father cracks of horses, pleughs, and kye.
The youngster’s artless heart o’erflows wi’ joy,
But blate an’ laithfu’, scarce can weel behave;
The mother, wi’ a woman’s wiles, can spy
What makes the youth sae bashfu’ and sae grave,
Weel-pleas’d to think her bairn’s respected like the lave.
O happy love! where love like this is found:
O heart-felt raptures! bliss beyond compare!
I’ve paced much this weary, mortal round,
And sage experience bids me this declare,—
“If Heaven a draught of heavenly pleasure spare—
One cordial in this melancholy vale,
’Tis when a youthful, loving, modest pair
In other’sarms, breathe out the tender tale,
Beneath the milk-white thorn that scents the evening gale.
”
Is there, in human form, that bears a heart,
A wretch! a villain! lost to love and truth!
That can, with studied, sly, ensnaring art,
Betray sweet Jenny’s unsuspecting youth?
Curse on his perjur’d arts! dissembling smooth!
Are honour, virtue, conscience, all exil’d?
Is there no pity, no relenting ruth,
Points to the parents fondling o’er their child?
Then paints the ruin’d maid, and their distraction wild?
But now the supper crowns their simple board,
The halesome parritch, chief of Scotia’s food;
The sowp their only hawkie does afford,
That, ’yont the hallan snugly chows her cood:
The dame brings forth, in complimental mood,
To grace the lad, her weel-hain’d kebbuck, fell;
And aft he’s prest, and aft he ca’s it guid:
The frugal wifie, garrulous, will tell
How t’was a towmond auld, sin’ lint was i’ the bell.
The cheerfu’ supper done, wi’ serious face,
They, round the ingle, form a circle wide;
The sire turns o’er, with patriarchal grace,
The big ha’bible, ance his father’s pride:
His bonnet rev’rently is laid aside,
His lyart haffets wearing thin and bare;
Those strains that once did sweet in Zion glide,
He wales a portion with judicious care;
And “Let us worship God!” he says with solemn air.
They chant their artless notes in simple guise,
They tune their hearts, by far the noblest aim;
Perhaps Dundee’s wild-warbling measures rise;
Or plaintive Martyrs, worthy of the name;
Or noble Elgin beets the heaven-ward flame;
The sweetest far of Scotia’s holy lays:
Compar’d with these, Italian trills are tame;
The tickl’d ears no heart-felt raptures raise;
Nae unison hae they with our Creator’s praise.
The priest-like father reads the sacred page,
How Abram was the friend of God on high;
Or Moses bade eternal warfare wage
With Amalek’s ungracious progeny;
Or how the royal bard did groaning lie
Beneath the stroke of Heaven’s avenging ire;
Or Job’s pathetic plaint, and wailing cry;
Or rapt Isaiah’s wild, seraphic fire;
Or other holy seers that tune the sacred lyre.
Perhaps the Christian volume is the theme,
How guiltless blood for guilty man was shed;
How He, who bore in Heaven the second name,
Had not on earth whereon to lay His head:
How His first followers and servants sped;
The precepts sage they wrote to many a land:
How he, who lone in Patmos banished,
Saw in the sun a mighty angel stand,
And heard great Bab’lon’s doom pronounc’d by Heaven’s command.
Then, kneeling down to Heaven’s Eternal King,
The saint, the father, and the husband prays:
Hope “springs exulting on triumphant wing,” 1
That thus they all shall meet in future days,
There, ever bask in uncreated rays,
No more to sigh, or shed the bitter tear,
Together hymning their Creator’s praise,
In such society, yet still more dear;
While circling Time moves round in an eternal sphere
Compar’d with this, how poor Religion’s pride,
In all the pomp of method, and of art;
When men display to congregations wide
Devotion’s ev’ry grace, except the heart!
The Power, incens’d, the pageant will desert,
The pompous strain, the sacerdotal stole;
But haply, in some cottage far apart,
May hear, well-pleas’d, the language of the soul;
And in His Book of Life the inmates poor enroll.
Then homeward all take off their sev’ral way;
The youngling cottagers retire to rest:
The parent-pair their secret homage pay,
And proffer up to Heaven the warm request,
That he who stills the raven’s clam’rous nest,
And decks the lily fair in flow’ry pride,
Would, in the way His wisdom sees the best,
For them and for their little ones provide;
But chiefly, in their hearts with grace divine preside.
From scenes like these, old Scotia’s grandeur springs,
That makes her lov’d at home, rever’d abroad:
Princes and lords are but the breath of kings,
“An honest man’s the noblest work of God;”
And certes, in fair virtue’s heavenly road,
The cottage leaves the palace far behind;
What is a lordling’s pomp? a cumbrous load,
Disguising oft the wretch of human kind,
Studied in arts of hell, in wickedness refin’d!
O Scotia! my dear, my native soil!
For whom my warmest wish to Heaven is sent,
Long may thy hardy sons of rustic toil
Be blest with health, and peace, and sweet content!
And O! may Heaven their simple lives prevent
From luxury’s contagion, weak and vile!
