Written by
Robert Burns |
IN Tarbolton, ye ken, there are proper young men,
And proper young lasses and a’, man;
But ken ye the Ronalds that live in the Bennals,
They carry the gree frae them a’, man.
Their father’s laird, and weel he can spare’t,
Braid money to tocher them a’, man;
To proper young men, he’ll clink in the hand
Gowd guineas a hunder or twa, man.
There’s ane they ca’ Jean, I’ll warrant ye’ve seen
As bonie a lass or as braw, man;
But for sense and guid taste she’ll vie wi’ the best,
And a conduct that beautifies a’, man.
The charms o’ the min’, the langer they shine,
The mair admiration they draw, man;
While peaches and cherries, and roses and lilies,
They fade and they wither awa, man,
If ye be for Miss Jean, tak this frae a frien’,
A hint o’ a rival or twa, man;
The Laird o’ Blackbyre wad gang through the fire,
If that wad entice her awa, man.
The Laird o’ Braehead has been on his speed,
For mair than a towmond or twa, man;
The Laird o’ the Ford will straught on a board,
If he canna get her at a’, man.
Then Anna comes in, the pride o’ her kin,
The boast of our bachelors a’, man:
Sae sonsy and sweet, sae fully complete,
She steals our affections awa, man.
If I should detail the pick and the wale
O’ lasses that live here awa, man,
The fau’t wad be mine if they didna shine
The sweetest and best o’ them a’, man.
I lo’e her mysel, but darena weel tell,
My poverty keeps me in awe, man;
For making o’ rhymes, and working at times,
Does little or naething at a’, man.
Yet I wadna choose to let her refuse,
Nor hae’t in her power to say na, man:
For though I be poor, unnoticed, obscure,
My stomach’s as proud as them a’, man.
Though I canna ride in weel-booted pride,
And flee o’er the hills like a craw, man,
I can haud up my head wi’ the best o’ the breed,
Though fluttering ever so braw, man.
My coat and my vest, they are Scotch o’ the best,
O’ pairs o’ guid breeks I hae twa, man;
And stockings and pumps to put on my stumps,
And ne’er a wrang steek in them a’, man.
My sarks they are few, but five o’ them new,
Twal’ hundred, as white as the snaw, man,
A ten-shillings hat, a Holland cravat;
There are no mony poets sae braw, man.
I never had frien’s weel stockit in means,
To leave me a hundred or twa, man;
Nae weel-tocher’d aunts, to wait on their drants,
And wish them in hell for it a’, man.
I never was cannie for hoarding o’ money,
Or claughtin’t together at a’, man;
I’ve little to spend, and naething to lend,
But deevil a shilling I awe, man.
|
Written by
Robert Burns |
SOME books are lies frae end to end,
And some great lies were never penn’d:
Ev’n ministers they hae been kenn’d,
In holy rapture,
A rousing whid at times to vend,
And nail’t wi’ Scripture.
But this that I am gaun to tell,
Which lately on a night befell,
Is just as true’s the Deil’s in hell
Or Dublin city:
That e’er he nearer comes oursel’
’S a muckle pity.
The clachan yill had made me canty,
I was na fou, but just had plenty;
I stacher’d whiles, but yet too tent aye
To free the ditches;
An’ hillocks, stanes, an’ bushes, kenn’d eye
Frae ghaists an’ witches.
The rising moon began to glowre
The distant Cumnock hills out-owre:
To count her horns, wi’ a my pow’r,
I set mysel’;
But whether she had three or four,
I cou’d na tell.
I was come round about the hill,
An’ todlin down on Willie’s mill,
Setting my staff wi’ a’ my skill,
To keep me sicker;
Tho’ leeward whiles, against my will,
I took a bicker.
I there wi’ Something did forgather,
That pat me in an eerie swither;
An’ awfu’ scythe, out-owre ae shouther,
Clear-dangling, hang;
A three-tae’d leister on the ither
Lay, large an’ lang.
Its stature seem’d lang Scotch ells twa,
The queerest shape that e’er I saw,
For fient a wame it had ava;
And then its shanks,
They were as thin, as sharp an’ sma’
As cheeks o’ branks.
“Guid-een,” quo’ I; “Friend! hae ye been mawin,
When ither folk are busy sawin!” 1
I seem’d to make a kind o’ stan’
But naething spak;
At length, says I, “Friend! whare ye gaun?
Will ye go back?”
It spak right howe,—“My name is Death,
But be na fley’d.”—Quoth I, “Guid faith,
Ye’re maybe come to stap my breath;
But tent me, billie;
I red ye weel, tak care o’ skaith
See, there’s a gully!”
“Gudeman,” quo’ he, “put up your whittle,
I’m no designed to try its mettle;
But if I did, I wad be kittle
To be mislear’d;
I wad na mind it, no that spittle
Out-owre my beard.”
“Weel, weel!” says I, “a bargain be’t;
Come, gie’s your hand, an’ sae we’re gree’t;
We’ll ease our shanks an tak a seat—
Come, gie’s your news;
This while ye hae been mony a gate,
At mony a house.” 2
“Ay, ay!” quo’ he, an’ shook his head,
“It’s e’en a lang, lang time indeed
Sin’ I began to nick the thread,
An’ choke the breath:
Folk maun do something for their bread,
An’ sae maun Death.
