Written by
Robert Burns |
YE Irish lords, ye knights an’ squires,
Wha represent our brughs an’ shires,
An’ doucely manage our affairs
In parliament,
To you a simple poet’s pray’rs
Are humbly sent.
Alas! my roupit Muse is hearse!
Your Honours’ hearts wi’ grief ’twad pierce,
To see her sittin on her ****
Low i’ the dust,
And scriechinh out prosaic verse,
An like to brust!
Tell them wha hae the chief direction,
Scotland an’ me’s in great affliction,
E’er sin’ they laid that curst restriction
On aqua-vit&æ;
An’ rouse them up to strong conviction,
An’ move their pity.
Stand forth an’ tell yon Premier youth
The honest, open, naked truth:
Tell him o’ mine an’ Scotland’s drouth,
His servants humble:
The muckle deevil blaw you south
If ye dissemble!
Does ony great man glunch an’ gloom?
Speak out, an’ never fash your thumb!
Let posts an’ pensions sink or soom
Wi’ them wha grant them;
If honestly they canna come,
Far better want them.
In gath’rin votes you were na slack;
Now stand as tightly by your tack:
Ne’er claw your lug, an’ fidge your back,
An’ hum an’ haw;
But raise your arm, an’ tell your crack
Before them a’.
Paint Scotland greetin owre her thrissle;
Her mutchkin stowp as toom’s a whissle;
An’ d—mn’d excisemen in a bussle,
Seizin a stell,
Triumphant crushin’t like a mussel,
Or limpet shell!
Then, on the tither hand present her—
A blackguard smuggler right behint her,
An’ cheek-for-chow, a chuffie vintner
Colleaguing join,
Picking her pouch as bare as winter
Of a’ kind coin.
Is there, that bears the name o’ Scot,
But feels his heart’s bluid rising hot,
To see his poor auld mither’s pot
Thus dung in staves,
An’ plunder’d o’ her hindmost groat
By gallows knaves?
Alas! I’m but a nameless wight,
Trode i’ the mire out o’ sight?
But could I like Montgomeries fight,
Or gab like Boswell, 2
There’s some sark-necks I wad draw tight,
An’ tie some hose well.
God bless your Honours! can ye see’t—
The kind, auld cantie carlin greet,
An’ no get warmly to your feet,
An’ gar them hear it,
An’ tell them wi’a patriot-heat
Ye winna bear it?
Some o’ you nicely ken the laws,
To round the period an’ pause,
An’ with rhetoric clause on clause
To mak harangues;
Then echo thro’ Saint Stephen’s wa’s
Auld Scotland’s wrangs.
Dempster, 3 a true blue Scot I’se warran’;
Thee, aith-detesting, chaste Kilkerran; 4
An’ that glib-gabbit Highland baron,
The Laird o’ Graham; 5
An’ ane, a chap that’s damn’d aulfarran’,
Dundas his name: 6
Erskine, a spunkie Norland billie; 7
True Campbells, Frederick and Ilay; 8
An’ Livistone, the bauld Sir Willie; 9
An’ mony ithers,
Whom auld Demosthenes or Tully
Might own for brithers.
See sodger Hugh, 10 my watchman stented,
If poets e’er are represented;
I ken if that your sword were wanted,
Ye’d lend a hand;
But when there’s ought to say anent it,
Ye’re at a stand.
Arouse, my boys! exert your mettle,
To get auld Scotland back her kettle;
Or faith! I’ll wad my new pleugh-pettle,
Ye’ll see’t or lang,
She’ll teach you, wi’ a reekin whittle,
Anither sang.
This while she’s been in crankous mood,
Her lost Militia fir’d her bluid;
(Deil na they never mair do guid,
Play’d her that pliskie!)
An’ now she’s like to rin red-wud
About her whisky.
An’ Lord! if ance they pit her till’t,
Her tartan petticoat she’ll kilt,
An’durk an’ pistol at her belt,
She’ll tak the streets,
An’ rin her whittle to the hilt,
I’ the first she meets!
