Written by
Robert Burns |
AS Mailie, an’ her lambs thegither,
Was ae day nibbling on the tether,
Upon her cloot she coost a hitch,
An’ owre she warsl’d in the ditch:
There, groaning, dying, she did lie,
When Hughoc he cam doytin by.
Wi’ glowrin een, and lifted han’s
Poor Hughoc like a statue stan’s;
He saw her days were near-hand ended,
But, wae’s my heart! he could na mend it!
He gaped wide, but naething spak,
At langth poor Mailie silence brak.
“O thou, whase lamentable face
Appears to mourn my woefu’ case!
My dying words attentive hear,
An’ bear them to my Master dear.
“Tell him, if e’er again he keep
As muckle gear as buy a sheep—
O, bid him never tie them mair,
Wi’ wicked strings o’ hemp or hair!
But ca’ them out to park or hill,
An’ let them wander at their will:
So may his flock increase, an’ grow
To scores o’ lambs, an’ packs o’ woo’!
“Tell him, he was a Master kin’,
An’ aye was guid to me an’ mine;
An’ now my dying charge I gie him,
My helpless lambs, I trust them wi’ him.
“O, bid him save their harmless lives,
Frae dogs, an’ tods, an’ butcher’s knives!
But gie them guid cow-milk their fill,
Till they be fit to fend themsel’;
An’ tent them duly, e’en an’ morn,
Wi’ taets o’ hay an’ ripps o’ corn.
“An’ may they never learn the gaets,
Of ither vile, wanrestfu’ pets—
To slink thro’ slaps, an’ reave an’ steal
At stacks o’ pease, or stocks o’ kail!
So may they, like their great forbears,
For mony a year come thro the shears:
So wives will gie them bits o’ bread,
An’ bairns greet for them when they’re dead.
“My poor toop-lamb, my son an’ heir,
O, bid him breed him up wi’ care!
An’ if he live to be a beast,
To pit some havins in his breast!
“An’ warn him—what I winna name—
To stay content wi’ yowes at hame;
An’ no to rin an’ wear his cloots,
Like ither menseless, graceless brutes.
“An’ neist, my yowie, silly thing,
Gude keep thee frae a tether string!
O, may thou ne’er forgather up,
Wi’ ony blastit, moorland toop;
But aye keep mind to moop an’ mell,
Wi’ sheep o’ credit like thysel’!
“And now, my bairns, wi’ my last breath,
I lea’e my blessin wi’ you baith:
An’ when you think upo’ your mither,
Mind to be kind to ane anither.
“Now, honest Hughoc, dinna fail,
To tell my master a’ my tale;
An’ bid him burn this cursed tether,
An’ for thy pains thou’se get my blather.”
This said, poor Mailie turn’d her head,
And clos’d her een amang the dead!
|
Written by
Robert Burns |
AWA’ wi’ your witchcraft o’ Beauty’s alarms,
The slender bit Beauty you grasp in your arms,
O, gie me the lass that has acres o’ charms,
O, gie me the lass wi’ the weel-stockit farms.
Chorus.—Then hey, for a lass wi’ a tocher,
Then hey, for a lass wi’ a tocher;
Then hey, for a lass wi’ a tocher;
The nice yellow guineas for me.
Your Beauty’s a flower in the morning that blows,
And withers the faster, the faster it grows:
But the rapturous charm o’ the bonie green knowes,
Ilk spring they’re new deckit wi’ bonie white yowes.
Then hey, for a lass, &c.
And e’en when this Beauty your bosom hath blest
The brightest o’ Beauty may cloy when possess’d;
But the sweet, yellow darlings wi’ Geordie impress’d,
The langer ye hae them, the mair they’re carest.
Then hey, for a lass, &c.
|
Written by
Robert Burns |
Chorus.—Ca’ the yowes to the knowes,
Ca’ them where the heather grows,
Ca’ them where the burnie rowes,
My bonie dearie
AS I gaed down the water-side,
There I met my shepherd lad:
He row’d me sweetly in his plaid,
And he ca’d me his dearie.