Then howe’er crowns and coronets be rent,
A virtuous populace may rise the while,
And stand a wall of fire around their much-lov’d isle.
O Thou! who pour’d the patriotic tide,
That stream’d thro’ Wallace’s undaunted heart,
Who dar’d to nobly stem tyrannic pride,
Or nobly die, the second glorious part:
(The patriot’s God peculiarly thou art,
His friend, inspirer, guardian, and reward!)
O never, never Scotia’s realm desert;
But still the patriot, and the patriot-bard
In bright succession raise, her ornament and guard!
Note 1.
Pope’s “Windsor Forest.
”—R.
B.
[back]
|
Written by
Robert William Service |
How grand the human race would be
If every man would wear a kilt,
A flirt of Tartan finery,
Instead of trousers, custom built!
Nay, do not think I speak to joke:
(You know I'm not that kind of man),
I am convinced that all men folk.
Should wear the costume of a Clan.
Imagine how it's braw and clean
As in the wind it flutters free;
And so conducive to hygiene
In its sublime simplicity.
No fool fly-buttons to adjust,--
Wi' shanks and maybe buttocks bare;
Oh chiels, just take my word on trust,
A bonny kilt's the only wear.
'Twill save a lot of siller too,
(And here a canny Scotsman speaks),
For one good kilt will wear you through
A half-a-dozen pairs of breeks.
And how it's healthy in the breeze!
And how it swings with saucy tilt!
How lassies love athletic knees
Below the waggle of a kilt!
True, I just wear one in my mind,
Since sent to school by Celtic aunts,
When girls would flip it up behind,
Until I begged for lowland pants.
But now none dare do that to me,
And so I sing with lyric lilt,--
How happier the world would be
If every male would wear a kilt!
|
Written by
Robert Burns |
EXPECT na, sir, in this narration,
A fleechin, fleth’rin Dedication,
To roose you up, an’ ca’ you guid,
An’ sprung o’ great an’ noble bluid,
Because ye’re surnam’d like His Grace—
Perhaps related to the race:
Then, when I’m tir’d-and sae are ye,
Wi’ mony a fulsome, sinfu’ lie,
Set up a face how I stop short,
For fear your modesty be hurt.
This may do—maun do, sir, wi’ them wha
Maun please the great folk for a wamefou;
For me! sae laigh I need na bow,
For, Lord be thankit, I can plough;
And when I downa yoke a naig,
Then, Lord be thankit, I can beg;
Sae I shall say—an’ that’s nae flatt’rin—
It’s just sic Poet an’ sic Patron.
The Poet, some guid angel help him,
Or else, I fear, some ill ane skelp him!
He may do weel for a’ he’s done yet,
But only—he’s no just begun yet.
The Patron (sir, ye maun forgie me;
I winna lie, come what will o’ me),
On ev’ry hand it will allow’d be,
He’s just—nae better than he should be.
I readily and freely grant,
He downa see a poor man want;
What’s no his ain, he winna tak it;
What ance he says, he winna break it;
Ought he can lend he’ll no refus’t,
Till aft his guidness is abus’d;
And rascals whiles that do him wrang,
Ev’n that, he does na mind it lang;
As master, landlord, husband, father,
He does na fail his part in either.
But then, nae thanks to him for a’that;
Nae godly symptom ye can ca’ that;
It’s naething but a milder feature
Of our poor, sinfu’ corrupt nature:
Ye’ll get the best o’ moral works,
’Mang black Gentoos, and pagan Turks,
Or hunters wild on Ponotaxi,
Wha never heard of orthodoxy.
That he’s the poor man’s friend in need,
The gentleman in word and deed,
It’s no thro’ terror of damnation;
It’s just a carnal inclination.
Morality, thou deadly bane,
Thy tens o’ thousands thou hast slain!
Vain is his hope, whase stay an’ trust is
In moral mercy, truth, and justice!
No—stretch a point to catch a plack:
Abuse a brother to his back;
Steal through the winnock frae a whore,
But point the rake that taks the door;
Be to the poor like ony whunstane,
And haud their noses to the grunstane;
Ply ev’ry art o’ legal thieving;
No matter—stick to sound believing.
Learn three-mile pray’rs, an’ half-mile graces,
Wi’ weel-spread looves, an’ lang, wry faces;
Grunt up a solemn, lengthen’d groan,
And damn a’ parties but your own;
I’ll warrant they ye’re nae deceiver,
A steady, sturdy, staunch believer.
O ye wha leave the springs o’ Calvin,
For gumlie dubs of your ain delvin!
Ye sons of Heresy and Error,
Ye’ll some day squeel in quaking terror,
When Vengeance draws the sword in wrath.
And in the fire throws the sheath;
When Ruin, with his sweeping besom,
Just frets till Heav’n commission gies him;
While o’er the harp pale Misery moans,
And strikes the ever-deep’ning tones,
Still louder shrieks, and heavier groans!
Your pardon, sir, for this digression:
I maist forgat my Dedication;
But when divinity comes ’cross me,
My readers still are sure to lose me.