For God sake, sirs! then speak her fair,
An’ straik her cannie wi’ the hair,
An’ to the muckle house repair,
Wi’ instant speed,
An’ strive, wi’ a’ your wit an’ lear,
To get remead.
Yon ill-tongu’d tinkler, Charlie Fox,
May taunt you wi’ his jeers and mocks;
But gie him’t het, my hearty cocks!
E’en cowe the cadie!
An’ send him to his dicing box
An’ sportin’ lady.
Tell you guid bluid o’ auld Boconnock’s, 11
I’ll be his debt twa mashlum bonnocks,
An’ drink his health in auld Nance Tinnock’s 12
Nine times a-week,
If he some scheme, like tea an’ winnocks,
Was kindly seek.
Could he some commutation broach,
I’ll pledge my aith in guid braid Scotch,
He needna fear their foul reproach
Nor erudition,
Yon mixtie-maxtie, ***** hotch-potch,
The Coalition.
Auld Scotland has a raucle tongue;
She’s just a devil wi’ a rung;
An’ if she promise auld or young
To tak their part,
Tho’ by the neck she should be strung,
She’ll no desert.
And now, ye chosen Five-and-Forty,
May still you mither’s heart support ye;
Then, tho’a minister grow dorty,
An’ kick your place,
Ye’ll snap your gingers, poor an’ hearty,
Before his face.
God bless your Honours, a’ your days,
Wi’ sowps o’ kail and brats o’ claise,
In spite o’ a’ the thievish kaes,
That haunt St. Jamie’s!
Your humble poet sings an’ prays,
While Rab his name is.
POSTSCRIPTLET half-starv’d slaves in warmer skies
See future wines, rich-clust’ring, rise;
Their lot auld Scotland ne’re envies,
But, blythe and frisky,
She eyes her freeborn, martial boys
Tak aff their whisky.
What tho’ their Phoebus kinder warms,
While fragrance blooms and beauty charms,
When wretches range, in famish’d swarms,
The scented groves;
Or, hounded forth, dishonour arms
In hungry droves!
Their gun’s a burden on their shouther;
They downa bide the stink o’ powther;
Their bauldest thought’s a hank’ring swither
To stan’ or rin,
Till skelp—a shot—they’re aff, a’throw’ther,
To save their skin.
But bring a Scotchman frae his hill,
Clap in his cheek a Highland gill,
Say, such is royal George’s will,
An’ there’s the foe!
He has nae thought but how to kill
Twa at a blow.
Nae cauld, faint-hearted doubtings tease him;
Death comes, wi’ fearless eye he sees him;
Wi’bluidy hand a welcome gies him;
An’ when he fa’s,
His latest draught o’ breathin lea’es him
In faint huzzas.
Sages their solemn een may steek,
An’ raise a philosophic reek,
An’ physically causes seek,
In clime an’ season;
But tell me whisky’s name in Greek
I’ll tell the reason.
Scotland, my auld, respected mither!
Tho’ whiles ye moistify your leather,
Till, whare ye sit on craps o’ heather,
Ye tine your dam;
Freedom an’ whisky gang thegither!
Take aff your dram!
Note 1. This was written before the Act anent the Scotch distilleries, of session 1786, for which Scotland and the author return their most grateful thanks.—R. B. [back]
Note 2. James Boswell of Auchinleck, the biographer of Johnson. [back]
Note 3. George Dempster of Dunnichen. [back]
Note 4. Sir Adam Ferguson of Kilkerran, Bart. [back]
Note 5. The Marquis of Graham, eldest son of the Duke of Montrose. [back]
Note 6. Right Hon. Henry Dundas, M. P. [back]
Note 7. Probably Thomas, afterward Lord Erskine. [back]
Note 8. Lord Frederick Campbell, second brother of the Duke of Argyll, and Ilay Campbell, Lord Advocate for Scotland, afterward President of the Court of Session. [back]
Note 9. Sir Wm. Augustus Cunningham, Baronet, of Livingstone. [back]
Note 10. Col. Hugh Montgomery, afterward Earl of Eglinton. [back]
Note 11. Pitt, whose grandfather was of Boconnock in Cornwall. [back]
Note 12. A worthy old hostess of the author’s in Mauchline, where he sometimes studies politics over a glass of gude auld Scotch Drink.—R. B. [back]
|
Written by
Robert Burns |
SOME books are lies frae end to end,
And some great lies were never penn’d:
Ev’n ministers they hae been kenn’d,
In holy rapture,
A rousing whid at times to vend,
And nail’t wi’ Scripture.