“Sax thousand years are near-hand fled
Sin’ I was to the butching bred,
An’ mony a scheme in vain’s been laid,
To stap or scar me;
Till ane Hornbook’s 3 ta’en up the trade,
And faith! he’ll waur me.
“Ye ken Hornbook i’ the clachan,
Deil mak his king’s-hood in spleuchan!
He’s grown sae weel acquaint wi’ Buchan 4
And ither chaps,
The weans haud out their fingers laughin,
An’ pouk my hips.
“See, here’s a scythe, an’ there’s dart,
They hae pierc’d mony a gallant heart;
But Doctor Hornbook, wi’ his art
An’ cursed skill,
Has made them baith no worth a f—t,
D—n’d haet they’ll kill!
“’Twas but yestreen, nae farther gane,
I threw a noble throw at ane;
Wi’ less, I’m sure, I’ve hundreds slain;
But deil-ma-care,
It just play’d dirl on the bane,
But did nae mair.
“Hornbook was by, wi’ ready art,
An’ had sae fortify’d the part,
That when I looked to my dart,
It was sae blunt,
Fient haet o’t wad hae pierc’d the heart
Of a kail-runt.
“I drew my scythe in sic a fury,
I near-hand cowpit wi’ my hurry,
But yet the bauld Apothecary
Withstood the shock;
I might as weel hae tried a quarry
O’ hard whin rock.
“Ev’n them he canna get attended,
Altho’ their face he ne’er had kend it,
Just —— in a kail-blade, an’ sent it,
As soon’s he smells ’t,
Baith their disease, and what will mend it,
At once he tells ’t.
“And then, a’ doctor’s saws an’ whittles,
Of a’ dimensions, shapes, an’ mettles,
A’ kind o’ boxes, mugs, an’ bottles,
He’s sure to hae;
Their Latin names as fast he rattles
As A B C.
“Calces o’ fossils, earths, and trees;
True sal-marinum o’ the seas;
The farina of beans an’ pease,
He has’t in plenty;
Aqua-fontis, what you please,
He can content ye.
“Forbye some new, uncommon weapons,
Urinus spiritus of capons;
Or mite-horn shavings, filings, scrapings,
Distill’d per se;
Sal-alkali o’ midge-tail clippings,
And mony mae.”
“Waes me for Johnie Ged’s-Hole 5 now,”
Quoth I, “if that thae news be true!
His braw calf-ward whare gowans grew,
Sae white and bonie,
Nae doubt they’ll rive it wi’ the plew;
They’ll ruin Johnie!”
The creature grain’d an eldritch laugh,
And says “Ye needna yoke the pleugh,
Kirkyards will soon be till’d eneugh,
Tak ye nae fear:
They’ll be trench’d wi’ mony a sheugh,
In twa-three year.
“Whare I kill’d ane, a fair strae-death,
By loss o’ blood or want of breath
This night I’m free to tak my aith,
That Hornbook’s skill
Has clad a score i’ their last claith,
By drap an’ pill.
“An honest wabster to his trade,
Whase wife’s twa nieves were scarce weel-bred
Gat tippence-worth to mend her head,
When it was sair;
The wife slade cannie to her bed,
But ne’er spak mair.
“A country laird had ta’en the batts,
Or some curmurring in his guts,
His only son for Hornbook sets,
An’ pays him well:
The lad, for twa guid gimmer-pets,
Was laird himsel’.
“A bonie lass—ye kend her name—
Some ill-brewn drink had hov’d her wame;
She trusts hersel’, to hide the shame,
In Hornbook’s care;
Horn sent her aff to her lang hame,
To hide it there.
“That’s just a swatch o’ Hornbook’s way;
Thus goes he on from day to day,
Thus does he poison, kill, an’ slay,
An’s weel paid for’t;
Yet stops me o’ my lawfu’ prey,
Wi’ his d—n’d dirt:
“But, hark! I’ll tell you of a plot,
Tho’ dinna ye be speakin o’t;
I’ll nail the self-conceited sot,
As dead’s a herrin;
Neist time we meet, I’ll wad a groat,
He gets his fairin!”
But just as he began to tell,
The auld kirk-hammer strak the bell
Some wee short hour ayont the twal’,
Which rais’d us baith:
I took the way that pleas’d mysel’,
And sae did Death.
Note 1. This recontre happened in seed-time, 1785.—R. B. [back]
Note 2. An epidemical fever was then raging in that country.—R. B. [back]
Note 3. This gentleman, Dr. Hornbook, is professionally a brother of the sovereign Order of the Ferula; but, by intuition and inspiration, is at once an apothecary, surgeon, and physician.—R. B. [back]
Note 4. Burchan’s Domestic Medicine.—R. B. [back]
Note 5. The grave-digger.—R. B. [back]
|
Written by
Robert Burns |
O THOU! whatever title suit thee—
Auld Hornie, Satan, Nick, or Clootie,
Wha in yon cavern grim an’ sootie,
Clos’d under hatches,
Spairges about the brunstane cootie,
To scaud poor wretches!