So, sir, you see ’twas nae daft vapour;
But I maturely thought it proper,
When a’ my works I did review,
To dedicate them, sir, to you:
Because (ye need na tak it ill),
I thought them something like yoursel’.
Then patronize them wi’ your favor,
And your petitioner shall ever——
I had amaist said, ever pray,
But that’s a word I need na say;
For prayin, I hae little skill o’t,
I’m baith dead-sweer, an’ wretched ill o’t;
But I’se repeat each poor man’s pray’r,
That kens or hears about you, sir.
——
“May ne’er Misfortune’s gowling bark,
Howl thro’ the dwelling o’ the clerk!
May ne’er his genrous, honest heart,
For that same gen’rous spirit smart!
May Kennedy’s far-honour’d name
Lang beet his hymeneal flame,
Till Hamiltons, at least a dizzen,
Are frae their nuptial labours risen:
Five bonie lasses round their table,
And sev’n braw fellows, stout an’ able,
To serve their king an’ country weel,
By word, or pen, or pointed steel!
May health and peace, with mutual rays,
Shine on the ev’ning o’ his days;
Till his wee, curlie John’s ier-oe,
When ebbing life nae mair shall flow,
The last, sad, mournful rites bestow!”
I will not wind a lang conclusion,
With complimentary effusion;
But, whilst your wishes and endeavours
Are blest with Fortune’s smiles and favours,
I am, dear sir, with zeal most fervent,
Your much indebted, humble servant.
But if (which Pow’rs above prevent)
That iron-hearted carl, Want,
Attended, in his grim advances,
By sad mistakes, and black mischances,
While hopes, and joys, and pleasures fly him,
Make you as poor a dog as I am,
Your humble servant then no more;
For who would humbly serve the poor?
But, by a poor man’s hopes in Heav’n!
While recollection’s pow’r is giv’n—
If, in the vale of humble life,
The victim sad of fortune’s strife,
I, thro’ the tender-gushing tear,
Should recognise my master dear;
If friendless, low, we meet together,
Then, sir, your hand—my Friend and Brother!
|
Written by
Robert Burns |
’TWAS 1 in that place o’ Scotland’s isle,
That bears the name o’ auld King Coil,
Upon a bonie day in June,
When wearin’ thro’ the afternoon,
Twa dogs, that were na thrang at hame,
Forgather’d ance upon a time.
The first I’ll name, they ca’d him Caesar,
Was keepit for His Honor’s pleasure:
His hair, his size, his mouth, his lugs,
Shew’d he was nane o’ Scotland’s dogs;
But whalpit some place far abroad,
Whare sailors gang to fish for cod.
His locked, letter’d, braw brass collar
Shew’d him the gentleman an’ scholar;
But though he was o’ high degree,
The fient a pride, nae pride had he;
But wad hae spent an hour caressin,
Ev’n wi’ al tinkler-gipsy’s messin:
At kirk or market, mill or smiddie,
Nae tawted tyke, tho’ e’er sae duddie,
But he wad stan’t, as glad to see him,
An’ stroan’t on stanes an’ hillocks wi’ him.
The tither was a ploughman’s collie—
A rhyming, ranting, raving billie,
Wha for his friend an’ comrade had him,
And in freak had Luath ca’d him,
After some dog in Highland Sang, 2
Was made lang syne,—Lord knows how lang.
He was a gash an’ faithfu’ tyke,
As ever lap a sheugh or dyke.
His honest, sonsie, baws’nt face
Aye gat him friends in ilka place;
His breast was white, his touzie back
Weel clad wi’ coat o’ glossy black;
His gawsie tail, wi’ upward curl,
Hung owre his hurdie’s wi’ a swirl.
Nae doubt but they were fain o’ ither,
And unco pack an’ thick thegither;
Wi’ social nose whiles snuff’d an’ snowkit;
Whiles mice an’ moudieworts they howkit;
Whiles scour’d awa’ in lang excursion,
An’ worry’d ither in diversion;
Until wi’ daffin’ weary grown
Upon a knowe they set them down.
An’ there began a lang digression.
About the “lords o’ the creation.
”
CÆSAR I’ve aften wonder’d, honest Luath,
What sort o’ life poor dogs like you have;
An’ when the gentry’s life I saw,
What way poor bodies liv’d ava.
Our laird gets in his racked rents,
His coals, his kane, an’ a’ his stents:
He rises when he likes himsel’;
His flunkies answer at the bell;
He ca’s his coach; he ca’s his horse;
He draws a bonie silken purse,
As lang’s my tail, where, thro’ the steeks,
The yellow letter’d Geordie keeks.
Frae morn to e’en, it’s nought but toiling
At baking, roasting, frying, boiling;
An’ tho’ the gentry first are stechin,
Yet ev’n the ha’ folk fill their pechan
Wi’ sauce, ragouts, an’ sic like trashtrie,
That’s little short o’ downright wastrie.