But this that I am gaun to tell,
Which lately on a night befell,
Is just as true’s the Deil’s in hell
Or Dublin city:
That e’er he nearer comes oursel’
’S a muckle pity.
The clachan yill had made me canty,
I was na fou, but just had plenty;
I stacher’d whiles, but yet too tent aye
To free the ditches;
An’ hillocks, stanes, an’ bushes, kenn’d eye
Frae ghaists an’ witches.
The rising moon began to glowre
The distant Cumnock hills out-owre:
To count her horns, wi’ a my pow’r,
I set mysel’;
But whether she had three or four,
I cou’d na tell.
I was come round about the hill,
An’ todlin down on Willie’s mill,
Setting my staff wi’ a’ my skill,
To keep me sicker;
Tho’ leeward whiles, against my will,
I took a bicker.
I there wi’ Something did forgather,
That pat me in an eerie swither;
An’ awfu’ scythe, out-owre ae shouther,
Clear-dangling, hang;
A three-tae’d leister on the ither
Lay, large an’ lang.
Its stature seem’d lang Scotch ells twa,
The queerest shape that e’er I saw,
For fient a wame it had ava;
And then its shanks,
They were as thin, as sharp an’ sma’
As cheeks o’ branks.
“Guid-een,” quo’ I; “Friend! hae ye been mawin,
When ither folk are busy sawin!” 1
I seem’d to make a kind o’ stan’
But naething spak;
At length, says I, “Friend! whare ye gaun?
Will ye go back?”
It spak right howe,—“My name is Death,
But be na fley’d.”—Quoth I, “Guid faith,
Ye’re maybe come to stap my breath;
But tent me, billie;
I red ye weel, tak care o’ skaith
See, there’s a gully!”
“Gudeman,” quo’ he, “put up your whittle,
I’m no designed to try its mettle;
But if I did, I wad be kittle
To be mislear’d;
I wad na mind it, no that spittle
Out-owre my beard.”
“Weel, weel!” says I, “a bargain be’t;
Come, gie’s your hand, an’ sae we’re gree’t;
We’ll ease our shanks an tak a seat—
Come, gie’s your news;
This while ye hae been mony a gate,
At mony a house.” 2
“Ay, ay!” quo’ he, an’ shook his head,
“It’s e’en a lang, lang time indeed
Sin’ I began to nick the thread,
An’ choke the breath:
Folk maun do something for their bread,
An’ sae maun Death.
“Sax thousand years are near-hand fled
Sin’ I was to the butching bred,
An’ mony a scheme in vain’s been laid,
To stap or scar me;
Till ane Hornbook’s 3 ta’en up the trade,
And faith! he’ll waur me.
“Ye ken Hornbook i’ the clachan,
Deil mak his king’s-hood in spleuchan!
He’s grown sae weel acquaint wi’ Buchan 4
And ither chaps,
The weans haud out their fingers laughin,
An’ pouk my hips.
“See, here’s a scythe, an’ there’s dart,
They hae pierc’d mony a gallant heart;
But Doctor Hornbook, wi’ his art
An’ cursed skill,
Has made them baith no worth a f—t,
D—n’d haet they’ll kill!
“’Twas but yestreen, nae farther gane,
I threw a noble throw at ane;
Wi’ less, I’m sure, I’ve hundreds slain;
But deil-ma-care,
It just play’d dirl on the bane,
But did nae mair.
“Hornbook was by, wi’ ready art,
An’ had sae fortify’d the part,
That when I looked to my dart,
It was sae blunt,
Fient haet o’t wad hae pierc’d the heart
Of a kail-runt.