Hear me, auld Hangie, for a wee,
An’ let poor damned bodies be;
I’m sure sma’ pleasure it can gie,
Ev’n to a deil,
To skelp an’ scaud poor dogs like me,
An’ hear us squeel!
Great is thy pow’r an’ great thy fame;
Far ken’d an’ noted is thy name;
An’ tho’ yon lowin’ heuch’s thy hame,
Thou travels far;
An’ faith! thou’s neither lag nor lame,
Nor blate, nor scaur.
Whiles, ranging like a roarin lion,
For prey, a’ holes and corners tryin;
Whiles, on the strong-wind’d tempest flyin,
Tirlin the kirks;
Whiles, in the human bosom pryin,
Unseen thou lurks.
I’ve heard my rev’rend graunie say,
In lanely glens ye like to stray;
Or where auld ruin’d castles grey
Nod to the moon,
Ye fright the nightly wand’rer’s way,
Wi’ eldritch croon.
When twilight did my graunie summon,
To say her pray’rs, douse, honest woman!
Aft’yont the dyke she’s heard you bummin,
Wi’ eerie drone;
Or, rustlin, thro’ the boortrees comin,
Wi’ heavy groan.
Ae dreary, windy, winter night,
The stars shot down wi’ sklentin light,
Wi’ you, mysel’ I gat a fright,
Ayont the lough;
Ye, like a rash-buss, stood in sight,
Wi’ wavin’ sough.
The cudgel in my nieve did shake,
Each brist’ld hair stood like a stake,
When wi’ an eldritch, stoor “quaick, quaick,”
Amang the springs,
Awa ye squatter’d like a drake,
On whistlin’ wings.
Let warlocks grim, an’ wither’d hags,
Tell how wi’ you, on ragweed nags,
They skim the muirs an’ dizzy crags,
Wi’ wicked speed;
And in kirk-yards renew their leagues,
Owre howkit dead.
Thence countra wives, wi’ toil and pain,
May plunge an’ plunge the kirn in vain;
For oh! the yellow treasure’s ta’en
By witchin’ skill;
An’ dawtit, twal-pint hawkie’s gane
As yell’s the bill.
Thence mystic knots mak great abuse
On young guidmen, fond, keen an’ crouse,
When the best wark-lume i’ the house,
By cantrip wit,
Is instant made no worth a louse,
Just at the bit.
When thowes dissolve the snawy hoord,
An’ float the jinglin’ icy boord,
Then water-kelpies haunt the foord,
By your direction,
And ’nighted trav’llers are allur’d
To their destruction.
And aft your moss-traversin Spunkies
Decoy the wight that late an’ drunk is:
The bleezin, curst, mischievous monkies
Delude his eyes,
Till in some miry slough he sunk is,
Ne’er mair to rise.
When masons’ mystic word an’ grip
In storms an’ tempests raise you up,
Some cock or cat your rage maun stop,
Or, strange to tell!
The youngest brither ye wad whip
Aff straught to hell.
Lang syne in Eden’s bonie yard,
When youthfu’ lovers first were pair’d,
An’ all the soul of love they shar’d,
The raptur’d hour,
Sweet on the fragrant flow’ry swaird,
In shady bower; 1
Then you, ye auld, snick-drawing dog!
Ye cam to Paradise incog,
An’ play’d on man a cursèd brogue,
(Black be your fa’!)
An’ gied the infant warld a shog,
’Maist rui’d a’.
D’ye mind that day when in a bizz
Wi’ reekit duds, an’ reestit gizz,
Ye did present your smoutie phiz
’Mang better folk,
An’ sklented on the man of Uzz
Your spitefu’ joke?
An’ how ye gat him i’ your thrall,
An’ brak him out o’ house an hal’,
While scabs and botches did him gall,
Wi’ bitter claw;
An’ lows’d his ill-tongu’d wicked scaul’,
Was warst ava?
But a’ your doings to rehearse,
Your wily snares an’ fechtin fierce,
Sin’ that day Michael 2 did you pierce,
Down to this time,
Wad ding a Lallan tounge, or Erse,
In prose or rhyme.
An’ now, auld Cloots, I ken ye’re thinkin,
A certain bardie’s rantin, drinkin,
Some luckless hour will send him linkin
To your black pit;
But faith! he’ll turn a corner jinkin,
An’ cheat you yet.
But fare-you-weel, auld Nickie-ben!
O wad ye tak a thought an’ men’!
Ye aiblins might-I dinna ken—
Stil hae a stake
I’m wae to think up’ yon den,
Ev’n for your sake!
Note 1. The verse originally ran:
“Lang syne, in Eden’s happy scene
When strappin Adam’s days were green,
And Eve was like my bonie Jean,
My dearest part,
A dancin, sweet, young handsome quean,
O’ guileless heart.”
[back]
Note 2. Vide Milton, Book vi.—R. B. [back]
|