Our whipper-in, wee, blasted wonner,
Poor, worthless elf, it eats a dinner,
Better than ony tenant-man
His Honour has in a’ the lan’:
An’ what poor cot-folk pit their painch in,
I own it’s past my comprehension.
LUATH Trowth, C&æsar, whiles they’re fash’t eneugh:
A cottar howkin in a sheugh,
Wi’ dirty stanes biggin a dyke,
Baring a quarry, an’ sic like;
Himsel’, a wife, he thus sustains,
A smytrie o’ wee duddie weans,
An’ nought but his han’-daurk, to keep
Them right an’ tight in thack an’ rape.
An’ when they meet wi’ sair disasters,
Like loss o’ health or want o’ masters,
Ye maist wad think, a wee touch langer,
An’ they maun starve o’ cauld an’ hunger:
But how it comes, I never kent yet,
They’re maistly wonderfu’ contented;
An’ buirdly chiels, an’ clever hizzies,
Are bred in sic a way as this is.
CÆSAR But then to see how ye’re negleckit,
How huff’d, an’ cuff’d, an’ disrespeckit!
Lord man, our gentry care as little
For delvers, ditchers, an’ sic cattle;
They gang as saucy by poor folk,
As I wad by a stinkin brock.
I’ve notic’d, on our laird’s court-day,—
An’ mony a time my heart’s been wae,—
Poor tenant bodies, scant o’cash,
How they maun thole a factor’s snash;
He’ll stamp an’ threaten, curse an’ swear
He’ll apprehend them, poind their gear;
While they maun stan’, wi’ aspect humble,
An’ hear it a’, an’ fear an’ tremble!
I see how folk live that hae riches;
But surely poor-folk maun be wretches!
LUATH They’re no sae wretched’s ane wad think.
Tho’ constantly on poortith’s brink,
They’re sae accustom’d wi’ the sight,
The view o’t gives them little fright.
Then chance and fortune are sae guided,
They’re aye in less or mair provided:
An’ tho’ fatigued wi’ close employment,
A blink o’ rest’s a sweet enjoyment.
The dearest comfort o’ their lives,
Their grushie weans an’ faithfu’ wives;
The prattling things are just their pride,
That sweetens a’ their fire-side.
An’ whiles twalpennie worth o’ nappy
Can mak the bodies unco happy:
They lay aside their private cares,
To mind the Kirk and State affairs;
They’ll talk o’ patronage an’ priests,
Wi’ kindling fury i’ their breasts,
Or tell what new taxation’s comin,
An’ ferlie at the folk in Lon’on.
As bleak-fac’d Hallowmass returns,
They get the jovial, rantin kirns,
When rural life, of ev’ry station,
Unite in common recreation;
Love blinks, Wit slaps, an’ social Mirth
Forgets there’s Care upo’ the earth.
That merry day the year begins,
They bar the door on frosty win’s;
The nappy reeks wi’ mantling ream,
An’ sheds a heart-inspiring steam;
The luntin pipe, an’ sneeshin mill,
Are handed round wi’ right guid will;
The cantie auld folks crackin crouse,
The young anes rantin thro’ the house—
My heart has been sae fain to see them,
That I for joy hae barkit wi’ them.
Still it’s owre true that ye hae said,
Sic game is now owre aften play’d;
There’s mony a creditable stock
O’ decent, honest, fawsont folk,
Are riven out baith root an’ branch,
Some rascal’s pridefu’ greed to quench,
Wha thinks to knit himsel the faster
In favour wi’ some gentle master,
Wha, aiblins, thrang a parliamentin,
For Britain’s guid his saul indentin—
CÆSAR Haith, lad, ye little ken about it:
For Britain’s guid! guid faith! I doubt it.
Say rather, gaun as Premiers lead him:
An’ saying ay or no’s they bid him:
At operas an’ plays parading,
Mortgaging, gambling, masquerading:
Or maybe, in a frolic daft,
To Hague or Calais takes a waft,
To mak a tour an’ tak a whirl,
To learn bon ton, an’ see the worl’.
There, at Vienna, or Versailles,
He rives his father’s auld entails;
Or by Madrid he takes the rout,
To thrum guitars an’ fecht wi’ nowt;
Or down Italian vista startles,
Wh-re-hunting amang groves o’ myrtles:
Then bowses drumlie German-water,
To mak himsel look fair an’ fatter,
An’ clear the consequential sorrows,
Love-gifts of Carnival signoras.
For Britain’s guid! for her destruction!
Wi’ dissipation, feud, an’ faction.
LUATH Hech, man! dear sirs! is that the gate
They waste sae mony a braw estate!
Are we sae foughten an’ harass’d
For gear to gang that gate at last?
O would they stay aback frae courts,
An’ please themsels wi’ country sports,
It wad for ev’ry ane be better,
The laird, the tenant, an’ the cotter!
For thae frank, rantin, ramblin billies,
Feint haet o’ them’s ill-hearted fellows;
Except for breakin o’ their timmer,
Or speakin lightly o’ their limmer,
Or shootin of a hare or moor-cock,
The ne’er-a-bit they’re ill to poor folk,
But will ye tell me, Master C&æsar,
Sure great folk’s life’s a life o’ pleasure?
