464. The Highland Widow's Lament

464. The Highland Widow's Lament by Robert Burns

 OH I am come to the low Countrie,
 Ochon, Ochon, Ochrie!
Without a penny in my purse,
 To buy a meal to me.


It was na sae in the Highland hills,
 Ochon, Ochon, Ochrie!
Nae woman in the Country wide,
 Sae happy was as me.


For then I had a score o’kye,
 Ochon, Ochon, Ochrie!
Feeding on you hill sae high,
 And giving milk to me.


And there I had three score o’yowes,
 Ochon, Ochon, Ochrie!
Skipping on yon bonie knowes,
 And casting woo’ to me.


I was the happiest of a’ the Clan,
 Sair, sair, may I repine;
For Donald was the brawest man,
 And Donald he was mine.


Till Charlie Stewart cam at last,
 Sae far to set us free;
My Donald’s arm was wanted then,
 For Scotland and for me.


Their waefu’ fate what need I tell,
 Right to the wrang did yield;
My Donald and his Country fell,
 Upon Culloden field.


Oh I am come to the low Countrie,
 Ochon, Ochon, Ochrie!
Nae woman in the warld wide,
 Sae wretched now as me.

Form: Ballad

♡Like0

Share Comments