“I drew my scythe in sic a fury,
I near-hand cowpit wi’ my hurry,
But yet the bauld Apothecary
Withstood the shock;
I might as weel hae tried a quarry
O’ hard whin rock.
“Ev’n them he canna get attended,
Altho’ their face he ne’er had kend it,
Just —— in a kail-blade, an’ sent it,
As soon’s he smells ’t,
Baith their disease, and what will mend it,
At once he tells ’t.
“And then, a’ doctor’s saws an’ whittles,
Of a’ dimensions, shapes, an’ mettles,
A’ kind o’ boxes, mugs, an’ bottles,
He’s sure to hae;
Their Latin names as fast he rattles
As A B C.
“Calces o’ fossils, earths, and trees;
True sal-marinum o’ the seas;
The farina of beans an’ pease,
He has’t in plenty;
Aqua-fontis, what you please,
He can content ye.
“Forbye some new, uncommon weapons,
Urinus spiritus of capons;
Or mite-horn shavings, filings, scrapings,
Distill’d per se;
Sal-alkali o’ midge-tail clippings,
And mony mae.”
“Waes me for Johnie Ged’s-Hole 5 now,”
Quoth I, “if that thae news be true!
His braw calf-ward whare gowans grew,
Sae white and bonie,
Nae doubt they’ll rive it wi’ the plew;
They’ll ruin Johnie!”
The creature grain’d an eldritch laugh,
And says “Ye needna yoke the pleugh,
Kirkyards will soon be till’d eneugh,
Tak ye nae fear:
They’ll be trench’d wi’ mony a sheugh,
In twa-three year.
“Whare I kill’d ane, a fair strae-death,
By loss o’ blood or want of breath
This night I’m free to tak my aith,
That Hornbook’s skill
Has clad a score i’ their last claith,
By drap an’ pill.
“An honest wabster to his trade,
Whase wife’s twa nieves were scarce weel-bred
Gat tippence-worth to mend her head,
When it was sair;
The wife slade cannie to her bed,
But ne’er spak mair.
“A country laird had ta’en the batts,
Or some curmurring in his guts,
His only son for Hornbook sets,
An’ pays him well:
The lad, for twa guid gimmer-pets,
Was laird himsel’.
“A bonie lass—ye kend her name—
Some ill-brewn drink had hov’d her wame;
She trusts hersel’, to hide the shame,
In Hornbook’s care;
Horn sent her aff to her lang hame,
To hide it there.
“That’s just a swatch o’ Hornbook’s way;
Thus goes he on from day to day,
Thus does he poison, kill, an’ slay,
An’s weel paid for’t;
Yet stops me o’ my lawfu’ prey,
Wi’ his d—n’d dirt:
“But, hark! I’ll tell you of a plot,
Tho’ dinna ye be speakin o’t;
I’ll nail the self-conceited sot,
As dead’s a herrin;
Neist time we meet, I’ll wad a groat,
He gets his fairin!”
But just as he began to tell,
The auld kirk-hammer strak the bell
Some wee short hour ayont the twal’,
Which rais’d us baith:
I took the way that pleas’d mysel’,
And sae did Death.
Note 1. This recontre happened in seed-time, 1785.—R. B. [back]
Note 2. An epidemical fever was then raging in that country.—R. B. [back]
Note 3. This gentleman, Dr. Hornbook, is professionally a brother of the sovereign Order of the Ferula; but, by intuition and inspiration, is at once an apothecary, surgeon, and physician.—R. B. [back]
Note 4. Burchan’s Domestic Medicine.—R. B. [back]
Note 5. The grave-digger.—R. B. [back]
|
Written by
Robert Burns |
SIR, as your mandate did request,
I send you here a faithfu’ list,
O’ gudes an’ gear, an’ a’ my graith,
To which I’m clear to gi’e my aith.
Imprimis, then, for carriage cattle,
I hae four brutes o’ gallant mettle,
As ever drew afore a pettle.