Nae cauld nor hunger e’er can steer them,
The very thought o’t need na fear them.
CÆSAR L—d, man, were ye but whiles whare I am,
The gentles, ye wad ne’er envy them!
It’s true, they need na starve or sweat,
Thro’ winter’s cauld, or simmer’s heat:
They’ve nae sair wark to craze their banes,
An’ fill auld age wi’ grips an’ granes:
But human bodies are sic fools,
For a’ their colleges an’ schools,
That when nae real ills perplex them,
They mak enow themsel’s to vex them;
An’ aye the less they hae to sturt them,
In like proportion, less will hurt them.
A country fellow at the pleugh,
His acre’s till’d, he’s right eneugh;
A country girl at her wheel,
Her dizzen’s dune, she’s unco weel;
But gentlemen, an’ ladies warst,
Wi’ ev’n-down want o’ wark are curst.
They loiter, lounging, lank an’ lazy;
Tho’ deil-haet ails them, yet uneasy;
Their days insipid, dull, an’ tasteless;
Their nights unquiet, lang, an’ restless.
An’ev’n their sports, their balls an’ races,
Their galloping through public places,
There’s sic parade, sic pomp, an’ art,
The joy can scarcely reach the heart.
The men cast out in party-matches,
Then sowther a’ in deep debauches.
Ae night they’re mad wi’ drink an’ whoring,
Niest day their life is past enduring.
The ladies arm-in-arm in clusters,
As great an’ gracious a’ as sisters;
But hear their absent thoughts o’ ither,
They’re a’ run-deils an’ jads thegither.
Whiles, owre the wee bit cup an’ platie,
They sip the scandal-potion pretty;
Or lee-lang nights, wi’ crabbit leuks
Pore owre the devil’s pictur’d beuks;
Stake on a chance a farmer’s stackyard,
An’ cheat like ony unhanged blackguard.
There’s some exceptions, man an’ woman;
But this is gentry’s life in common.
By this, the sun was out of sight,
An’ darker gloamin brought the night;
The bum-clock humm’d wi’ lazy drone;
The kye stood rowtin i’ the loan;
When up they gat an’ shook their lugs,
Rejoic’d they werena men but dogs;
An’ each took aff his several way,
Resolv’d to meet some ither day.
Note 1.
Luath was Burns’ own dog.
[back]
Note 2.
Cuchullin’s dog in Ossian’s “Fingal.
”—R.
B.
[back]
|
Written by
Robert William Service |
"Hae ye heard whit ma auld mither's postit tae me?
It fair maks me hamesick," says Private McPhee.
"And whit did she send ye?" says Private McPhun,
As he cockit his rifle and bleezed at a Hun.
"A haggis! A Haggis!" says Private McPhee;
"The brawest big haggis I ever did see.
And think! it's the morn when fond memory turns
Tae haggis and whuskey--the Birthday o' Burns.
We maun find a dram; then we'll ca' in the rest
O' the lads, and we'll hae a Burns' Nicht wi' the best.
"
"Be ready at sundoon," snapped Sergeant McCole;
"I want you two men for the List'nin' Patrol.
"
Then Private McPhee looked at Private McPhun:
"I'm thinkin', ma lad, we're confoundedly done.
"
Then Private McPhun looked at Private McPhee:
"I'm thinkin' auld chap, it's a' aff wi' oor spree.
"
But up spoke their crony, wee Wullie McNair:
"Jist lea' yer braw haggis for me tae prepare;
And as for the dram, if I search the camp roun',
We maun hae a drappie tae jist haud it doon.
Sae rin, lads, and think, though the nicht it be black,
O' the haggis that's waitin' ye when ye get back.
"
My! but it wis waesome on Naebuddy's Land,
And the deid they were rottin' on every hand.
And the rockets like corpse candles hauntit the sky,
And the winds o' destruction went shudderin' by.
There wis skelpin' o' bullets and skirlin' o' shells,
And breengin' o' bombs and a thoosand death-knells;
But cooryin' doon in a Jack Johnson hole
Little fashed the twa men o' the List'nin' Patrol.
For sweeter than honey and bricht as a gem
Wis the thocht o' the haggis that waitit for them.
Yet alas! in oor moments o' sunniest cheer
Calamity's aften maist cruelly near.
And while the twa talked o' their puddin' divine
The Boches below them were howkin' a mine.
And while the twa cracked o' the feast they would hae,
The fuse it wis burnin' and burnin' away.
Then sudden a roar like the thunner o' doom,
A hell-leap o' flame .
.
.
then the wheesht o' the tomb.
"Haw, Jock! Are ye hurtit?" says Private McPhun.
"Ay, Geordie, they've got me; I'm fearin' I'm done.
It's ma leg; I'm jist thinkin' it's aff at the knee;
Ye'd best gang and leave me," says Private McPhee.
"Oh leave ye I wunna," says Private McPhun;
"And leave ye I canna, for though I micht run,
It's no faur I wud gang, it's no muckle I'd see:
I'm blindit, and that's whit's the maitter wi' me.
