Written by
Robert Burns |
A’ YE wha live by sowps o’ drink,
A’ ye wha live by crambo-clink,
A’ ye wha live and never think,
Come, mourn wi’ me!
Our billie ’s gien us a’ a jink,
An’ owre the sea!
Lament him a’ ye rantin core,
Wha dearly like a random splore;
Nae mair he’ll join the merry roar;
In social key;
For now he’s taen anither shore.
An’ owre the sea!
The bonie lasses weel may wiss him,
And in their dear petitions place him:
The widows, wives, an’ a’ may bless him
Wi’ tearfu’ e’e;
For weel I wat they’ll sairly miss him
That’s owre the sea!
O Fortune, they hae room to grumble!
Hadst thou taen aff some drowsy bummle,
Wha can do nought but fyke an’ fumble,
’Twad been nae plea;
But he was gleg as ony wumble,
That’s owre the sea!
Auld, cantie Kyle may weepers wear,
An’ stain them wi’ the saut, saut tear;
’Twill mak her poor auld heart, I fear,
In flinders flee:
He was her Laureat mony a year,
That’s owre the sea!
He saw Misfortune’s cauld nor-west
Lang mustering up a bitter blast;
A jillet brak his heart at last,
Ill may she be!
So, took a berth afore the mast,
An’ owre the sea.
To tremble under Fortune’s cummock,
On a scarce a bellyfu’ o’ drummock,
Wi’ his proud, independent stomach,
Could ill agree;
So, row’t his hurdies in a hammock,
An’ owre the sea.
He ne’er was gien to great misguidin,
Yet coin his pouches wad na bide in;
Wi’ him it ne’er was under hiding;
He dealt it free:
The Muse was a’ that he took pride in,
That’s owre the sea.
Jamaica bodies, use him weel,
An’ hap him in cozie biel:
Ye’ll find him aye a dainty chiel,
An’ fou o’ glee:
He wad na wrang’d the vera deil,
That’s owre the sea.
Farewell, my rhyme-composing billie!
Your native soil was right ill-willie;
But may ye flourish like a lily,
Now bonilie!
I’ll toast you in my hindmost gillie,
Tho’ owre the sea!
|
Written by
Robert Burns |
O LEEZE me on my spinnin’ wheel,
And leeze me on my rock and reel;
Frae tap to tae that cleeds me bien,
And haps me biel and warm at e’en;
I’ll set me down and sing and spin,
While laigh descends the simmer sun,
Blest wi’ content, and milk and meal,
O leeze me on my spinnin’ wheel.
On ilka hand the burnies trot,
And meet below my theekit cot;
The scented birk and hawthorn white,
Across the pool their arms unite,
Alike to screen the birdie’s nest,
And little fishes’ caller rest;
The sun blinks kindly in the beil’,
Where blythe I turn my spinnin’ wheel.
On lofty aiks the cushats wail,
And Echo cons the doolfu’ tale;
The lintwhites in the hazel braes,
Delighted, rival ither’s lays;
The craik amang the claver hay,
The pairtrick whirring o’er the ley,
The swallow jinkin’ round my shiel,
Amuse me at my spinnin’ wheel.
Wi’ sma’ to sell, and less to buy,
Aboon distress, below envy,
O wha wad leave this humble state,
For a’ the pride of a’ the great?
Amid their flairing, idle toys,
Amid their cumbrous, dinsome joys,
Can they the peace and pleasure feel
Of Bessy at her spinnin’ wheel?
|