My hand-afore ’s a guid auld has-been,
An’ wight an’ wilfu’ a’ his days been:
My hand-ahin ’s a weel gaun fillie,
That aft has borne me hame frae Killie. 2
An’ your auld borough mony a time
In days when riding was nae crime.
But ance, when in my wooing pride
I, like a blockhead, boost to ride,
The wilfu’ creature sae I pat to,
(L—d pardon a’ my sins, an’ that too!)
I play’d my fillie sic a shavie,
She’s a’ bedevil’d wi’ the spavie.
My furr-ahin ’s a wordy beast,
As e’er in tug or tow was traced.
The fourth’s a Highland Donald hastle,
A d—n’d red-wud Kilburnie blastie!
Foreby a cowt, o’ cowts the wale,
As ever ran afore a tail:
Gin he be spar’d to be a beast,
He’ll draw me fifteen pund at least.
Wheel-carriages I ha’e but few,
Three carts, an’ twa are feckly new;
An auld wheelbarrow, mair for token,
Ae leg an’ baith the trams are broken;
I made a poker o’ the spin’le,
An’ my auld mither brunt the trin’le.
For men, I’ve three mischievous boys,
Run-deils for ranting an’ for noise;
A gaudsman ane, a thrasher t’ other:
Wee Davock hauds the nowt in fother.
I rule them as I ought, discreetly,
An’ aften labour them completely;
An’ aye on Sundays duly, nightly,
I on the Questions targe them tightly;
Till, faith! wee Davock’s grown sae gleg,
Tho’ scarcely langer than your leg,
He’ll screed you aff Effectual Calling,
As fast as ony in the dwalling.
I’ve nane in female servant station,
(L—d keep me aye frae a’ temptation!)
I hae nae wife-and thay my bliss is,
An’ ye have laid nae tax on misses;
An’ then, if kirk folks dinna clutch me,
I ken the deevils darena touch me.
Wi’ weans I’m mair than weel contented,
Heav’n sent me ane mae than I wanted!
My sonsie, smirking, dear-bought Bess,
She stares the daddy in her face,
Enough of ought ye like but grace;
But her, my bonie, sweet wee lady,
I’ve paid enough for her already;
An’ gin ye tax her or her mither,
By the L—d, ye’se get them a’ thegither!
And now, remember, Mr. Aiken,
Nae kind of licence out I’m takin:
Frae this time forth, I do declare
I’se ne’er ride horse nor hizzie mair;
Thro’ dirt and dub for life I’ll paidle,
Ere I sae dear pay for a saddle;
My travel a’ on foot I’ll shank it,
I’ve sturdy bearers, Gude the thankit!
The kirk and you may tak you that,
It puts but little in your pat;
Sae dinna put me in your beuk,
Nor for my ten white shillings leuk.
This list, wi’ my ain hand I wrote it,
The day and date as under noted;
Then know all ye whom it concerns,
Subscripsi huic, ROBERT BURNS.MOSSGIEL, February 22, 1786.
Note 1. The “Inventory” was addressed to Mr. Aitken of Ayr, surveyor of taxes for the district. [back]
Note 2. Kilmarnock.—R. B. [back]
|
Written by
Robert Burns |
WHILE briers an’ woodbines budding green,
An’ paitricks scraichin loud at e’en,
An’ morning poussie whiddin seen,
Inspire my muse,
This freedom, in an unknown frien’,
I pray excuse.
On Fasten-e’en we had a rockin,
To ca’ the crack and weave our stockin;
And there was muckle fun and jokin,
Ye need na doubt;
At length we had a hearty yokin
At sang about.
There was ae sang, amang the rest,
Aboon them a’ it pleas’d me best,
That some kind husband had addrest
To some sweet wife;
It thirl’d the heart-strings thro’ the breast,
A’ to the life.
I’ve scarce heard ought describ’d sae weel,
What gen’rous, manly bosoms feel;
Thought I “Can this be Pope, or Steele,
Or Beattie’s wark?”
They tauld me ’twas an odd kind chiel
About Muirkirk.