Ca’ the yowes, &c.
Will ye gang down the water-side,
And see the waves sae sweetly glide
Beneath the hazels spreading wide,
The moon it shines fu’ clearly.
Ca’ the yowes, &c.
Ye sall get gowns and ribbons meet,
Cauf-leather shoon upon your feet,
And in my arms ye’se lie and sleep,
An’ ye sall be my dearie.
Ca’ the yowes, &c.
If ye’ll but stand to what ye’ve said,
I’se gang wi’ thee, my shepherd lad,
And ye may row me in your plaid,
And I sall be your dearie.
Ca’ the yowes, &c.
While waters wimple to the sea,
While day blinks in the lift sae hie,
Till clay-cauld death sall blin’ my e’e,
Ye sall be my dearie.
Ca’ the yowes, &c.
|
Written by
Robert Burns |
THE BLUDE-RED rose at Yule may blaw,
The simmer lilies bloom in snaw,
The frost may freeze the deepest sea;
But an auld man shall never daunton me.
Refrain.—To daunton me, to daunton me,
And auld man shall never daunton me.
To daunton me, and me sae young,
Wi’ his fause heart and flatt’ring tongue,
That is the thing you shall never see,
For an auld man shall never daunton me.
To daunton me, &c.
For a’ his meal and a’ his maut,
For a’ his fresh beef and his saut,
For a’ his gold and white monie,
And auld men shall never daunton me.
To daunton me, &c.
His gear may buy him kye and yowes,
His gear may buy him glens and knowes;
But me he shall not buy nor fee,
For an auld man shall never daunton me.
To daunton me, &c.
He hirples twa fauld as he dow,
Wi’ his teethless gab and his auld beld pow,
And the rain rains down frae his red blear’d e’e;
That auld man shall never daunton me.
To daunton me, &c.
|
Written by
Robert Burns |
Chorus.—Ca’the yowes to the knowes,
Ca’ them where the heather grows,
Ca’ them where the burnie rowes,
My bonie Dearie.
HARK the mavis’ e’ening sang,
Sounding Clouden’s woods amang;
Then a-faulding let us gang,
My bonie Dearie.
Ca’ the yowes, &c.
We’ll gae down by Clouden side,
Thro’ the hazels, spreading wide,
O’er the waves that sweetly glide,
To the moon sae clearly.
Ca’ the yowes, &c.
Yonder Clouden’s silent towers, 1
Where, at moonshine’s midnight hours,
O’er the dewy-bending flowers,
Fairies dance sae cheery.
Ca’ the yowes, &c.
Ghaist nor bogle shalt thou fear,
Thou’rt to Love and Heav’n sae dear,
Nocht of ill may come thee near;
My bonie Dearie.
Ca’ the yowes, &c.
Fair and lovely as thou art,
Thou hast stown my very heart;
I can die—but canna part,
My bonie Dearie.
Ca’ the yowes, &c.
Note 1. An old ruin in a sweet situation at the confluence of the Clouden and the Nith.—R. B. [back]
|
Written by
Robert Louis Stevenson |
THE wind may blaw the lee-gang way
And aye the lift be mirk an' gray,
An deep the moss and steigh the brae
Where a' maun gang -
There's still an hoor in ilka day
For luve and sang.
And canty hearts are strangely steeled.
By some dikeside they'll find a bield,
Some couthy neuk by muir or field
They're sure to hit,
Where, frae the blatherin' wind concealed,
They'll rest a bit.
An' weel for them if kindly fate
Send ower the hills to them a mate;
They'll crack a while o' kirk an' State,
O' yowes an' rain:
An' when it's time to take the gate,
Tak' ilk his ain.
- Sic neuk beside the southern sea
I soucht - sic place o' quiet lee
Frae a' the winds o' life. To me,
Fate, rarely fair,
Had set a freendly company
To meet me there.
Kindly by them they gart me sit,
An' blythe was I to bide a bit.
Licht as o' some hame fireside lit
My life for me.
- Ower early maun I rise an' quit
This happy lee.
|