"
Then Private McPhee sadly shakit his heid:
"If we bide here for lang, we'll be bidin' for deid.
And yet, Geordie lad, I could gang weel content
If I'd tasted that haggis ma auld mither sent.
"
"That's droll," says McPhun; "ye've jist speakit ma mind.
Oh I ken it's a terrible thing tae be blind;
And yet it's no that that embitters ma lot--
It's missin' that braw muckle haggis ye've got.
"
For a while they were silent; then up once again
Spoke Private McPhee, though he whussilt wi' pain:
"And why should we miss it? Between you and me
We've legs for tae run, and we've eyes for tae see.
You lend me your shanks and I'll lend you ma sicht,
And we'll baith hae a kyte-fu' o' haggis the nicht.
"
Oh the sky it wis dourlike and dreepin' a wee,
When Private McPhun gruppit Private McPhee.
Oh the glaur it wis fylin' and crieshin' the grun',
When Private McPhee guidit Private McPhun.
"Keep clear o' them corpses--they're maybe no deid!
Haud on! There's a big muckle crater aheid.
Look oot! There's a sap; we'll be haein' a coup.
A staur-shell! For Godsake! Doun, lad, on yer daup.
Bear aff tae yer richt.
.
.
.
Aw yer jist daein' fine:
Before the nicht's feenished on haggis we'll dine.
"
There wis death and destruction on every hand;
There wis havoc and horror on Naebuddy's Land.
And the shells bickered doun wi' a crump and a glare,
And the hameless wee bullets were dingin' the air.
Yet on they went staggerin', cooryin' doun
When the stutter and cluck o' a Maxim crept roun'.
And the legs o' McPhun they were sturdy and stoot,
And McPhee on his back kept a bonnie look-oot.
"On, on, ma brave lad! We're no faur frae the goal;
I can hear the braw sweerin' o' Sergeant McCole.
"
But strength has its leemit, and Private McPhun,
Wi' a sab and a curse fell his length on the grun'.
Then Private McPhee shoutit doon in his ear:
"Jist think o' the haggis! I smell it from here.
It's gushin' wi' juice, it's embaumin' the air;
It's steamin' for us, and we're--jist--aboot--there.
"
Then Private McPhun answers: "Dommit, auld chap!
For the sake o' that haggis I'll gang till I drap.
"
And he gets on his feet wi' a heave and a strain,
And onward he staggers in passion and pain.
And the flare and the glare and the fury increase,
Till you'd think they'd jist taken a' hell on a lease.
And on they go reelin' in peetifu' plight,
And someone is shoutin' away on their right;
And someone is runnin', and noo they can hear
A sound like a prayer and a sound like a cheer;
And swift through the crash and the flash and the din,
The lads o' the Hielands are bringin' them in.
"They're baith sairly woundit, but is it no droll
Hoo they rave aboot haggis?" says Sergeant McCole.
When hirplin alang comes wee Wullie McNair,
And they a' wonnert why he wis greetin' sae sair.
And he says: "I'd jist liftit it oot o' the pot,
And there it lay steamin' and savoury hot,
When sudden I dooked at the fleech o' a shell,
And it--dropped on the haggis and dinged it tae hell.
"
And oh but the lads were fair taken aback;
Then sudden the order wis passed tae attack,
And up from the trenches like lions they leapt,
And on through the nicht like a torrent they swept.
On, on, wi' their bayonets thirstin' before!
On, on tae the foe wi' a rush and a roar!
And wild to the welkin their battle-cry rang,
And doon on the Boches like tigers they sprang:
And there wisna a man but had death in his ee,
For he thocht o' the haggis o' Private McPhee.
|
Written by
Robert Burns |
THOU’S 1 welcome, wean; mishanter fa’ me,
If thoughts o’ thee, or yet thy mamie,
Shall ever daunton me or awe me,
My bonie lady,
Or if I blush when thou shalt ca’ me
Tyta or daddie.
Tho’ now they ca’ me fornicator,
An’ tease my name in kintry clatter,
The mair they talk, I’m kent the better,
E’en let them clash;
An auld wife’s tongue’s a feckless matter
To gie ane fash.
Welcome! my bonie, sweet, wee dochter,
Tho’ ye come here a wee unsought for,
And tho’ your comin’ I hae fought for,
Baith kirk and queir;
Yet, by my faith, ye’re no unwrought for,
That I shall swear!
Wee image o’ my bonie Betty,
As fatherly I kiss and daut thee,
As dear, and near my heart I set thee
Wi’ as gude will
As a’ the priests had seen me get thee
That’s out o’ h—ll.
Sweet fruit o’ mony a merry dint,
My funny toil is now a’ tint,
Sin’ thou came to the warl’ asklent,
Which fools may scoff at;
In my last plack thy part’s be in’t
The better ha’f o’t.
Tho’ I should be the waur bestead,
Thou’s be as braw and bienly clad,
And thy young years as nicely bred
Wi’ education,
As ony brat o’ wedlock’s bed,
In a’ thy station.