It pat me fidgin-fain to hear’t,
An’ sae about him there I speir’t;
Then a’ that kent him round declar’d
He had ingine;
That nane excell’d it, few cam near’t,
It was sae fine:
That, set him to a pint of ale,
An’ either douce or merry tale,
Or rhymes an’ sangs he’d made himsel,
Or witty catches—
’Tween Inverness an’ Teviotdale,
He had few matches.
Then up I gat, an’ swoor an aith,
Tho’ I should pawn my pleugh an’ graith,
Or die a cadger pownie’s death,
At some dyke-back,
A pint an’ gill I’d gie them baith,
To hear your crack.
But, first an’ foremost, I should tell,
Amaist as soon as I could spell,
I to the crambo-jingle fell;
Tho’ rude an’ rough—
Yet crooning to a body’s sel’
Does weel eneugh.
I am nae poet, in a sense;
But just a rhymer like by chance,
An’ hae to learning nae pretence;
Yet, what the matter?
Whene’er my muse does on me glance,
I jingle at her.
Your critic-folk may cock their nose,
And say, “How can you e’er propose,
You wha ken hardly verse frae prose,
To mak a sang?”
But, by your leaves, my learned foes,
Ye’re maybe wrang.
What’s a’ your jargon o’ your schools—
Your Latin names for horns an’ stools?
If honest Nature made you fools,
What sairs your grammars?
Ye’d better taen up spades and shools,
Or knappin-hammers.
A set o’ dull, conceited hashes
Confuse their brains in college classes!
They gang in stirks, and come out asses,
Plain truth to speak;
An’ syne they think to climb Parnassus
By dint o’ Greek!
Gie me ae spark o’ nature’s fire,
That’s a’ the learning I desire;
Then tho’ I drudge thro’ dub an’ mire
At pleugh or cart,
My muse, tho’ hamely in attire,
May touch the heart.
O for a ***** o’ Allan’s glee,
Or Fergusson’s the bauld an’ slee,
Or bright Lapraik’s, my friend to be,
If I can hit it!
That would be lear eneugh for me,
If I could get it.
Now, sir, if ye hae friends enow,
Tho’ real friends, I b’lieve, are few;
Yet, if your catalogue be fu’,
I’se no insist:
But, gif ye want ae friend that’s true,
I’m on your list.
I winna blaw about mysel,
As ill I like my fauts to tell;
But friends, an’ folk that wish me well,
They sometimes roose me;
Tho’ I maun own, as mony still
As far abuse me.
There’s ae wee faut they whiles lay to me,
I like the lasses—Gude forgie me!
For mony a plack they wheedle frae me
At dance or fair;
Maybe some ither thing they gie me,
They weel can spare.
But Mauchline Race, or Mauchline Fair,
I should be proud to meet you there;
We’se gie ae night’s discharge to care,
If we forgather;
An’ hae a swap o’ rhymin-ware
Wi’ ane anither.
The four-gill chap, we’se gar him clatter,
An’ kirsen him wi’ reekin water;
Syne we’ll sit down an’ tak our whitter,
To cheer our heart;
An’ faith, we’se be acquainted better
Before we part.
Awa ye selfish, war’ly race,
Wha think that havins, sense, an’ grace,
Ev’n love an’ friendship should give place
To catch-the-plack!
I dinna like to see your face,
Nor hear your crack.
But ye whom social pleasure charms
Whose hearts the tide of kindness warms,
Who hold your being on the terms,
“Each aid the others,”
Come to my bowl, come to my arms,
My friends, my brothers!
But, to conclude my lang epistle,
As my auld pen’s worn to the gristle,
Twa lines frae you wad gar me fissle,
Who am, most fervent,
While I can either sing or whistle,
Your friend and servant.
|
Written by
Robert Burns |
THERE was five Carlins in the South,
They fell upon a scheme,
To send a lad to London town,
To bring them tidings hame.
Nor only bring them tidings hame,
But do their errands there,
And aiblins gowd and honor baith
Might be that laddie’s share.
