97. To John Kennedy Dumfries House

Read '97. To John Kennedy Dumfries House' by 'Robert Burns' and provide your summary and literary analysis in the comments section below.

97. To John Kennedy Dumfries House by Robert Burns

 NOW, Kennedy, if foot or horse
E’er bring you in by Mauchlin corse,
(Lord, man, there’s lasses there wad force
 A hermit’s fancy;
An’ down the gate in faith they’re worse,
 An’ mair unchancy).


But as I’m sayin, please step to Dow’s,
An’ taste sic gear as Johnie brews,
Till some bit callan bring me news
 That ye are there;
An’ if we dinna hae a bouze,
 I’se ne’er drink mair.


It’s no I like to sit an’ swallow,
Then like a swine to puke an’ wallow;
But gie me just a true good fallow,
 Wi’ right ingine,
And spunkie ance to mak us mellow,
 An’ then we’ll shine.


Now if ye’re ane o’ warl’s folk,
Wha rate the wearer by the cloak,
An’ sklent on poverty their joke,
 Wi’ bitter sneer,
Wi’ you nae friendship I will troke,
 Nor cheap nor dear.


But if, as I’m informèd weel,
Ye hate as ill’s the very deil
The flinty heart that canna feel—
 Come, sir, here’s to you!
Hae, there’s my haun’, I wiss you weel,
 An’ gude be wi’ you.ROBT. BURNESS.MOSSGIEL, 3rd March, 1786.

Form: Lyric

♡Like0

Share Comments