by
Robert Burns
FAIR fa’ your honest, sonsie face,
Great chieftain o’ the pudding-race!
Aboon them a’ ye tak your place,
Painch, tripe, or thairm:
Weel are ye wordy o’a grace
As lang’s my arm.
The groaning trencher there ye fill,
Your hurdies like a distant hill,
Your pin was help to mend a mill
In time o’need,
While thro’ your pores the dews distil
Like amber bead.
His knife see rustic Labour dight,
An’ cut you up wi’ ready sleight,
Trenching your gushing entrails bright,
Like ony ditch;
And then, O what a glorious sight,
Warm-reekin’, rich!
Then, horn for horn, they stretch an’ strive:
Deil tak the hindmost! on they drive,
Till a’ their weel-swall’d kytes belyve
Are bent like drums;
Then auld Guidman, maist like to rive,
Bethankit! hums.
Is there that owre his French ragout
Or olio that wad staw a sow,
Or fricassee wad make her spew
Wi’ perfect sconner,
Looks down wi’ sneering, scornfu’ view
On sic a dinner?
Poor devil! see him owre his trash,
As feckles as wither’d rash,
His spindle shank, a guid whip-lash;
His nieve a nit;
Thro’ blody flood or field to dash,
O how unfit!
But mark the Rustic, haggis-fed,
The trembling earth resounds his tread.
Clap in his walie nieve a blade,
He’ll mak it whissle;
An’ legs an’ arms, an’ hands will sned,
Like taps o’ trissle.
Ye Pow’rs, wha mak mankind your care,
And dish them out their bill o’ fare,
Auld Scotland wants nae skinking ware
That jaups in luggies;
But, if ye wish her gratefu’ prayer
Gie her a haggis!
|
by
Robert Burns
FRIEND of the Poet, tried and leal,
Wha, wanting thee, might beg or steal;
Alake, alake, the meikle deil
Wi’ a’ his witches
Are at it skelpin jig and reel,
In my poor pouches?
I modestly fu’ fain wad hint it,
That One-pound-one, I sairly want it;
If wi’ the hizzie down ye sent it,
It would be kind;
And while my heart wi’ life-blood dunted,
I’d bear’t in mind.
So may the Auld year gang out moanin’
To see the New come laden, groanin’,
Wi’ double plenty o’er the loanin’,
To thee and thine:
Domestic peace and comforts crownin’
The hale design.
POSTSCRIPTYe’ve heard this while how I’ve been lickit,
And by fell Death was nearly nickit;
Grim loon! he got me by the fecket,
And sair me sheuk;
But by gude luck I lap a wicket,
And turn’d a neuk.
But by that health, I’ve got a share o’t,
But by that life, I’m promis’d mair o’t,
My hale and wee, I’ll tak a care o’t,
A tentier way;
Then farewell folly, hide and hair o’t,
For ance and aye!
|