There was Maggy by the banks o’ Nith,
A dame wi’ pride eneugh;
And Marjory o’ the mony Lochs,
A Carlin auld and teugh.
And blinkin Bess of Annandale,
That dwelt near Solway-side;
And whisky Jean, that took her gill,
In Galloway sae wide.
And auld black Joan frae Crichton Peel, 1
O’ gipsy kith an’ kin;
Five wighter Carlins were na found
The South countrie within.
To send a lad to London town,
They met upon a day;
And mony a knight, and mony a laird,
This errand fain wad gae.
O mony a knight, and mony a laird,
This errand fain wad gae;
But nae ane could their fancy please,
O ne’er a ane but twae.
The first ane was a belted Knight,
Bred of a Border band; 2
And he wad gae to London town,
Might nae man him withstand.
And he wad do their errands weel,
And meikle he wad say;
And ilka ane about the court
Wad bid to him gude-day.
The neist cam in a Soger youth, 3
Who spak wi’ modest grace,
And he wad gae to London town,
If sae their pleasure was.
He wad na hecht them courtly gifts,
Nor meikle speech pretend;
But he wad hecht an honest heart,
Wad ne’er desert his friend.
Now, wham to chuse, and wham refuse,
At strife thir Carlins fell;
For some had Gentlefolks to please,
And some wad please themsel’.
Then out spak mim-mou’d Meg o’ Nith,
And she spak up wi’ pride,
And she wad send the Soger youth,
Whatever might betide.
For the auld Gudeman o’ London court 4
She didna care a pin;
But she wad send the Soger youth,
To greet his eldest son. 5
Then up sprang Bess o’ Annandale,
And a deadly aith she’s ta’en,
That she wad vote the Border Knight,
Though she should vote her lane.
“For far-off fowls hae feathers fair,
And fools o’ change are fain;
But I hae tried the Border Knight,
And I’ll try him yet again.”
Says black Joan frae Crichton Peel,
A Carlin stoor and grim.
“The auld Gudeman or young Gudeman,
For me may sink or swim;
For fools will prate o’ right or wrang,
While knaves laugh them to scorn;
But the Soger’s friends hae blawn the best,
So he shall bear the horn.”
Then whisky Jean spak owre her drink,
“Ye weel ken, kimmers a’,
The auld gudeman o’ London court,
His back’s been at the wa’;
“And mony a friend that kiss’d his caup
Is now a fremit wight;
But it’s ne’er be said o’ whisky Jean—
We’ll send the Border Knight.”
Then slow raise Marjory o’ the Lochs,
And wrinkled was her brow,
Her ancient weed was russet gray,
Her auld Scots bluid was true;
“There’s some great folk set light by me,
I set as light by them;
But I will send to London town
Wham I like best at hame.”
Sae how this mighty plea may end,
Nae mortal wight can tell;
God grant the King and ilka man
May look weel to himsel.
Note 1. Sanquhar. [back]
Note 2. Sir James Johnston of Westerhall. [back]
Note 3. Captain Patrick Millar of Dalswinton. [back]
Note 4. The King. [back]
Note 5. The Prince of Wales. [back]
|
Written by
Robert Burns |
THERE was a lass, they ca’d her Meg,
And she held o’er the moors to spin;
There was a lad that follow’d her,
They ca’d him Duncan Davison.
The moor was dreigh, and Meg was skeigh,
Her favour Duncan could na win;
For wi’ the rock she wad him knock,
And aye she shook the temper-pin.
As o’er the moor they lightly foor,
A burn was clear, a glen was green,
Upon the banks they eas’d their shanks,
And aye she set the wheel between:
But Duncan swoor a haly aith,
That Meg should be a bride the morn;
Then Meg took up her spinning-graith,
And flang them a’ out o’er the burn.
We will big a wee, wee house,
And we will live like king and queen;
Sae blythe and merry’s we will be,
When ye set by the wheel at e’en.
A man may drink, and no be drunk;
A man may fight, and no be slain;
A man may kiss a bonie lass,
And aye be welcome back again!
|