Lord grant that thou may aye inherit
Thy mither’s person, grace, an’ merit,
An’ thy poor, worthless daddy’s spirit,
Without his failins,
’Twill please me mair to see thee heir it,
Than stockit mailens.
For if thou be what I wad hae thee,
And tak the counsel I shall gie thee,
I’ll never rue my trouble wi’ thee,
The cost nor shame o’t,
But be a loving father to thee,
And brag the name o’t.
Note 1.
Burns never published this poem.
[back]
|
Written by
Robert William Service |
Said President MacConnachie to Treasurer MacCall:
"We ought to have a piper for our next Saint Andrew's Ball.
Yon squakin' saxophone gives me the syncopated gripes.
I'm sick of jazz, I want to hear the skirling of the pipes.
"
"Alas! it's true," said Tam MacCall.
"The young folk of to-day
Are fox-trot mad and dinna ken a reel from Strathspey.
Now, what we want's a kiltie lad, primed up wi' mountain dew,
To strut the floor at supper time, and play a lilt or two.
In all the North there's only one; of him I've heard them speak:
His name is Jock MacPherson, and he lives on Boulder Creek;
An old-time hard-rock miner, and a wild and wastrel loon,
Who spends his nights in glory, playing pibrochs to the moon.
I'll seek him out; beyond a doubt on next Saint Andrew's night
We'll proudly hear the pipes to cheer and charm our appetite.
Oh lads were neat and lassies sweet who graced Saint Andrew's Ball;
But there was none so full of fun as Treasurer MacCall.
And as Maloney's rag-time bank struck up the newest hit,
He smiled a smile behind his hand, and chuckled: "Wait a bit.
"
And so with many a Celtic snort, with malice in his eye,
He watched the merry crowd cavort, till supper time drew nigh.
Then gleefully he seemed to steal, and sought the Nugget Bar,
Wherein there sat a tartaned chiel, as lonely as a star;
A huge and hairy Highlandman as hearty as a breeze,
A glass of whisky in his hand, his bag-pipes on his knees.
"Drink down your doch and doris, Jock," cried Treasurer MacCall;
"The time is ripe to up and pipe; they wait you in the hall.
Gird up your loins and grit your teeth, and here's a pint of hooch
To mind you of your native heath - jist pit it in your pooch.
Play on and on for all you're worth; you'll shame us if you stop.
Remember you're of Scottish birth - keep piping till you drop.
Aye, though a bunch of Willie boys should bluster and implore,
For the glory of the Highlands, lad, you've got to hold the floor.
"
The dancers were at supper, and the tables groaned with cheer,
When President MacConnachie exclaimed: "What do I hear?
Methinks it's like a chanter, and its coming from the hall.
"
"It's Jock MacPherson tuning up," cried Treasurer MacCall.
So up they jumped with shouts of glee, and gaily hurried forth.
Said they: "We never thought to see a piper in the North.
"
Aye, all the lads and lassies braw went buzzing out like bees,
And Jock MacPherson there they saw, with red and rugged knees.
Full six foot four he strode the floor, a grizzled son of Skye,
With glory in his whiskers and with whisky in his eye.
With skelping stride and Scottish pride he towered above them all:
"And is he no' a bonny sight?" said Treasurer MacCall.
While President MacConnachie was fairly daft with glee,
And there was jubilation in the Scottish Commy-tee.
But the dancers seemed uncertain, and they signified their doubt,
By dashing back to eat as fast as they had darted out.
And someone raised the question 'twixt the coffee and the cakes:
"Does the Piper walk to get away from all the noise he makes?"
Then reinforced with fancy food they slowly trickled forth,
And watching in patronizing mood the Piper of the North.
Proud, proud was Jock MacPherson, as he made his bag-pipes skirl,
And he set his sporran swinging, and he gave his kilts a whirl.
And President MacConnachie was jumping like a flea,
And there was joy and rapture in the Scottish Commy-tee.
"Jist let them have their saxophones wi' constipated squall;
We're having Heaven's music now," said Treasurer MacCall.
But the dancers waxed impatient, and they rather seemed to fret
For Maloney and the jazz of his Hibernian Quartette.
Yet little recked the Piper, as he swung with head on high,
Lamenting with MacCrimmon on the heather hills of Skye.
With Highland passion in his heart he held the centre floor;
Aye, Jock MacPherson played as he had never played before.
Maloney's Irish melodists were sitting in their place,
And as Maloney waited, there was wonder in his face.
'Twas sure the gorgeous music - Golly! wouldn't it be grand
If he could get MacPherson as a member of his band?
But the dancers moped and mumbled, as around the room they sat:
"We paid to dance," they grumbled; "But we cannot dance to that.
Of course we're not denying that it's really splendid stuff;
But it's mighty satisfying - don't you think we've had enough?"
"You've raised a pretty problem," answered Treasurer MacCall;
"For on Saint Andrew's Night, ye ken, the Piper rules the Ball.
"
Said President MacConnachie: "You've said a solemn thing.
Tradition holds him sacred, and he's got to have his fling.
But soon, no doubt, he'll weary out.
Have patience; bide a wee.
"
"That's right.
Respect the Piper," said the Scottish Commy-tee.
And so MacPherson stalked the floor, and fast the moments flew,
Till half an hour went past, as irritation grew and grew.
Then the dancers held a council, and with faces fiercely set,
They hailed Maloney, heading his Hibernian Quartette:
"It's long enough, we've waited.
Come on, Mike, play up the Blues.
"
And Maloney hesitated, but he didn't dare refuse.
So banjo and piano, and guitar and saxophone
Contended with the shrilling of the chanter and the drone;
And the women's ears were muffled, so infernal was the din,
But MacPherson was unruffled, for he knew that he would win.
Then two bright boys jazzed round him, and they sought to play the clown,
But MacPherson jolted sideways, and the Sassenachs went down.
And as if it was a signal, with a wild and angry roar,
The gates of wrath were riven - yet MacPherson held the floor.
Aye, amid the rising tumult, still he strode with head on high,
With ribbands gaily streaming, yet with battle in his eye.
Amid the storm that gathered, still he stalked with Highland pride,
While President and Treasurer sprang bravely to his side.
And with ire and indignation that was glorious to see,
Around him in a body ringed the Scottish Commy-tee.
Their teeth were clenched with fury; their eyes with anger blazed:
"Ye manna touch the Piper," was the slogan that they raised.
Then blows were struck, and men went down; yet 'mid the rising fray
MacPherson towered in triumph - and he never ceased to play.
Alas! his faithful followers were but a gallant few,
And faced defeat, although they fought with all the skill they knew.
For President MacConnachie was seen to slip and fall,
And o'er his prostrate body stumbled Treasurer MacCall.
And as their foes with triumph roared, and leagured them about,
It looked as if their little band would soon be counted out.
For eyes were black and noses red, yet on that field of gore,
As resolute as Highland rock - MacPherson held the floor.
Maloney watched the battle, and his brows were bleakly set,
While with him paused and panted his Hibernian Quartette.
For sure it is an evil spite, and breaking to the heart,
For Irishman to watch a fight and not be taking part.
Then suddenly on high he soared, and tightened up his belt:
"And shall we see them crush," he roared, "a brother and a Celt?
A fellow artiste needs our aid.
Come on, boys, take a hand.
"
Then down into the mêlée dashed Maloney and his band.
Now though it was Saint Andrew's Ball, yet men of every race,
That bow before the Great God Jazz were gathered in that place.
Yea, there were those who grunt: "Ya! Ya!" and those who squeak: "We! We!"
Likewise Dutch, Dago, Swede and Finn, Polack and Portugee.
Yet like ripe grain before the gale that national hotch-potch
Went down before the fury of the Irish and the Scotch.
Aye, though they closed their gaping ranks and rallied to the fray,
To the Shamrock and the Thistle went the glory of the day.
You should have seen the carnage in the drooling light of dawn,
Yet 'mid the scene of slaughter Jock MacPherson playing on.
Though all lay low about him, yet he held his head on high,
And piped as if he stood upon the caller crags of Skye.
His face was grim as granite, and no favour did he ask,
Though weary were his mighty lungs and empty was his flask.
And when a fallen foe wailed out: "Say! when will you have done?"
MacPherson grinned and answered: "Hoots! She's only ha'f begun.
"
Aye, though his hands were bloody, and his knees were gay with gore,
A Grampian of Highland pride - MacPherson held the floor.
And still in Yukon valleys where the silent peaks look down,
They tell of how the Piper was invited up to town,
And he went in kilted glory, and he piped before them all,
But wouldn't stop his piping till he busted up the Ball.
Of that Homeric scrap they speak, and how the fight went on,
With sally and with rally till the breaking of the dawn.
And how the Piper towered like a rock amid the fray,
And the battle surged about him, but he never ceased to play.
Aye, by the lonely camp-fires, still they tell the story o'er-
How the Sassenach was vanquished and - MacPherson held the floor.
|
Written by
Robert Burns |
O ONCE I lov’d a bonie lass,
Ay, and I love her still;
And whilst that virtue warms my breast,
I’ll love my handsome Nell.
As bonie lasses I hae seen,
And mony full as braw;
But, for a modest gracefu’ mein,
The like I never saw.
A bonie lass, I will confess,
Is pleasant to the e’e;
But, without some better qualities,
She’s no a lass for me.
But Nelly’s looks are blythe and sweet,
And what is best of a’,
Her reputation is complete,
And fair without a flaw.
She dresses aye sae clean and neat,
Both decent and genteel;
And then there’s something in her gait
Gars ony dress look weel.
A gaudy dress and gentle air
May slightly touch the heart;
But it’s innocence and modesty
That polishes the dart.
’Tis this in Nelly pleases me,
’Tis this enchants my soul;
For absolutely in my breast
She reigns without control.
Note 1.
The first of my performances.
—R.
B.
[back]
|